Aqtöbe aumağına belgisiz "zımıran böligi" qwladı, al el biligi äli ünsiz

9 qañtar tüs kezinde, naqtıraq aytqanda sağat 14:30 şamasında (astana uaqıtımen 15:30) Aqtöbe oblısına qarastı Bayğanin audanınıñ Noğaytı jäne Ebeyti eldi mekenderiniñ aumağına örtengen temir bölşek tüsken.

Vesti.kg analitikalıq resursı men Ferğana aqparat agenttigi taratqan habarğa qarağanda, qwlağan fragment-nısan zımıran bölşegine wqsaydı.

«Bwl zattıñ qwlağan ornı bizdiñ auıldan eki şaqırım jerde. Bizge jarılıstıñ dümpui estildi. Arasında 30-40 sekund salıp eki märte äldebir jarılıs dauısın estidik. Meniñşe, ol jerde bir emes, birneşe temir qaldıqtarı bar. Eki-üş sağattan soñ onda uçaskelik policiya men qwzırlı organ ökilderi keldi. Oqiğa ornına bizdi jaqındatpadı, tek qaşıq twstan qarap kördik»,– deydi oqiğa kuägeri Noğaytı auılınıñ twrğını.

Aqtöbe oblısı aumağına tüsken "jwmbaq qaldıq". Foto: aşıq derekköz

Audanınıñ äkimi Qayrat Utarov äueden belgisiz fragment qwlağanın rastağan. Onıñ sözinşe, zardap şekkender joq. Qırğız basılımına bergen pikirinde äkim:

«Qanday zımıran? Aspannan temir zat qwladı. Mwnı «ürlep-äsireleudiñ» qajeti joq. Oqiğa ornına qwzırlı organ mamandarı bardı. Aqparat, tüsinikteme beriledi. Bwl eşqanday zımıran emes», – degen.

Auıl twrğındarınıñ aytuı boyınşa, temir qaldıqtı qalta telefonına suret-videoğa tüsirgen oqiğa kuägerlerine qısım jasalıp, ayğaq materialdardı joyuğa mäjbürlegen. Eldi meken azamattarı oqiğanıñ qaytalana ma dep alañdaulı. Äzirge el astanasınan, tiisti mekemelerden eşqanday resmi mälimdeme jasalğan joq. Otandıq internet-portaldardıñ biri aymaqtağı tötenşe jağday turalı jariyalağan materialın keyinnen öşirip tastağan.

Ört şalğan belgisiz nısan. Foto: aşıq derekköz

Osı twsta bwğan deyin 2013 jılı Qazaqstan men Resey Federaciyası arasında «Bayqoñır» ğarış aylağınan wşıru kezinde wşıru apparatınıñ bölşegi qwlaytın aymaq retinde Qazaqstan aumağınan jer uçaskesin beru turalı kelisimge qol qoyılğan bolatın. Osı maqsatta Aqtöbe oblısında şamamen 23 mıñ ga jäne Qostanay oblısınan 41 mıñ ga jer qarastırılğan. Alayda 2020 jıldıñ basına Bayqoñırdan qandayda bir nısannıñ wşatını turalı resmi habarlama jasalğan joq. Soñğı ret bıltır jaña jıl qarsañında, yağni 24 jeltoqsanda «Proton-M» zımıran-tasımaldağışı wşırılğan.

24 jeltoqsan Bayqoñırdan wşırılğan "Proton-M" zımıran-tasımaldağışı. Foto: Roskosmos media portalı

Ötken jıldıñ soñında Roskosmos biıl 30 qañtar Bayqoñırdan britandıq jüyedegi OneWeb «ğarıştıq internet» apparattarı wşıru josparlanğanın mälimdegen.

2018 jılı şildede Batıs Qazaqstan oblısınıñ Kaztalov audanında da äueden metall zat qwlap edi. Qarasu men Jwldız auıldarınıñ arasındağı radiusı bir şaqırım şığatın aumaqqa ärtürli qaldıqtar şaşırap tüsken. Apattıñ kesirinen 90 ga şöpti alqap örtenip, biraz uaqıtqa wyalı baylanıs üzilgen bolatın.

Qazaqstannıñ batıs öñirinde ärtürli zımıran bölikteri jii qwlaydı. Twrğındardıñ arız-şağımına qaramastan, äli künge deyin jalğasıp keledi.

"The Qazaq Times"