Miting qarsañında Dempartiyanıñ belsendisin wstamaq bolğan "qwrıqşılardıñ" äreketinen. Foto: äleumettik jeliden skrin-qiındı

Bügin tüski sağat 15:00 şamasında Almatı qalasınıñ ortalıq köşeleriniñ birinde Dempartiya qwrudı közdeytin bastamaşıl toptıñ belsendi müşesi Janbol Rahmatullanı qwqıq qorğau organınıñ eki ökili küş körsetip, wstamaq boldı. Keşikisin sağat 18:07 kezinde policiya qorğauşı topqa aylasın asırıp, aqırı belsendini wstap äketti. 

Gogol' jäne Naurızbay batır köşeleriniñ qiılısında belsendige tap bergen policeylerdiñ äreketin bastamaşı toptıñ jetekşisi Janbolat Mamay men «Jas Alaş» gazetiniñ redaktorı Inga Imanbay facebook jelisindegi jeke parağınan tikeley efirde beynetüsirilim jürgizdi. Beynejazbadan azamattıq erkin formasında kiingen eki policey belsendige beriletin şaqırtu qağazın wsınbağanın jäne wstau sebebin aşıp aytpağanın köruge boladı.

Soñğı kezderi «Halıq ünine qwlaq asatın memleket» qwrudı közdeytin prezident Qasım-Jomart Toqaevtıñ söz erkindigine rwqsat beretin kepildigi miting qarsañında öz küşin joğalta bastadı. Facebook jelisindegi azamattıq bastamağa  monitoring jürgizuşisi #IHaveAChoise #ActivistsNotExtremists  jäne  adam qwqığın qorğauğa arnalğan Qaharman tobı miting qarsañında, aqpan ayınıñ  6-20 aralığında 15 qaladağı 53 belsendige policiya tarapınan ärtürli şara qoldanılğanın jariyaladı.

Äleumettik jelilerde birazdan beri eks-bankir, quğındağı oppoziciyalıq sayasatker Mwhtar Äblyazov jetekşilik etetin, elde ekstremistik wyım retinde tanılıp,  qızmetine tıyım salınğan «Qazaqstannıñ demokratiyalıq tañdauı»  qozğalısı internet arqılı azamattardı 22 aqpanğa jappay mitingige şaqırıp keledi. Äblyazovtiñ jwrtşılıqtı mitingige ündeuimen qatar jarısa profilakikağa qamdanatın İİM qoğamda «basqaşa oylaytın» belsendilerdi ärtürli ayıptarmen üyde nemese izolyatorda qamauda wstaudı ädetke aynaldırğan.

Sonday-aq Janbolat Mamay bastağan Dempartiyanıñ wyımdastıru tobı da erteñ Almatı qalasındağı Astana alañında beybit miting ötkizetinin habarlağan bolatın.

Köptegen belsendiler atalğan «sankciyalanbağan miting» qarsañında jauapqa tartılıp jatır.

Toqaev ötken jılı 5-6 jeltoqsandağı Germaniya eline memlekettik jwmıs saparı qarsañında jeltoqsannıñ 4-i  Deutsche Welle  nemis basılımınıñ tilşisi Janna Nemcovağa bergen swhbatında « Büginde jeke piket jasağanı üşin eşkim jazalanbaydı» degen bolatın. Sonday-aq bıltır küzdiñ basında memleket basşısı Toqaev Qazaqstan halqına arnağan joldauında «Halıq ünine qwlaq asatın memleket» twjırımdamasın tanıstırğan edi. Bwl «azamattardıñ barlıq sındarlı ötiniş-tilekterin jedel äri tiimdi qarastıratının» aytqan prezidenttiñ sözi men isiniñ teñdigi turalı qoğam pikiri är aluan. Toqaev twñğış joldauında:

«Bilik pen qoğam arasında twraqtı dialog ornatu arqılı ğana qazirgi geosayasi ahualğa beyimdelgen üylesimdi memleket qalıptastıruğa boladı. Sondıqtan azamattıq qoğamğa qoldau körsetip, onıñ äleuetin nığayta tüsu kerek. Sonday-aq, asa mañızdı jalpı memlekettik mindetterdi şeşu üşin talqılau jwmıstarına azamattıq qoğamnıñ mümkindikterin keñinen qoldanu qajet», – degen bolatın.

"The Qazaq Times"