Täuelsizdik küni «Täuelsizdik monumentiniñ» tübine öz poziciyasın bildiruge Oyan, Qazaqstan jastarı da şıqtı. 16 jeltoqsan 2019 jıl. Respublika alañı, Almatı. Foto: QT

Bügin, Qazaqstannıñ Täuelsizdigi küni belgili azamattıq qozğalıstarmen birge «Oyan, Qazaqstan» eriktiler wyımınıñ jastarı da Almatıdağı «Täuelsizdik monumentiniñ» aldına beybit mitingke şıqtı.

Foto: QT.

Beybit şeruge şığuğa resmi rwqsat aludı qajet dep sanamaytın azamattıq qozğalıstıñ belsendileri qolına «Wmıtılmas 1986, 2011», «Avtoritarizmnen köktemge», «Jastarğa jol beriñizder», «Parlamenttik respublika» degen jazuı bar bannerler wstap keldi. Elde sayasi reformalar jürgizuge jäne prezidenttik bilik türinen parlamenttik basqaruğa köşuge şaqırıp jürgen jastar «Oyan, Qazaqstan!», «Nazarbaevsız Qazaqstan» dep ayğayladı.

Foto: QT.

Akiya barısında söz söyleuşilerdiñ biri, oyanqazaqstandıq:

– Biz bügin ädiletsizdikke, rejimniñ tirandığına qarsı küresuge şıqtıq. Jañaözende jwmısşılardı atqan kezde qwrban bolğandardı wmıtqan joqpız... Biz elimizde eşkim sayasi közqarasına bola qudalanbauı üşin küresuge äzirmiz. Şınayı täuelsiz bolatın kün keletinine senemiz, – dedi Ayzat Äbilseyitova.

Äsem Japişevanıñ sözine qarağanda, şeruden keyin belsendi Ayzat Äbilseyitovanı Medeu audandıq policiya departamentine alıp ketken.

Foto: QT.

Al wyımnıñ facebook parağandağı jariyalanğan mälimdemesinde: «Biz Zamanbek Nwrqadilov pen Altınbek Särsenbaevtıñ sayasi ölitiriluin qalay wmıtpasaq, Jañaözen qalasındağı jwmısşılardıñ qırğının tura solay wmıtpadıq. Sizderdiñ ne istegenderiñizdi jaqsı bilemiz. Bizdiñ elde eşkim jäne eşqaşan sayasi közqarastar üşin qudalanbauı jäne öltirilmeui üşin küresuge dayınbız. Täuelsizdik – bwl sırtqı jäne işki jaudan erkin bolu. Uaqıt kelgende nağız Täuelsizdiktiñ tañı atadı», – delingen.

Foto: QT.

Spikerlerdiñ sözine aralasıp, jwrttıñ tarauın swrağan äkimdik-prokuratura ökilderine jinalğandar bwğan jauap retinde «Oyan, Qazaqstan!» dep wrandastı.

"The Qazaq Times"