ميتينگتەن قاۋىپتەنگەن ورالداعى ساۋدا ورتالىعى دەمالىس كۇنگى جۇمىسىن توقتاتپاق

22 اقپان ءوتۋى مۇمكىن سانكتسيالانباعان ميتينگ قارساڭىندا ورال قالاسىنداعى ەڭ ءىرى ساۋدا ورتالىق ءبىر كۇنگە جۇمىسىن توقتاتپاق.

بۇل جونىندە «ورال اپتالىعى» باسىلمى «City Center» وسسو-نىڭ Instagram جەلىسىندەگى حابارلاماسىنا سىلتەي وتىرىپ حابارلادى . 2Gis ناۆيگاتورىنىڭ دەرەگى بويىنشا، بۇگىنگى تاڭدا عيماراتتى 373 ۇيىم جالعا الادى. اتاپ ايتقاندا وندا قالاداعى ءىرى كينوتەاتر مەن بالالار ويىن-ساۋىق ورتالىعى ورنالاسقان، كاسىپكەرلەرگە ءبىر دەمالىس كۇنىن جۇمىسسىز وتكىزۋ زور شىعىن بولماق.

«الەۋمەتتىك جەلىلەردە 2020 جىلدىڭ 22 اقپانىندا «سity Center» وسسو اۋماعىندا قدت قوزعالىسىنىڭ جاقتاستارىنىڭ رۇقسات ەتىلمەگەن ميتينگ وتكىزۋ تۋرالى شاقىرۋى تاراي باستادى. «City Center» اكىمشىلىگى ءوز تاراپىنان مۇنداي اكتسيانى مۇلدەم قولدامايتىنىن مالىمدەيدى. ءبىزدىڭ كەشەن قالا حالقىنىڭ دەمالىسى مەن بوس ۋاقىتىن وتكىزۋ ورنى رەتىندە قۇرىلعان، قاندايدا ءبىر كۇشتەر ءبىزدى ءوز قاجەتىنە پايدالانۋىنا قارسىمىز. ءبىز قۇقىق قورعاۋ ورگاندارىنا تۇتىنۋشىلار قاۋىپسىزدىگى مەن مۇلىكتىڭ قورعالۋىن قامتاماسىز ەتۋ تۋرالى ءوتىنىش جازدىق. وسىعان بايلانىستى «City Center» 22 اقپان 18.00-گە دەيىن جۇمىس جاسامايدى. وسى جاعدايعا تۇسىنىستىكپەن قاراۋىڭىزدى سۇرايمىز»، – دەلىنگەن قوعامدىق كەشەننىڭ حابارلاماسىندا.

ساۋدا ورتالىعىنىڭ اكىمشىلىگى شىعىندار تۋرالى تۇسىنىكتەمە بەرۋدەن باس تارتقان. ساراپشىلار «ازاماتتىق قوعامنىڭ نارازىلىعىن «بۇلىك»، «بۇلدىرگى»، «ارانداتۋ» رەتىندە سيپاتتاۋعا تىرىسۋدىڭ استارىندا بيلىكتىڭ ايتاعى بولۋى ىقتيمال» دەپ سانايدى.

سوڭعى كەزدەرى «حالىق ۇنىنە قۇلاق اساتىن مەملەكەت» قۇرۋدى كوزدەيتىن پرەزيدەنت قاسىم-جومارت توقاەۆتىڭ ءسوز ەركىندىگىنە رۇقسات بەرەتىن كەپىلدىگى ميتينگ قارساڭىندا ءوز كۇشىن جوعالتا باستادى. Facebook جەلىسىندەگى ازاماتتىق باستاماعا  مونيتورينگ جۇرگىزۋشىسى #IHaveAChoiسe #ActivistsNotExtremists  جانە  ادام قۇقىعىن قورعاۋعا ارنالعان Qaharman توبى ميتينگ قارساڭىندا، اقپان ايىنىڭ  6-18 ارالىعىندا 11 قالاداعى 35 بەلسەندىگە پوليتسيا تاراپىنان ءارتۇرلى شارا قولدانىلعانىن جاريالادى.

