امەريكا قۇراما شتاتتارىنىڭ جوعارى لاۋازىمدىلارى قىتايدى امەريكالىق قوعام مەن ۇكىمەت قۇرىلىمدارىنا استىرتىن ارالاسىپ وتىر دەپ ايىپتاپ كەلەدى. قىتايدىڭ ارالاسۋى تۋرالى اقش مەملەكەتتىك حاتشىسى مايك پومپەو قايتالاي ەسكەرتۋ جاسادى.

ءبىر كۇن بۇرىن Fox Business Channel تەلەارناسىنداعى باعدارلاماعا قاتىسقان پومپەو قىتايدىڭ امەريكالىق قوعام مەن ۇكىمەت قۇرىلىمىنا استىرتىن اسەر ەتۋگە ۇمتىلىپ جاتقانىن، ال امەريكالىقتار بۇنى تەرەڭ سەزىنە بەرمەيتىنىن ايتتى. ول سونداي-اق امەريكالىقتاردىڭ بۇنداي سالعىرتتىعى قىتايعا ۇلكەن مۇمكىندىك بەرەدى دەگەن پىكىرىن ورتاعا سالدى.

اقش مەملەكەتتىك حاتشىسىنىڭ ايتۋىنشا قىتاي كومپارتياسىنىڭ اقش-قا كيلىگۋى ءبىلىم بەرۋ جانە اكادەميالىق سالالاردى دا قامتىپ وتىر. ول قىتايدا كونفۋتسي ينستيتۋتى جانە «مىڭ دارىندى» قاتارلى باعدارلامالارى بار ەكەنىن العا تارتتى. «ءبىز بۇلار ارقىلى قىتاي كوممۋنيستىك پارتياسىنىڭ اقش-تا جۇمىس ىستەۋىنە مۇمكىندىك بەرۋگە ءماجبۇر بولىپ وتىرمىز. بىراق بىزدە مۇنداي ارەكەتتەردى قىتايدا دا ءوزارا تەڭ نەگىزدە جاساۋعا مۇمكىندىگىمىز جوق»، – دەگەن مايك پومپەو.

وتكەن ايدا گارۆارد ۋنيۆەرسيتەتى حيميا كافەدراسىنىڭ مەڭگەرۋشىسى چارلز م. لەيبەر تۇتقىنعا الىنىپ، بۇكىل اكادەميالىق قاۋىمداستىقتى ءدۇر سىلكىندىرگەن ەدى. اقش ادىلەت دەپارتامەنتى لەيبەردى قىتايدىڭ «مىڭ دارىندى» باعدارلاماسىنا قاتىسقانىن، اقش قورعانىس مينيسترلىگى مەن ۇلتتىق دەنساۋلىق ساقتاۋ ينستيتۋتتارىنا (NIH) جالعان مالىمدەمەلەر بەرگەنىن ايتتى. قىتايدىڭ اتالعان باعدارلاماسىنا قاتىسقانى ءۇشىن بۇدان بۇرىندا بىرقاتار امەريكالىق عالىمدار قاماۋعا الىنعان بولاتىن.

اقش مەملەكەتتىك حاتشىسى سۇحباتىندا: «ءبىز امەريكالىق عالىمداردى، امەريكالىق زياتكەرلىك مەنشىكتى جانە امەريكالىق جاڭاشىلداردى قامتاماسىز ەتۋىمىز كەرەك، ولاردى قىتاي كوممۋنيستىك پارتياسىنىڭ ارالاسۋىنان قورعاۋىمىز كەرەك»، – دەگەن پىكىرىن ايتتى.

وتكەن سەنبىدە پومپەو قۇراما شتاتتاردىڭ گۋبەرناتورلارى باس قوسقان جينالىستا شتات گۋبەرناتورلارىنا وسى ماسەلەگە بايلانىستى ەسكەرتۋ جاساعان ەدى. ول امەريكا قۇراما شتاتتارى فەدەرالدى، شتاتتىق جانە جەرگىلىكتى دەڭگەيدە قىتايمەن باسەكەلەسەتىنىن، ناتيجەسىندە بۇل اقش-تىڭ سىرتقى ساياساتىنا جانە ۇلتتىق قاۋىپسىزدىگىنە اسەر ەتىپ جاتقانىن ايتقان.

“The Qazaq Times”