اقتوبە اۋماعىنا بەلگىسىز "زىمىران بولىگى" قۇلادى، ال ەل بيلىگى ءالى ءۇنسىز

9 قاڭتار ءتۇس كەزىندە، ناقتىراق ايتقاندا ساعات 14:30 شاماسىندا (استانا ۋاقىتىمەن 15:30) اقتوبە وبلىسىنا قاراستى بايعانين اۋدانىنىڭ نوعايتى جانە ەبەيتى ەلدى مەكەندەرىنىڭ اۋماعىنا ورتەنگەن تەمىر بولشەك تۇسكەن.

Vesti.kg اناليتيكالىق رەسۋرسى مەن فەرعانا اقپارات اگەنتتىگى تاراتقان حابارعا قاراعاندا، قۇلاعان فراگمەنت-نىسان زىمىران بولشەگىنە ۇقسايدى.

«بۇل زاتتىڭ قۇلاعان ورنى ءبىزدىڭ اۋىلدان ەكى شاقىرىم جەردە. بىزگە جارىلىستىڭ ءدۇمپۋى ەستىلدى. اراسىندا 30-40 سەكۋند سالىپ ەكى مارتە الدەبىر جارىلىس داۋىسىن ەستىدىك. مەنىڭشە، ول جەردە ءبىر ەمەس، بىرنەشە تەمىر قالدىقتارى بار. ەكى-ءۇش ساعاتتان سوڭ وندا ۋچاسكەلىك پوليتسيا مەن قۇزىرلى ورگان وكىلدەرى كەلدى. وقيعا ورنىنا ءبىزدى جاقىنداتپادى، تەك قاشىق تۇستان قاراپ كوردىك»،– دەيدى وقيعا كۋاگەرى نوعايتى اۋىلىنىڭ تۇرعىنى.

اقتوبە وبلىسى اۋماعىنا تۇسكەن "جۇمباق قالدىق". فوتو: اشىق دەرەككوز

اۋدانىنىڭ اكىمى قايرات ۋتاروۆ اۋەدەن بەلگىسىز فراگمەنت قۇلاعانىن راستاعان. ونىڭ سوزىنشە، زارداپ شەككەندەر جوق. قىرعىز باسىلىمىنا بەرگەن پىكىرىندە اكىم:

«قانداي زىمىران؟ اسپاننان تەمىر زات قۇلادى. مۇنى «ۇرلەپ-اسىرەلەۋدىڭ» قاجەتى جوق. وقيعا ورنىنا قۇزىرلى ورگان ماماندارى باردى. اقپارات، تۇسىنىكتەمە بەرىلەدى. بۇل ەشقانداي زىمىران ەمەس»، – دەگەن.

اۋىل تۇرعىندارىنىڭ ايتۋى بويىنشا، تەمىر قالدىقتى قالتا تەلەفونىنا سۋرەت-ۆيدەوعا تۇسىرگەن وقيعا كۋاگەرلەرىنە قىسىم جاسالىپ، ايعاق ماتەريالداردى جويۋعا ماجبۇرلەگەن. ەلدى مەكەن ازاماتتارى وقيعانىڭ قايتالانا ما دەپ الاڭداۋلى. ازىرگە ەل استاناسىنان، ءتيىستى مەكەمەلەردەن ەشقانداي رەسمي مالىمدەمە جاسالعان جوق. وتاندىق ينتەرنەت-پورتالداردىڭ ءبىرى ايماقتاعى توتەنشە جاعداي تۋرالى جاريالاعان ماتەريالىن كەيىننەن ءوشىرىپ تاستاعان.

ءورت شالعان بەلگىسىز نىسان. فوتو: اشىق دەرەككوز

وسى تۇستا بۇعان دەيىن 2013 جىلى قازاقستان مەن رەسەي فەدەراتسياسى اراسىندا «بايقوڭىر» عارىش ايلاعىنان ۇشىرۋ كەزىندە ۇشىرۋ اپپاراتىنىڭ بولشەگى قۇلايتىن ايماق رەتىندە قازاقستان اۋماعىنان جەر ۋچاسكەسىن بەرۋ تۋرالى كەلىسىمگە قول قويىلعان بولاتىن. وسى ماقساتتا اقتوبە وبلىسىندا شامامەن 23 مىڭ گا جانە قوستاناي وبلىسىنان 41 مىڭ گا جەر قاراستىرىلعان. الايدا 2020 جىلدىڭ باسىنا بايقوڭىردان قاندايدا ءبىر نىساننىڭ ۇشاتىنى تۋرالى رەسمي حابارلاما جاسالعان جوق. سوڭعى رەت بىلتىر جاڭا جىل قارساڭىندا، ياعني 24 جەلتوقساندا «پروتون-م» زىمىران-تاسىمالداعىشى ۇشىرىلعان.

24 جەلتوقسان بايقوڭىردان ۇشىرىلعان "پروتون-م" زىمىران-تاسىمالداعىشى. فوتو: روسكوسموس مەديا پورتالى

وتكەن جىلدىڭ سوڭىندا روسكوسموس بيىل 30 قاڭتار بايقوڭىردان بريتاندىق جۇيەدەگى OneWeb «عارىشتىق ينتەرنەت» اپپاراتتارى ۇشىرۋ جوسپارلانعانىن مالىمدەگەن.

2018 جىلى شىلدەدە باتىس قازاقستان وبلىسىنىڭ كازتالوۆ اۋدانىندا دا اۋەدەن مەتالل زات قۇلاپ ەدى. قاراسۋ مەن جۇلدىز اۋىلدارىنىڭ اراسىنداعى راديۋسى ءبىر شاقىرىم شىعاتىن اۋماققا ءارتۇرلى قالدىقتار شاشىراپ تۇسكەن. اپاتتىڭ كەسىرىنەن 90 گا ءشوپتى القاپ ورتەنىپ، ءبىراز ۋاقىتقا ۇيالى بايلانىس ۇزىلگەن بولاتىن.

قازاقستاننىڭ باتىس وڭىرىندە ءارتۇرلى زىمىران بولىكتەرى ءجيى قۇلايدى. تۇرعىنداردىڭ ارىز-شاعىمىنا قاراماستان، ءالى كۇنگە دەيىن جالعاسىپ كەلەدى.

"The Qazaq Times"