QazForum turalı wyımdastıruşı top ne deydi?

7 aqpan astanada qazaq tilinde onlayn kontent jasauşılarğa arnalğan QazForum IV media jiını ötti. Jiın qamtığan taqırıptar qoğam arasında QazForum köp forumnıñ birine aynalmadı ma degen sıni swraq tudırğan edi. Forumnıñ qwrıltayşısı Qazaqstandağı AQŞ elşiligi. Wyımdastıruşı – Qazaqstan baspasöz klubı. QazForum wyımdastıru komitetine ötken aptada, sıni köqaras küşeygen twsta joldanğan saualımızğa jauap keşigip jetse de nazarlarıñızğa wsınamız. 

QT: Osımen 4-şi märte wyımdastırılıp jatqan Qazforum jobasın wyımdastırudağı negizgi maqsat pen onda qanday taqırıptar köteriledi?

– QazForum - qazaq tildi onlayn medianı damıtuğa, kontenttiñ sapasın arttıruğa jäne ğalamtor jelisiniñ qazaq tildi segmentindegi özekti mäselelerdi şeşu joldarın izdestiruge bağıttalğan iri respublikalıq konferenciya. Biılğı jılı Forum «Özgeris kezeñindegi sın men şın» taqırıbına ötkizildi.

Forum ayasında qazirgi zamanğı medianıñ özekti mäseleleri qaraldı, atap aytqanda, qatısuşılar qazaq qoğamına qanday media qajet ekenin jäne olardıñ digital däuirindegi röli qanday ekenin anıqtauğa tırıstı, jaña onjıldıqta media narıqtıñ qazaq tildi segmentiniñ bäsekege qabilettiligin arttırudıñ negizgi mäseleleri talqılandı. YouTube-tağı qazaq tildi segmentin monetizaciyalau mäselelerine erekşe nazar audarıldı.

Forum barısında Ortalıq Aziya elderinde (Qazaqstan,Täjikstan, Özbekstan) media twtınu jäne media sauatsızdılığı boyınşa äleumettik zertteu nätijeleri tanıstırıldı.

Forumnıñ sekciyalarında kelesi taqırıptar boyınşa şeberliñ sabaqtar wsınıldı:

- Youtube platformasında jwmıs jürgizu: öz kontentin ilgeriletu üşin jurnalist neni bilui qajet;

- Aqparattı qalay dwrıs taldau qajet jäne memlekettik satıp alu saytında ne närsege män bergen jön.

Sonday-aq, forum seriktesteriniñ prezentaciyaları ötkizildi, onda olar qazaq tildi onlayn-kontent jasauşılarımen özara qarım-qatınas turalı ayttı.

Forummen qatar dünie jüzinde tanımal National Geographic körmesi ötti.

Forumnıñ tolıq bağdarlamasımen sayt arqılı tanısuğa boladı.

QT: Forumğa azamattıq jurnalistika men demokratiyalıq qwndılıqtardı ornatuğa, aşıq qoğam qalıptastıruğa atsalısıp, ün qosıp kele jatqan belgili platformalar nelikten şaqırıla bermeydi? Mäselen, halıqaralıq jäne el işi jañalıqtarın üzdiksiz ob'ektivti türde berip kele jatqan birqatar sayttar eskerusiz qalıp qoyıp jatadı.

– Forum qazaq tildi onlayn kontent jasauşılardıñ barlığına aşıq. Forum qazaq tildi onlayn kontentti jasauşılar: tilşiler men sayt redaktorları, blogerler men vlogerlerge arnalğan.

Elimizdiñ aqparattıq portaldarında, sonday-aq forum wyımdastıruşılarınıñ resmi paraqşalarında forumnıñ ötkizilui turalı mälimet aldın ala jariyalandı. Wyımdastıruşılar barlıq BAQ ökilderine arnayı aqparat taratudı jürgizdi.

Biıl forumnıñ wyımdastıru komitetine 500-den astam ötinim kelip tüsti, biraq zaldağı orın sanı şekteuli boluına baylanıstı, olardıñ tek 250 ğana maqwldandı.

Jıl sayın wyımdastıruşılar Forumğa qatısuşılardı oblıstardan şaqıruğa erekşe köñil böledi. Osı jılı forumğa elorda, Almatı jäne Şımkent qalalarınan basqa elimizdiñ 11 oblısınan qazaq tildi onlayn kontent jasauşıları qatıstı.