الەۋمەتتىك جەلىلەردە ءبىرازدان بەرى ەكس-بانكير، قۋعىنداعى وپپوزيتسيالىق ساياساتكەر مۇحتار ءابليازوۆ جەتەكشىلىك ەتەتىن، ەلدە ەكسترەميستىك ۇيىم رەتىندە تانىلىپ،  قىزمەتىنە تىيىم سالىنعان «قازاقستاننىڭ دەموكراتيالىق تاڭداۋى»  قوزعالىسى ينتەرنەت ارقىلى ازاماتتاردى 22 اقپانعا جاپپاي ميتينگىگە شاقىرىپ كەلەدى. ءابليازوۆتىڭ جۇرتشىلىقتى ميتينگىگە ۇندەۋىمەن قاتار جارىسا پروفيلاكيكاعا قامداناتىن ءىىم قوعامدا «باسقاشا ويلايتىن» بەلسەندىلەردى ءارتۇرلى ايىپتارمەن ۇيدە نەمەسە يزولياتوردا قاماۋدا ۇستاۋدى ادەتكە اينالدىرعان.

ايتپاقشى، بۇل كۇنى دەمپارتيا قۇرۋدى كوزدەيتىن باستاماشىل توپتىڭ جەتەكشىسى بەلسەندى جانبولات ماماي باستاعان قوزعالىس جاقتاستارى دا ميتينگكە شىعاتىنىن مالىمدەگەن.

كوپتەگەن بەلسەندىلەر اتالعان «سانكتسيالانباعان ميتينگ» قارساڭىندا جاۋاپقا تارتىلىپ جاتىر.

توقاەۆ وتكەن جىلى 5-6 جەلتوقسانداعى گەرمانيا ەلىنە مەملەكەتتىك جۇمىس ساپارى قارساڭىندا جەلتوقساننىڭ 4-ءى  Deutsche Welle  نەمىس باسىلىمىنىڭ ءتىلشىسى جاننا نەمتسوۆاعا بەرگەن سۇحباتىندا « بۇگىندە جەكە پيكەت جاساعانى ءۇشىن ەشكىم جازالانبايدى» دەگەن بولاتىن. سونداي-اق بىلتىر كۇزدىڭ باسىندا مەملەكەت باسشىسى توقاەۆ قازاقستان حالقىنا ارناعان جولداۋىندا «حالىق ۇنىنە قۇلاق اساتىن مەملەكەت» تۇجىرىمداماسىن تانىستىرعان ەدى. بۇل «ازاماتتاردىڭ بارلىق سىندارلى ءوتىنىش-تىلەكتەرىن جەدەل ءارى ءتيىمدى قاراستىراتىنىن» ايتقان پرەزيدەنتتىڭ ءسوزى مەن ءىسىنىڭ تەڭدىگى تۋرالى قوعام پىكىرى ءار الۋان. توقاەۆ تۇڭعىش جولداۋىندا:

«بيلىك پەن قوعام اراسىندا تۇراقتى ديالوگ ورناتۋ ارقىلى عانا قازىرگى گەوساياسي احۋالعا بەيىمدەلگەن ۇيلەسىمدى مەملەكەت قالىپتاستىرۋعا بولادى. سوندىقتان ازاماتتىق قوعامعا قولداۋ كورسەتىپ، ونىڭ الەۋەتىن نىعايتا ءتۇسۋ كەرەك. سونداي-اق، اسا ماڭىزدى جالپى مەملەكەتتىك مىندەتتەردى شەشۋ ءۇشىن تالقىلاۋ جۇمىستارىنا ازاماتتىق قوعامنىڭ مۇمكىندىكتەرىن كەڭىنەن قولدانۋ قاجەت»، – دەگەن بولاتىن.

“The Qazaq Times”