Oral qalasındağı eñ iri OSSO-nıñ biri «Sity Center». Foto: aşıq derekköz

22 aqpan ötui mümkin sankciyalanbağan miting qarsañında Oral qalasındağı eñ iri sauda ortalıq bir künge jwmısın toqtatpaq.

Bwl jöninde «Oral aptalığı» basılmı «City Center» OSSO-nıñ Instagram jelisindegi habarlamasına siltey otırıp habarladı . 2Gis navigatorınıñ deregi boyınşa, bügingi tañda ğimarattı 373 wyım jalğa aladı. Atap aytqanda onda qaladağı iri kinoteatr men balalar oyın-sauıq ortalığı ornalasqan, käsipkerlerge bir demalıs künin jwmıssız ötkizu zor şığın bolmaq.

«Äleumettik jelilerde 2020 jıldıñ 22 aqpanında «Sity Center» OSSO aumağında QDT qozğalısınıñ jaqtastarınıñ rwqsat etilmegen miting ötkizu turalı şaqıruı taray bastadı. «City Center» äkimşiligi öz tarapınan mwnday akciyanı müldem qoldamaytının mälimdeydi. Bizdiñ keşen qala halqınıñ demalısı men bos uaqıtın ötkizu ornı retinde qwrılğan, qandayda bir küşter bizdi öz qajetine paydalanuına qarsımız. Biz qwqıq qorğau organdarına twtınuşılar qauipsizdigi men müliktiñ qorğaluın qamtamasız etu turalı ötiniş jazdıq. Osığan baylanıstı «City Center» 22 aqpan 18.00-ge deyin jwmıs jasamaydı. Osı jağdayğa tüsinistikpen qarauıñızdı swraymız», – delingen qoğamdıq keşenniñ habarlamasında.

Sauda ortalığınıñ äkimşiligi şığındar turalı tüsinikteme beruden bas tartqan. Sarapşılar «azamattıq qoğamnıñ narazılığın «bülik», «büldirgi», «arandatu» retinde sipattauğa tırısudıñ astarında biliktiñ aytağı boluı ıqtimal» dep sanaydı.

Soñğı kezderi «Halıq ünine qwlaq asatın memleket» qwrudı közdeytin prezident Qasım-Jomart Toqaevtıñ söz erkindigine rwqsat beretin kepildigi miting qarsañında öz küşin joğalta bastadı. Facebook jelisindegi azamattıq bastamağa  monitoring jürgizuşisi #IHaveAChoise #ActivistsNotExtremists  jäne  adam qwqığın qorğauğa arnalğan Qaharman tobı miting qarsañında, aqpan ayınıñ  6-18 aralığında 11 qaladağı 35 belsendige policiya tarapınan ärtürli şara qoldanılğanın jariyaladı.

Äleumettik jelilerde birazdan beri eks-bankir, quğındağı oppoziciyalıq sayasatker Mwhtar Äblyazov jetekşilik etetin, elde ekstremistik wyım retinde tanılıp,  qızmetine tıyım salınğan «Qazaqstannıñ demokratiyalıq tañdauı»  qozğalısı internet arqılı azamattardı 22 aqpanğa jappay mitingige şaqırıp keledi. Äblyazovtiñ jwrtşılıqtı mitingige ündeuimen qatar jarısa profilakikağa qamdanatın İİM qoğamda «basqaşa oylaytın» belsendilerdi ärtürli ayıptarmen üyde nemese izolyatorda qamauda wstaudı ädetke aynaldırğan.

Aytpaqşı, bwl küni Dempartiya qwrudı közdeytin bastamaşıl toptıñ jetekşisi belsendi Janbolat Mamay bastağan qozğalıs jaqtastarı da mitingke şığatının mälimdegen.

Köptegen belsendiler atalğan «sankciyalanbağan miting» qarsañında jauapqa tartılıp jatır.

Toqaev ötken jılı 5-6 jeltoqsandağı Germaniya eline memlekettik jwmıs saparı qarsañında jeltoqsannıñ 4-i  Deutsche Welle  nemis basılımınıñ tilşisi Janna Nemcovağa bergen swhbatında « Büginde jeke piket jasağanı üşin eşkim jazalanbaydı» degen bolatın. Sonday-aq bıltır küzdiñ basında memleket basşısı Toqaev Qazaqstan halqına arnağan joldauında «Halıq ünine qwlaq asatın memleket» twjırımdamasın tanıstırğan edi. Bwl «azamattardıñ barlıq sındarlı ötiniş-tilekterin jedel äri tiimdi qarastıratının» aytqan prezidenttiñ sözi men isiniñ teñdigi turalı qoğam pikiri är aluan. Toqaev twñğış joldauında:

«Bilik pen qoğam arasında twraqtı dialog ornatu arqılı ğana qazirgi geosayasi ahualğa beyimdelgen üylesimdi memleket qalıptastıruğa boladı. Sondıqtan azamattıq qoğamğa qoldau körsetip, onıñ äleuetin nığayta tüsu kerek. Sonday-aq, asa mañızdı jalpı memlekettik mindetterdi şeşu üşin talqılau jwmıstarına azamattıq qoğamnıñ mümkindikterin keñinen qoldanu qajet», – degen bolatın.

“The Qazaq Times”