Qıtaydağı azamattıq belsendi Çın Çiyuşı üy qamaqqa alınğan. Foto:RFI

«Çın Çiyuşı qayda ketti?» Soñğı birneşe künde älem elderindegi jeli qoldanuşıları osı bir qıtay jurnaliske izdeu salıp jatır. Ol Gonkong dağdarısı kezinen bastap älemniñ birqatar eline tanımal bolğan. Äleumettik jeli qoldanuşıları onı beytarap aqparat taratuşı, azamattıq jurnalis retinde biledi.

Uhan qalasında tötenşe jağday jariyalanıp, qalağa karanitn qoyılğan kezde Çın Çiyuşı sol qalağa barıp, älem jwrtşılığına Uhanda ne bolıp jatqanı turalı anıq mälimet beru üşin barğanın bildirip video joldauın jasağan. Onıñ «Şi Jinpiñniñ (Qıtay basşısı) qayda ketkenin bilmeymin, al men Uhanğa keldim» degen sözi äleumettik jeli de keñ tarap ketken bolatın.

Bwdan 6 kün bwrın atalğan jurnalist iz-dereksiz joğalıp ketken. Oğan deyin jurnalis Uhandağı ortalıq emhanadan jäne özi twratın qonaq üyden är küni video mälimdemeler jasap twrğan bolatın. Al, bügin onıñ dosı äri YouTube jelisinde «Beyjiñdik jeke batır» degen laqap atpen belgili Qıtay azamatı tikeley efirde jurnalis Çındı qauipsizdik qızmetkerleri üy qamauına alğanın mälimdegen. Ol jäne dosınıñ densaulığı jaqsı ekenin ayta kelip, özinde bar barlıq mälimetti aytıp beru onıñ bas amandığına qauip töndiretinin aytqan.

Çın jariyalağan video joldaular YouTube jelisinde birneşe million . Sonday-aq, onıñ iz dereksiz ketui qıtay tildi jäne birqatar älem elderiniñ jeli qoldanuşıları arasında talqı taqırıbına aynalğan. Tipti, keybir jeli qoldanuşıları jurnalis Çın Çiyuşınıñ joğalıp ketui Qıtay ükimetiniñ älde neni jasırğısı kelgenin, mümkin virus jağdayı resmi mälimetterden älde qayda auır ekeninen derek beredi dep qaraydı.

“The Qazaq Times”