قازاقستاننىڭ "ەڭ تاجىريبەلى پوليتسەيى" قالمۇحانبەت نۇرمۇحانبەتۇلى قاسىموۆ. فوتو: اشىق دەرەككوز

ەكس-پرەزيدەنت نازارباەۆ «ەڭ تاجىريبەلى پوليتسەي» دەپ باعالايتىن قالمۇحانبەت قاسىموۆ مەملەكەتتىك كۇزەت قىزمەتىنىڭ باستىعى بولىپ تاعايىندالدى.

بۇگىن اقوردا تاراتقان حابارعا سايكەس، بۇرىنعى ىشكى ىستەر ءمينيسترى پرەزيدەنت جارلىعىمەن بىلتىر عانا كەلگەن ورنىنان، پرەزيدەنت كەڭەسشىسى جانە قاۋىپسىزدىك كەڭەسىنىڭ حاتشىسى قىزمەتىنەن بوساتىلعان. بىراق ۇزاعان جوق، بيىل مامىردا زەينەت جاسىنا تولاتىن گەنەرال مەملەكەت كۇزەت قىزمەتىنىڭ باسشىلىعىنا باردى.

بۇعان دەيىن مەملەكەتتىك كۇزەت قىزمەتىن ءانۋار سادىقۇلوۆ باسقارعان. 16 قاڭتاردا ونىڭ ۇلتتىق قاۋىپسىزدىك كوميتەتى توراعاسىنىڭ ورىنباسارى بولىپ تاعايىندالعانى بەلگىلى بولدى. سادىقۇلوۆپەن بىرگە مەملەكەتتىك كۇزەت قىزمەتىنەن ونىڭ ورىنباسارى ءازىمحان ءجۇسىپوۆ تە كەتكەن. توقاەۆتىڭ №245 جارلىعى نەگىزىندە جاڭا قىزمەتكە كىرىسكەن قاسىموۆتى كوبى نازارباەۆپەن بايلانىسى كۇشتى ەكەنىن ايتادى.

«داڭق» وردەنىنىڭ كاۆالەرى 2011-2019 جىلدارى مينيستر قىزمەتى كەزىندە بىرنەشە رەت قوعامنىڭ اشىق ءارى اششى سىنىنا ۇشىرادى. ءتىپتى ونىڭ وتستاۆكاعا كەتۋىن تالاپ ەتۋشىلەر وتە كوپ بولدى. مۇنىڭ باستى سەبەبىنىڭ ءبىرى مينيستر لاۋازىمىنداعى العاشقى جىلى جاڭاوزەن وقيعاسىنا بايلانىستى اسكەري وپەراتسيانى «قاتاڭ جۇرگىزۋى» دەپ سانايدى ازاماتتىق قوعام بەلسەندىلەرى. 2011 جىلى جەلتوقساندا جاڭاوزەن وقيعاسى كەزىندە پوليتسيا ەرەۋىلگە شىققاندارعا وق اتىپ، 16 ادام مەرت بولعان. بۇل وقيعاعا قوعام ءالى كۇنگە دەيىن قاسىموۆ باسقارعان ۆەدومستۆونى ايىپتايدى.

بىلتىر 18 جەلتوقساندا توقاەۆتىڭ جارلىعىمەن بەلگىلى ساياساتكەر يمانعالي تاسماعامبەتوۆ زەينەت جاسىنا جەتۋىنە بايلانىستى رەسەيدەگى ەلشى قىزمەتىنەن بوساعان ەدى. ءبىر قىزىعى، ادەتتە زەينەتكە ەرتە شىعاتىن اسكەري كادرلاردىڭ ءبىرى رەتىندە ازاماتتىق قوعامنىڭ سىنىنا كوپ ىلىگەتىن قالمۇحانبەت قاسىموۆ 18 مامىردان كەيىن اسا ماڭىزدى لاۋازىمدا قالار-قالماسى ازىرگە بەلگىسىز. ونى ۋاقىت كورسەتەدى.

“The Qazaq Times”