Qatısuşılardı irikteu kezinde wyımdastıruşılar qatısuşı saytınıñ qazaq tilindegi nwsqasınıñ boluına, sonday-aq sayttıñ jañalıqtarı  taspasınıñ jañartılu jiiligine nazar audardı. Blogerler men vlogerlerdi irikteu kezinde olardıñ äleumettik jelilerdegi paraqşalarınıñ jazılımdar sanı eskerildi.

Qatısa almağandar üşin Youtube arnasında forum onlayn körsetilip, körermender sanı 700-ge juıq boldı.

Swrağıñızda belgilengen Forum jwmısına qanday BAQ ökilderi qatısa almağanıñ naqtılaudı ötinemiz.

QT: Wyımdastıruşılardıñ jwmıs isteu nwsqaulığı qanday, forumğa taraptardıñ qatısu-qatıspauın kim qanday kriteriyler boyınşa anıqtaydı?

– Forum qazaq tildi onlayn kontent jasauşılardıñ barlığına aşıq, qatısuı tegin. Qatısuğa niet bildiruşilerdiñ barlığı forum saytında (https://fkoc.kz/) tirkelu mümkindigine ie boldı. Onıñ üstine barlıq BAQ ökilderine hat jiberilip, mälimet jetkizildi.

QT: Qazaq tilindegi sayttardıñ mäselelerin talqılap, onı şeşuge arnalğan forumnıñ büginge deyin qol jetkizgen nätijesi qanday, naqtı qanday şeşimder jolğa qoyıldı?

– Forumnıñ negizgi nätijeleri:

- 4 jıl işinde Forum elimizdiñ qazaq tildi onlayn kontent jasauşıların biriktiretin iri respublikalıq konferenciyağa aynaldı;

- 2018 jılğı Forum ayasında etika turalı memorandum jasau kerektigi turalı söz köterildi;

- «İskerlik jurnalistika» kitabınıñ ideyası forum ayasında tudı;

- Jıldan-jılğa Forum turalı biletin jurnalister sanı köbeyude. Biıl Forumnan keyin öñirlik BAQ ökilderiniñ käsibi sauattılığın arttıruğa bağıttalğan arnayı  treningter ötkizudi josparlap otırmız;

- Forum ayasında taldau zertteuleri men saualnama jürgiziledi. Mısalı, biılğı forumda  media trener Ashat Erkimbay "Media twtınu jäne mediasauat boyınşa zertteu nätijeleri" taqırıbında saraptamalıq zertteu jürgizdi.

- 2018 jıldan bastap qatısuşılardıñ käsibi biliktiligiñ arttıruğa bağıttalğan arnayı şeberlik sabaqtar ötedi.

QT: Bwl jolğı forumnıñ taqırıbı men kötergen mäselesiniñ bwrınğı jiındardan ayırmaşılığı nede? Forum taqırıbı qanday zertteuler qorıtındısı negizinde qalay, qanday kriteriylermen ayqındaladı? 

– Biıl forumda qazaq onlayn kontent jasauşılardıñ tabıs tabu joldarı köp talqılandı. Forumnıñ taqırıbı men mazmwnı  aldın ala talqılauğa arnalğan jwmıs tobı qwrılğan, onıñ işinde bilikti mediasarapşılar men blogerler bar. Olar taqırıptı tañdauda qazaq tilinde sapalı kontent jasauşılardıñ özekti mäselelerin talqılaudı alğa qoyadı.

QT: Bwl elimizdegi dayım ötip kele jatqan iz-dereksiz situaciyalıq forumdardıñ qatarında qalıp qoymay ma?

– Joğarıda atalğan aqparattı eskere otırıp, Forumnıñ atqarılğan jwmısı mağınasız bolmaydı dep esepteymiz.

Bügingi tañda Forum - auqımı keñ, twraqtı auditoriyası bar iri respublikalıq konferenciya bolıp tabıladı.

Elimizde jıl sayın köptegen forumdar ötkiziledi, olardıñ işinde Qazforum-nıñ ornı erekşe. Forumğa degen qazaq tildi BAQ ökilderinen swranıs pen qızığuşılıq joğarı. Osı jılı Forumğa tirkelgen 500 den astan ötinim oğan naqtı dälel.

QT: Jobanıñ qarjılıq byujeti är jılğa qalay jobalanadı?

– Qazaqstandağı AQŞ Elşiligi şağın granttar bayqauın jariyaladı jäne Qazaqstandıq Baspasöz klubı onı jeñip aldı. Forumnıñ jıl sayın demeuşilik kömek körsetetin seriktesteri bar.

“The Qazaq Times”