فقق عيماراتى ماڭىنداعى قاۋىپسىزدىك قىزمەتكەرلەر. فوتو: رەيتەر.

ماسكەۋدىڭ قالا ورتالىعىنا ورنالاسقان فەدەرالدىق قاۋىپسىزدىك قىزمەتىنىڭ (فقق/فسب) باس عيماراتىندا اتىس بولىپ، كەمىندە ءبىر ادام قازا تاپتى، بەس ادام جاراقات الدى. كۇدىكتى پوليتسيا جاعىنان وققا ۇشقان.

«ينتەرفاكس» تاراتقان حابارعا قاراعاندا، قولىنا قارۋ العان ەر ادام فقق عيماراتىنىڭ كىرەبەرىس ەسىگىندە وق جاۋدىرعان. ەلدىڭ دەنساۋلىق ساقتاۋ مينيسترلىگى ەكى قاۋىپسىزدىك قىزمەتكەرىنىڭ اۋىر جاراقات العانىن مالىمدەگەن، كەيىن فقق ءبىر وفيتسەردىڭ قازا تاپقانىن مالىمدەدى. بىراق، قازا تاپقان قاۋىپسىزدىك قىزمەتكەردىڭ اۋىر جاراقات العان ەكى ادامنىڭ ءبىرى مە، جوق، بۇل تۋرالى انىق مالىمەت بەرمەگەن.

اقپارات قۇرالدارى بۇل قارۋلى شابۋىلدى ءپۋتيننىڭ جىلدىق ءباسپاسوز جيىنىنا وراي جاسالعان دەگەن بولجامدار ايتۋدا. سەبەبى، شابۋىل ءپۋتيننىڭ ءباسپاسوز جيىنى اياقتالا سالىپ كوپ وتپەي ورىن العان. ونىڭ ۇستىنە ءدال وسى كەزدە پۋتين ارنايى قىزمەت وكىلدەرىن مەرەكەلەرىمەن قۇتتىقتاپ جاتقان ەكەن.

الەۋمەتتىك جەلىگە تاراپ كەتكەن ۆيدەولاردان فقق باس عيماراتى ماڭىنداعى مىلتىق داۋىسى ەستىلەدى جانە پوليتسيا قىزمەتكەرلەرىنىڭ قاربالاس ارەكەتتەرىن كورۋگە بولادى.

 “The Qazaq Times”