Qañtardıñ ayağında bastalğan şeteldik kölikterdi tirkeu mäselesinen tağı da jik şıqtı. Bwl jolı Armeniyanıñ memlekettik kirister komiteti qazaqstandıqtarğa eskertu jasadı.

Endi Armeniyağa köligin tirkeuden şığaruğa barğan azamattar mülik salığın töleui tiis. Eger biıl salıq tölemese, kelesi jılı olarğa ayıppwl salınbaq. Armeniya tarapınan resmi ökil: «Mülik salığın töleu üşin onlayn-platforma qwru bastaması köterildi. Degenmen, bwl joba jüzege aspasa nemese keyin iske qosılsa da mülik salığın töleu mindeti saqtaladı. Armeniyağa köligin tirkeuden şığaruğa kelgen azamattar borışın ötemey mwnı istey almaydı. Eger biıl salıq tölemese, kelesi jılı olarğa ayıppwl salınadı», – dep habarladı.

Biıl qañtar ortasında İşki ister ministrligi Qazaqstan aumağında jürgenine bir jıl bolğan, biraq esepke twrmağan kölik ielerine eskertu jasap, zañdı tirkeuge qoyuğa şaqırğan. Osıdan keyin Aqtau, Aqtöbe, Jañaözen, Oral, Semey, Petropavl qalalarında tirkelmegen kölik ieleri jinalıp, narazılıq bildirdi. Sebebi Qazaqstanğa äkelgen kölikti tirkeu tım qımbat: tirkeu qwnı kölik bağasınan da asıp jığıladı. Al Resey, Armeniya men Qırğızstannıñ jalauı bar avtokölikter jol jüru erejesin jii bwzatının aytqan  bilik tirkelmegen kölikter jauapkerşilikten jaltaradı dep esepteydi.

Soñğı üş jılda EAEO elderinen 200 mıñğa tarta kölik Qazaqstanğa kirgizilgen. Biraq olardıñ bäri tügel tirkelmegen. Köbi tranzitpen kirse, birşama böligi osında jwmısqa kelgen azamattarğa tiesili bolıp otır. Tek 40 mıñı ğana zañdı türde tirkelgen. Resmi mälimetter boyınşa, ötken jılı Armeniyağa şetelden 189 mıñ avtokölik äkelingen. Olar üşin memleket qazınasına 146 million dollar mölşerinde kedendik salıq tölengen.

"The Qazaq Times"