Berlinde ötken Liviya isi jönindegi sammit kezinde Britaniya bas uäziri (prem'er-ministri) Boris Jonson men Resey prezidenti Vladimir Putin eki jaqtı kezdesu ötkizdi. Bwl Jonsonnıñ Britaniya ükimetine basşı bolğannan beri Resey liderimen alğaş ret kezdesui.

Eki el basşısınıñ kezdesui turalı BBC taratqan habarğa qarağanda, kezdesu kezinde Jonson «britaniyalıq biliktiñ Solsberi turalı wstanımı äli de özgermegenin, bwl tıyım salınğan himiyalıq qarudı zañsız paydalanu dep biletinin, sonday-aq, odan britandıq jazıqsız azamattar zardap şekti degen wstanımda ekenin» jetkizgen.

Boris Jonsonnıñ baspasöz qızmeti taratqan resmi mälimette: «Prem'er-ministri Resey Britaniya men bizdiñ odaqtastarğa qorqınış tudırğan jäne azamattardıñ qauipsizdigi men wlttıq qauipsizdigimizge qauip töndirgen bwzaqılıq äreketterin toqtatpayınşa eki eldiñ mämilesi qalpına kelmeytinin jetkizdi», – delingen.

Al, Resey prezidentiniñ resmi saytında Britan bas uäzirimen kezdesu turalı qısqaşa ğana mälimet bar. Onda «ekijaqtı kezdesude qos taraptıñ mämileleri, halıqaralıq mäseleler jäne Liviya taqırıbında talqı bolğanı» aytıladı.

Britaniya men Reseydiñ arasına tüsken salqındıq

Esteriñizde bolsa, bwdan eki jıl bwrın Britaniya jerinde bwrınğı Resey tıñşısı Sergey Skripal men onıñ qızı belgisiz zattan ulanğan, bwl is boyınşa London biligi Mäskeudi ayıptap, Reseydiñ 23 diplomatın elinen quıp edi. Ağılşın aralındağı orıs elşiligi taratqan mälimette dimlomattar jäne olardıñ otbası müşeleri bolıp sol retki ayıptaudan keyin 80-ge juıq reseylik Britaniyadan şığıp ketken eken.

Oqiğadan bir apta ötkennen keyin sol kezde ağılşın bas uäziri Tereza Mey Skripaldıñ reseylik äskeri zerthanadan şıqqan ulı zattan ulanğan degen qorıtındı jariyaladı. Sonımen birge, bwl qol saludıñ artında Mäskeu twrğan boluı mümkin dep eskertti. Keyin osı qastandıq isine «Aleksandr Petrov» jäne «Ruslan Boşirov» degen atpen Britaniyağa kirgen eki reseyliktiñ qatısı bar jäne olar orıs şalğın qızmetiniñ adamdarı dep körsetti. Öz kezeginde Mäskeu Londonnıñ ayıptauın joqqa şığarğan bolatın. Soğan qaramastan ağılşın parlamenti ayıptauğa tolıq dälelimiz bar desken. Mine osı oqiğadan keyin Resey men Britaniya arasında kirbeñdik tüsip, eki el qatınası äli de salqın küyin saqtap kele jatır.

“The Qazaq Times”