FQQ ğimaratı mañındağı qauipsizdik qızmetkerler. Foto: Reyter.

Mäskeudiñ qala ortalığına ornalasqan Federaldıq Qauipsizdik qızmetiniñ (FQQ/FSB) bas ğimaratında atıs bolıp, keminde bir adam qaza taptı, bes adam jaraqat aldı. Küdikti policiya jağınan oqqa wşqan.

«InterFaks» taratqan habarğa qarağanda, qolına qaru alğan er adam FQQ ğimaratınıñ kireberis esiginde oq jaudırğan. Eldiñ Densaulıq saqtau ministrligi eki qauipsizdik qızmetkeriniñ auır jaraqat alğanın mälimdegen, keyin FQQ bir oficerdiñ qaza tapqanın mälimdedi. Biraq, qaza tapqan qauipsizdik qızmetkerdiñ auır jaraqat alğan eki adamnıñ biri me, joq, bwl turalı anıq mälimet bermegen.

Aqparat qwraldarı bwl qarulı şabuıldı Putinniñ jıldıq baspasöz jiınına oray jasalğan degen boljamdar aytuda. Sebebi, şabuıl Putinniñ baspasöz jiını ayaqtala salıp köp ötpey orın alğan. Onıñ üstine däl osı kezde Putin arnayı qızmet ökilderin merekelerimen qwttıqtap jatqan eken.

Äleumettik jelige tarap ketken videolardan FQQ bas ğimaratı mañındağı mıltıq dauısı estiledi jäne policiya qızmetkerleriniñ qarbalas äreketterin köruge boladı.

 “The Qazaq Times”