ماسانشى وقيعاسى: اۋرۋحانادا جارالانعاندار كوپ، توقاەۆ قازا تاپقانداردىڭ بارىن راستادى

قورداي اۋدانىنىڭ ورتالىق اۋرۋحاناسىنا كەشەگى اتىشۋلى ۇلتارالىق سيپاتى بار دەلىنەتىن قاقتىعىستان كوپتەگەن زارداپ شەگۋشىلەر ءتۇسىپ جاتقانى حابارلاندى.

وتاندىق باق-تىڭ مالىمەتىنشە، بۇگىن اۋرۋحانانىڭ باس دارىگەرى مەديتسينالىق كومەككە جۇگىنۋشىلەردىڭ كوپ بولعانىن راستاعان. سونداي-اق باس دارىگەرلەر مەن ماماندار تۇگەل «رەناماتسيا بولىمىندە، حيرۋرگيالىق ەم-شارامەن شۇعىلدانىپ» جاتىر.

كەشە جامبىل وبلىسىنىڭ پوليتسيا دەپارتامەنتى قورداي اۋدانىنا قاراستى ماسانشى اۋىلىندا بولعان رەزونانس سيپاتىنداعى جانجال تۋرالى مالىمدەمە جاساپ، پرەزيدەنت توقاەۆ پىكىر ءبىلدىردى.

پوليتسيا دەپارتامەنتىنىڭ تەرگەۋ باسقارماسى تاراتقان حابارعا قاراعاندا، جاپپاي توبەلەسكە قاتىستى قىلمىستىق كودەكستىڭ 293-ءشى «بۇزاقىلىق» بابىمەن تەرگەۋ ءىسى باستالعان.

Whatsاpp جانە Instagram الەۋمەتتىك جەلىسىندە تاراعان ۆيدەوفراگمەنتتەردە بۇلىنگەن عيمارات، پوليتسيا كولىكتەرى، اۋدارىلعان كولىك، ورتەنگەن مەملەكەتتىك مەكەمە عيماراتتارى مەن تۇرعىن ءۇيدىڭ، قولىنا قارۋ ۇستاعان توپتى كورۋگە بولادى، سونداي-اق تاپانشانىڭ داۋىسى ەستىلەدى.

ۆيدەودان پوليتسەي قىزمەتكەرىنە باعىنباي، قول كوتەرىپ قارسىلاسقان الدەبىر ازاماتتىڭ ارەكەتىن كورۋگە بولادى. بەيرەسمي دەرەك كوزدەرى بويىنشا وقيعا ءموتيۆى ايتىلىپ ءجۇر. ەل اۋزىنداعى ءبىر نۇسقادا «جۇما كۇنى ماسانشى اۋىلىندا قازاق قارياعا بىرنەشە دۇنگەن ازاماتىنىڭ قول كوتەرگەن سوڭ، ءتارتىپ ساقشىلارىنىڭ زاڭدى نۇسقاۋىنا باعىنباعان بۇزاقىلار جانجال شىعارعانى، سوڭى ۇلتارازدىق قاقتىعىسقا ۇلاسقانى» ايتىلۋدا.

پرەزيدەنت توقاەۆتىڭ تاپسىرماسىمەن ۆيتسە-پرەمەر بەردىبەك ساپارباەۆ توراعالىق ەتەتىن  ۇكىمەت كوميسسياسى قۇرىلدى. باس پروكۋراتۋرا مەن ۇقك ىسكە كىرىستى.

مەملەكەت باسشىسى ۇندەۋىندە «بۇل احۋالدى ارانداتۋشىلار ءوز ماقساتىنا پايدالاندى. وكىنىشكە قاراي، بۇل وقيعا كەزىندە ادام شىعىنى بولدى. مەن قازا بولعان ازاماتتاردىڭ وتباسىلارىنا كوڭىل ايتامىن. زارداپ شەككەندەردىڭ تەزىرەك ساۋىعىپ كەتۋىنە تىلەكتەسپىن. ...جامبىل وبلىسى اكىمىمەن بىرلەسىپ، قازا بولعانداردى جەرلەۋ، زارداپ شەككەندەرگە كومەكتەسۋ جۇمىستارىن ۇيىمداستىرادى. سونداي-اق، جاعدايدى تۇراقتاندىرۋمەن اينالىسادى. قوعامدىق ءتارتىپتى بۇزعاندار انىقتالىپ، قاتاڭ جاۋاپقا تارتىلاتىن بولادى. مەملەكەتىمىزدىڭ مۇددەسىنە زيان كەلتىرەتىن، بەرەكە-بىرلىگىمىزدى بۇزاتىن جانە جالعان اقپارات تاراتقان ازاماتتار زاڭ الدىندا جاۋاپ بەرەدى»، – دەدى.

جاعدايدىڭ كۇردەلەسكەنى سونشا، ءتىپتى قورداي اۋدانىنا وزگە اۋداننىڭ پوليتسيا قىزمەتكەرلەرى جۇمىلدىرىلعان. الەۋمەتتىك جەلىدە تاراعان دەرەكتەرگە سۇيەنسەك، توپتىق توبەلەس ۇلتارالىق قاقتىعىسقا ۇلاسقان بولۋى مۇمكىن. جەرگىلىكتى جۇرتتىڭ اراسىندا تۋعان جانجالدىڭ قاندايدا ءبىر ۇلتارازدىق سيپاتى بارى جونىندە رەسمي اقپارات بەرىلمەدى.

ازاماتتىق قوعام وكىلدەرى مەن ساراپشى ماماندار «جەرگىلىكتى ازاماتتاردى، ونىڭ ىشىندە قازاق جىگىتتەرىن ارانداتۋشى ەتىپ شىعارماسا بولار ەدى» دەپ الاڭداۋشىلىعىن ءبىلدىرىپ جاتىر. مۇنداي جاعدايدا بيلىك ىنتىماقتاستىق پەن بىرلىك ۇعىمىن جوعارى قوياتىنى انىق دەيدى كوبى.

“The Qazaq Times”