Körneki suret. Foto: aşıq derekköz

Qorday audanınıñ ortalıq auruhanasına keşegi atışulı wltaralıq sipatı bar delinetin qaqtığıstan köptegen zardap şeguşiler tüsip jatqanı habarlandı.

Otandıq BAQ-tıñ mälimetinşe, bügin auruhananıñ bas därigeri medicinalıq kömekke jüginuşilerdiñ köp bolğanın rastağan. Sonday-aq bas därigerler men mamandar tügel «renamaciya böliminde, hirurgiyalıq em-şaramen şwğıldanıp» jatır.

Keşe Jambıl oblısınıñ policiya departamenti Qorday audanına qarastı Masanşı auılında bolğan rezonans sipatındağı janjal turalı mälimdeme jasap, prezident Toqaev pikir bildirdi.

Policiya departamentiniñ tergeu basqarması taratqan habarğa qarağanda, jappay töbeleske qatıstı Qılmıstıq kodekstiñ 293-şi «bwzaqılıq» babımen tergeu isi bastalğan.

WhatsApp jäne Instagram äleumettik jelisinde tarağan videofragmentterde bülingen ğimarat, policiya kölikteri, audarılğan kölik, örtengen memlekettik mekeme ğimarattarı men twrğın üydiñ, qolına qaru wstağan toptı köruge boladı, sonday-aq tapanşanıñ dauısı estiledi.

Videodan policey qızmetkerine bağınbay, qol köterip qarsılasqan äldebir azamattıñ äreketin köruge boladı. Beyresmi derek közderi boyınşa oqiğa motivi aytılıp jür. El auzındağı bir nwsqada «jwma küni Masanşı auılında qazaq qariyağa birneşe düngen azamatınıñ qol kötergen soñ, tärtip saqşılarınıñ zañdı nwsqauına bağınbağan bwzaqılar janjal şığarğanı, soñı wltarazdıq qaqtığısqa wlasqanı» aytıluda.

Prezident Toqaevtıñ tapsırmasımen vice-prem'er Berdibek Saparbaev törağalıq etetin  ükimet komissiyası qwrıldı. Bas prokuratura men WQK iske kiristi.

Memleket basşısı ündeuinde «Bwl ahualdı arandatuşılar öz maqsatına paydalandı. Ökinişke qaray, bwl oqiğa kezinde adam şığını boldı. Men qaza bolğan azamattardıñ otbasılarına köñil aytamın. Zardap şekkenderdiñ tezirek sauığıp ketuine tilektespin. ...Jambıl oblısı äkimimen birlesip, qaza bolğandardı jerleu, zardap şekkenderge kömektesu jwmıstarın wyımdastıradı. Sonday-aq, jağdaydı twraqtandırumen aynalısadı. Qoğamdıq tärtipti bwzğandar anıqtalıp, qatañ jauapqa tartılatın boladı. Memleketimizdiñ müddesine ziyan keltiretin, bereke-birligimizdi bwzatın jäne jalğan aqparat taratqan azamattar zañ aldında jauap beredi», – dedi.

Jağdaydıñ kürdeleskeni sonşa, tipti Qorday audanına özge audannıñ policiya qızmetkerleri jwmıldırılğan. Äleumettik jelide tarağan derekterge süyensek, toptıq töbeles wltaralıq qaqtığısqa wlasqan boluı mümkin. Jergilikti jwrttıñ arasında tuğan janjaldıñ qandayda bir wltarazdıq sipatı barı jöninde resmi aqparat berilmedi.

Azamattıq qoğam ökilderi men sarapşı mamandar «jergilikti azamattardı, onıñ işinde qazaq jigitterin arandatuşı etip şığarmasa bolar edi» dep alañdauşılığın bildirip jatır. Mwnday jağdayda bilik ıntımaqtastıq pen birlik wğımın joğarı qoyatını anıq deydi köbi.

“The Qazaq Times”