بريتانيا: رەسەي بۇزاقىلىق ارەكەتىن توقتاتپاي، ەكى ەل قاتىناسى قالپىنا كەلمەيدى

بەرليندە وتكەن ليۆيا ءىسى جونىندەگى سامميت كەزىندە بريتانيا باس ءۋازىرى (پرەمەر-ءمينيسترى) بوريس جونسون مەن رەسەي پرەزيدەنتى ۆلاديمير پۋتين ەكى جاقتى كەزدەسۋ وتكىزدى. بۇل جونسوننىڭ بريتانيا ۇكىمەتىنە باسشى بولعاننان بەرى رەسەي ليدەرىمەن العاش رەت كەزدەسۋى.

ەكى ەل باسشىسىنىڭ كەزدەسۋى تۋرالى BBC تاراتقان حابارعا قاراعاندا، كەزدەسۋ كەزىندە جونسون «بريتانيالىق بيلىكتىڭ سولسبەري تۋرالى ۇستانىمى ءالى دە وزگەرمەگەنىن، بۇل تىيىم سالىنعان حيميالىق قارۋدى زاڭسىز پايدالانۋ دەپ بىلەتىنىن، سونداي-اق، ودان بريتاندىق جازىقسىز ازاماتتار زارداپ شەكتى دەگەن ۇستانىمدا ەكەنىن» جەتكىزگەن.

بوريس جونسوننىڭ ءباسپاسوز قىزمەتى تاراتقان رەسمي مالىمەتتە: «پرەمەر-ءمينيسترى رەسەي بريتانيا مەن ءبىزدىڭ وداقتاستارعا قورقىنىش تۋدىرعان جانە ازاماتتاردىڭ قاۋىپسىزدىگى مەن ۇلتتىق قاۋىپسىزدىگىمىزگە قاۋىپ توندىرگەن بۇزاقىلىق ارەكەتتەرىن توقتاتپايىنشا ەكى ەلدىڭ مامىلەسى قالپىنا كەلمەيتىنىن جەتكىزدى»، – دەلىنگەن.

ال، رەسەي پرەزيدەنتىنىڭ رەسمي سايتىندا بريتان باس ۋازىرىمەن كەزدەسۋ تۋرالى قىسقاشا عانا مالىمەت بار. وندا «ەكىجاقتى كەزدەسۋدە قوس تاراپتىڭ مامىلەلەرى، حالىقارالىق ماسەلەلەر جانە ليۆيا تاقىرىبىندا تالقى بولعانى» ايتىلادى.

بريتانيا مەن رەسەيدىڭ اراسىنا تۇسكەن سالقىندىق

ەستەرىڭىزدە بولسا، بۇدان ەكى جىل بۇرىن بريتانيا جەرىندە بۇرىنعى رەسەي تىڭشىسى سەرگەي سكريپال مەن ونىڭ قىزى بەلگىسىز زاتتان ۋلانعان، بۇل ءىس بويىنشا لوندون بيلىگى ماسكەۋدى ايىپتاپ، رەسەيدىڭ 23 ديپلوماتىن ەلىنەن قۋىپ ەدى. اعىلشىن ارالىنداعى ورىس ەلشىلىگى تاراتقان مالىمەتتە ديملوماتتار جانە ولاردىڭ وتباسى مۇشەلەرى بولىپ سول رەتكى ايىپتاۋدان كەيىن 80-گە جۋىق رەسەيلىك بريتانيادان شىعىپ كەتكەن ەكەن.

وقيعادان ءبىر اپتا وتكەننەن كەيىن سول كەزدە اعىلشىن باس ءۋازىرى تەرەزا مەي سكريپالدىڭ رەسەيلىك اسكەري زەرتحانادان شىققان ۋلى زاتتان ۋلانعان دەگەن قورىتىندى جاريالادى. سونىمەن بىرگە، بۇل قول سالۋدىڭ ارتىندا ماسكەۋ تۇرعان بولۋى مۇمكىن دەپ ەسكەرتتى. كەيىن وسى قاستاندىق ىسىنە «الەكساندر پەتروۆ» جانە «رۋسلان بوشيروۆ» دەگەن اتپەن بريتانياعا كىرگەن ەكى رەسەيلىكتىڭ قاتىسى بار جانە ولار ورىس شالعىن قىزمەتىنىڭ ادامدارى دەپ كورسەتتى. ءوز كەزەگىندە ماسكەۋ لوندوننىڭ ايىپتاۋىن جوققا شىعارعان بولاتىن. سوعان قاراماستان اعىلشىن پارلامەنتى ايىپتاۋعا تولىق دالەلىمىز بار دەسكەن. مىنە وسى وقيعادان كەيىن رەسەي مەن بريتانيا اراسىندا كىربەڭدىك ءتۇسىپ، ەكى ەل قاتىناسى ءالى دە سالقىن كۇيىن ساقتاپ كەلە جاتىر.

“The Qazaq Times”