ميتينگ قارساڭىندا دەمپارتيانىڭ بەلسەندىسىن ۇستاماق بولعان "قۇرىقشىلاردىڭ" ارەكەتىنەن. فوتو: الەۋمەتتىك جەلىدەن سكرين-قيىندى

بۇگىن تۇسكى ساعات 15:00 شاماسىندا الماتى قالاسىنىڭ ورتالىق كوشەلەرىنىڭ بىرىندە دەمپارتيا قۇرۋدى كوزدەيتىن باستاماشىل توپتىڭ بەلسەندى مۇشەسى جانبول راحماتۋللانى قۇقىق قورعاۋ ورگانىنىڭ ەكى وكىلى كۇش كورسەتىپ، ۇستاماق بولدى. كەشىكىسىن ساعات 18:07 كەزىندە پوليتسيا قورعاۋشى توپقا ايلاسىن اسىرىپ، اقىرى بەلسەندىنى ۇستاپ اكەتتى. 

گوگول جانە ناۋرىزباي باتىر كوشەلەرىنىڭ قيىلىسىندا بەلسەندىگە تاپ بەرگەن پوليتسەيلەردىڭ ارەكەتىن باستاماشى توپتىڭ جەتەكشىسى جانبولات ماماي مەن «جاس الاش» گازەتىنىڭ رەداكتورى ينگا يمانباي facebook جەلىسىندەگى جەكە پاراعىنان تىكەلەي ەفيردە بەينەتۇسىرىلىم جۇرگىزدى. بەينەجازبادان ازاماتتىق ەركىن فورماسىندا كيىنگەن ەكى پوليتسەي بەلسەندىگە بەرىلەتىن شاقىرتۋ قاعازىن ۇسىنباعانىن جانە ۇستاۋ سەبەبىن اشىپ ايتپاعانىن كورۋگە بولادى.

سوڭعى كەزدەرى «حالىق ۇنىنە قۇلاق اساتىن مەملەكەت» قۇرۋدى كوزدەيتىن پرەزيدەنت قاسىم-جومارت توقاەۆتىڭ ءسوز ەركىندىگىنە رۇقسات بەرەتىن كەپىلدىگى ميتينگ قارساڭىندا ءوز كۇشىن جوعالتا باستادى. Facebook جەلىسىندەگى ازاماتتىق باستاماعا  مونيتورينگ جۇرگىزۋشىسى #IHaveAChoiسe #ActivistsNotExtremists  جانە  ادام قۇقىعىن قورعاۋعا ارنالعان Qaharman توبى ميتينگ قارساڭىندا، اقپان ايىنىڭ  6-20 ارالىعىندا 15 قالاداعى 53 بەلسەندىگە پوليتسيا تاراپىنان ءارتۇرلى شارا قولدانىلعانىن جاريالادى.

الەۋمەتتىك جەلىلەردە ءبىرازدان بەرى ەكس-بانكير، قۋعىنداعى وپپوزيتسيالىق ساياساتكەر مۇحتار ءابليازوۆ جەتەكشىلىك ەتەتىن، ەلدە ەكسترەميستىك ۇيىم رەتىندە تانىلىپ،  قىزمەتىنە تىيىم سالىنعان «قازاقستاننىڭ دەموكراتيالىق تاڭداۋى»  قوزعالىسى ينتەرنەت ارقىلى ازاماتتاردى 22 اقپانعا جاپپاي ميتينگىگە شاقىرىپ كەلەدى. ءابليازوۆتىڭ جۇرتشىلىقتى ميتينگىگە ۇندەۋىمەن قاتار جارىسا پروفيلاكيكاعا قامداناتىن ءىىم قوعامدا «باسقاشا ويلايتىن» بەلسەندىلەردى ءارتۇرلى ايىپتارمەن ۇيدە نەمەسە يزولياتوردا قاماۋدا ۇستاۋدى ادەتكە اينالدىرعان.

سونداي-اق جانبولات ماماي باستاعان دەمپارتيانىڭ ۇيىمداستىرۋ توبى دا ەرتەڭ الماتى قالاسىنداعى استانا الاڭىندا بەيبىت ميتينگ وتكىزەتىنىن حابارلاعان بولاتىن.

كوپتەگەن بەلسەندىلەر اتالعان «سانكتسيالانباعان ميتينگ» قارساڭىندا جاۋاپقا تارتىلىپ جاتىر.

توقاەۆ وتكەن جىلى 5-6 جەلتوقسانداعى گەرمانيا ەلىنە مەملەكەتتىك جۇمىس ساپارى قارساڭىندا جەلتوقساننىڭ 4-ءى  Deutsche Welle  نەمىس باسىلىمىنىڭ ءتىلشىسى جاننا نەمتسوۆاعا بەرگەن سۇحباتىندا « بۇگىندە جەكە پيكەت جاساعانى ءۇشىن ەشكىم جازالانبايدى» دەگەن بولاتىن. سونداي-اق بىلتىر كۇزدىڭ باسىندا مەملەكەت باسشىسى توقاەۆ قازاقستان حالقىنا ارناعان جولداۋىندا «حالىق ۇنىنە قۇلاق اساتىن مەملەكەت» تۇجىرىمداماسىن تانىستىرعان ەدى. بۇل «ازاماتتاردىڭ بارلىق سىندارلى ءوتىنىش-تىلەكتەرىن جەدەل ءارى ءتيىمدى قاراستىراتىنىن» ايتقان پرەزيدەنتتىڭ ءسوزى مەن ءىسىنىڭ تەڭدىگى تۋرالى قوعام پىكىرى ءار الۋان. توقاەۆ تۇڭعىش جولداۋىندا:

«بيلىك پەن قوعام اراسىندا تۇراقتى ديالوگ ورناتۋ ارقىلى عانا قازىرگى گەوساياسي احۋالعا بەيىمدەلگەن ۇيلەسىمدى مەملەكەت قالىپتاستىرۋعا بولادى. سوندىقتان ازاماتتىق قوعامعا قولداۋ كورسەتىپ، ونىڭ الەۋەتىن نىعايتا ءتۇسۋ كەرەك. سونداي-اق، اسا ماڭىزدى جالپى مەملەكەتتىك مىندەتتەردى شەشۋ ءۇشىن تالقىلاۋ جۇمىستارىنا ازاماتتىق قوعامنىڭ مۇمكىندىكتەرىن كەڭىنەن قولدانۋ قاجەت»، – دەگەن بولاتىن.

"The Qazaq Times"