Amerika Qwrama Ştattarınıñ joğarı lauazımdıları Qıtaydı amerikalıq qoğam men ükimet qwrılımdarına astırtın aralasıp otır dep ayıptap keledi. Qıtaydıñ aralasuı turalı AQŞ memlekettik hatşısı Mayk Pompeo qaytalay eskertu jasadı.

Bir kün bwrın Fox Business Channel telearnasındağı bağdarlamağa qatısqan Pompeo Qıtaydıñ amerikalıq qoğam men ükimet qwrılımına astırtın äser etuge wmtılıp jatqanın, al amerikalıqtar bwnı tereñ sezine bermeytinin ayttı. Ol sonday-aq amerikalıqtardıñ bwnday salğırttığı Qıtayğa ülken mümkindik beredi degen pikirin ortağa saldı.

AQŞ memlekettik hatşısınıñ aytuınşa Qıtay kompartiyasınıñ AQŞ-qa kiligui bilim beru jäne akademiyalıq salalardı da qamtıp otır. Ol Qıtayda Konfuciy institutı jäne «Mıñ darındı» qatarlı bağdarlamaları bar ekenin alğa tarttı. «Biz bwlar arqılı Qıtay kommunistik partiyasınıñ AQŞ-ta jwmıs isteuine mümkindik beruge mäjbür bolıp otırmız. Biraq bizde mwnday äreketterdi Qıtayda da özara teñ negizde jasauğa mümkindigimiz joq», – degen Mayk Pompeo.

Ötken ayda Garvard universiteti himiya kafedrasınıñ meñgeruşisi Çarl'z M. Leyber twtqınğa alınıp, bükil akademiyalıq qauımdastıqtı dür silkindirgen edi. AQŞ Ädilet departamenti Leyberdi Qıtaydıñ «Mıñ darındı» bağdarlamasına qatısqanın, AQŞ Qorğanıs ministrligi men Wlttıq densaulıq saqtau instituttarına (NIH) jalğan mälimdemeler bergenin ayttı. Qıtaydıñ atalğan bağdarlamasına qatısqanı üşin bwdan bwrında birqatar amerikalıq ğalımdar qamauğa alınğan bolatın.

AQŞ memlekettik hatşısı swhbatında: «Biz amerikalıq ğalımdardı, amerikalıq ziyatkerlik menşikti jäne amerikalıq jañaşıldardı qamtamasız etuimiz kerek, olardı Qıtay kommunistik partiyasınıñ aralasuınan qorğauımız kerek», – degen pikirin ayttı.

Ötken senbide Pompeo Qwrama Ştattardıñ gubernatorları bas qosqan jinalısta ştat gubernatorlarına osı mäselege baylanıstı eskertu jasağan edi. Ol Amerika Qwrama Ştattarı federaldı, ştattıq jäne jergilikti deñgeyde Qıtaymen bäsekelesetinin, nätijesinde bwl AQŞ-tıñ sırtqı sayasatına jäne wlttıq qauipsizdigine äser etip jatqanın aytqan.

“The Qazaq Times”