Türkiya men Gonkongta ötken Qıtay lagerlerine qarsı narazılıqtar. 20-22 jeltoqsan. Foto: Reuters HAA

Türkiya men Gonkongta Qıtaydağı azşılıq wlttardıñ «genocidke wşırauına» qarsı beybit şeruler ötti.

Keşe, 22 jeltoqsan tañerteñ Gonkongta mıñnan astam adamnıñ qatısuımen Qıtaydıñ soltüstik-batısındağı Şıñjañ lagerlerinde otırğan twtqındardı qoldauğa, olardı derek bosatu talabımen beybit şeru ötti. Narazı gonkongtıqtar qamaudağı etnikalıq wyğırlar men özge de azşılıq wlttar, sonıñ işinde qazaqtardı «jazıqsız äri negizsiz» wstalğan dep sanaydı. Reuters halıqaralıq aqparat agenttiginiñ habarlauınşa, şeruge qatısuşılardıñ biri äkimşilik ğimaratına tigilip twrğan Qıtay tuın alıp tastağannan keyin qaqtığıs bastalğan. Narazılar Şıñjañdağı türki tildes wlttardıñ qwqıqtarı bwzılıp jatqanın ayıptap, bwğan qarsı küresuge ündedi.

Gonkong Qıtaydıñ azşılıq wlttarğa qatıstı sayasatın sınadı. 22 jeltoqsan. Foto: Reuters HAA

Qazirgi tañda Gonkongta rojdestvo merekesi qarsañında atalğan talaptar men ötip jatqanına jartı jıldan asqan ereuilderdiñ bastı «bes talabı» boyınşa auqımdı narazılıq akciyasına qızu dayındıq jürip jatır.

Türik azamattarı Şığıs Türkistan halıqtarına qısım jasaudı toqtatudı swraydı. 20 jeltoqsan. Foto: Reuters HAA

Al, jwma, jeltoqsannıñ 20-sı küni däl osı talaptardı qoyğan jwrt Stambwl köşelerine şıqtı. Olardıñ qolında «Qatigezdikti toqtatıñdar», «Qıtay jauızdarı, Şığıs Türkistannan ketiñder», «Şığıs Türkistan jalğız emes» degen bannerler boldı.

Stambwl twrğındarı Qıtay lagerlerinde qıspaqqa wşırağan türki tildes wlttardı bosatudı talap etip, miting ötkizdi. 20 jeltoqsan. Foto: Reuters HAA

Mıñdağan demonstranttar Qıtay «sırtı bütin, işi tütin» lagerindegi türkitildes halıqtarğa bostandıq berudi talap ete otırıp, QHR-dıñ mwsılman azşılıqqa qatıstı sayasatın sınağan «Arsenal» futbol komandasınıñ qorğauşısı Mesut Özilge qoldau bildirdi.

Türik jastarı tanımal futbolşı Özildiñ öz pikirin aşıq bildiruin qoldaydı. 20 jeltoqsan. Foto: Reuters HAA

2017 jıldan beri Qıtayda qazaq, wyğır, tibet, moñğol jäne özge de az wlt ökilderine qısım körsetilip, arnayı lagerlerge qamalıp jatır degen aqparat taradı. Euroodaq, AQŞ, tipti BWW Qıtay biligin ayıptap keledi. Resmi Beyjiñ bwl aqparattı joqqa şığarıp, lagerlerdegi jağdaydı eldiñ işki isi dep, oğan eşkimniñ aralaspau kerek ekenin alğa tartadı.

"The Qazaq Times"