Qazaqstannıñ "eñ täjiribeli policeyi" Qalmwhanbet Nwrmwhanbetwlı Qasımov. Foto: aşıq derekköz

Eks-prezident Nazarbaev «eñ täjiribeli policey» dep bağalaytın Qalmwhanbet Qasımov memlekettik küzet qızmetiniñ bastığı bolıp tağayındaldı.

Bügin Aqorda taratqan habarğa säykes, bwrınğı işki ister ministri prezident jarlığımen bıltır ğana kelgen ornınan, prezident keñesşisi jäne Qauipsizdik keñesiniñ hatşısı qızmetinen bosatılğan. Biraq wzağan joq, biıl mamırda zeynet jasına tolatın general memleket küzet qızmetiniñ basşılığına bardı.

Bwğan deyin memlekettik küzet qızmetin Änuar Sadıqwlov basqarğan. 16 qañtarda onıñ wlttıq qauipsizdik komiteti törağasınıñ orınbasarı bolıp tağayındalğanı belgili boldı. Sadıqwlovpen birge memlekettik küzet qızmetinen onıñ orınbasarı Äzimhan Jüsipov te ketken. Toqaevtıñ №245 jarlığı negizinde jaña qızmetke kirisken Qasımovtı köbi Nazarbaevpen baylanısı küşti ekenin aytadı.

«Dañq» ordeniniñ kavaleri 2011-2019 jıldarı ministr qızmeti kezinde birneşe ret qoğamnıñ aşıq äri aşı sınına wşıradı. Tipti onıñ otstavkağa ketuin talap etuşiler öte köp boldı. Mwnıñ bastı sebebiniñ biri ministr lauazımındağı alğaşqı jılı Jañaözen oqiğasına baylanıstı äskeri operaciyanı «qatañ jürgizui» dep sanaydı azamattıq qoğam belsendileri. 2011 jılı jeltoqsanda Jañaözen oqiğası kezinde policiya ereuilge şıqqandarğa oq atıp, 16 adam mert bolğan. Bwl oqiğağa qoğam äli künge deyin Qasımov basqarğan vedomstvonı ayıptaydı.

Bıltır 18 jeltoqsanda Toqaevtıñ jarlığımen belgili sayasatker Imanğali Tasmağambetov zeynet jasına jetuine baylanıstı Reseydegi elşi qızmetinen bosağan edi. Bir qızığı, ädette zeynetke erte şığatın äskeri kadrlardıñ biri retinde azamattıq qoğamnıñ sınına köp iligetin Qalmwhanbet Qasımov 18 mamırdan keyin asa mañızdı lauazımda qalar-qalması äzirge belgisiz. Onı uaqıt körsetedi.

“The Qazaq Times”