Oyan, Qazaqstan: ءبىز تيرانياعا اينالعان جۇيەگە قارسى كۇرەسەمىز

بۇگىن، قازاقستاننىڭ تاۋەلسىزدىگى كۇنى بەلگىلى ازاماتتىق قوزعالىستارمەن بىرگە «Oyan, Qazaqstan» ەرىكتىلەر ۇيىمىنىڭ جاستارى دا الماتىداعى «تاۋەلسىزدىك مونۋمەنتىنىڭ» الدىنا بەيبىت ميتينگكە شىقتى.

فوتو: QT.

بەيبىت شەرۋگە شىعۋعا رەسمي رۇقسات الۋدى قاجەت دەپ سانامايتىن ازاماتتىق قوزعالىستىڭ بەلسەندىلەرى قولىنا «ۇمىتىلماس 1986, 2011»، «اۆتوريتاريزمنەن كوكتەمگە»، «جاستارعا جول بەرىڭىزدەر»، «پارلامەنتتىك رەسپۋبليكا» دەگەن جازۋى بار باننەرلەر ۇستاپ كەلدى. ەلدە ساياسي رەفورمالار جۇرگىزۋگە جانە پرەزيدەنتتىك بيلىك تۇرىنەن پارلامەنتتىك باسقارۋعا كوشۋگە شاقىرىپ جۇرگەن جاستار «ويان، قازاقستان!»، «نازارباەۆسىز قازاقستان» دەپ ايعايلادى.

فوتو: QT.

اكيا بارىسىندا ءسوز سويلەۋشىلەردىڭ ءبىرى، ويانقازاقستاندىق:

– ءبىز بۇگىن ادىلەتسىزدىككە، رەجيمنىڭ تيراندىعىنا قارسى كۇرەسۋگە شىقتىق. جاڭاوزەندە جۇمىسشىلاردى اتقان كەزدە قۇربان بولعانداردى ۇمىتقان جوقپىز... ءبىز ەلىمىزدە ەشكىم ساياسي كوزقاراسىنا بولا قۋدالانباۋى ءۇشىن كۇرەسۋگە ءازىرمىز. شىنايى تاۋەلسىز بولاتىن كۇن كەلەتىنىنە سەنەمىز، – دەدى ايزات ابىلسەيىتوۆا.

اسەم جاپيشەۆانىڭ سوزىنە قاراعاندا, شەرۋدەن كەيىن بەلسەندى ايزات ابىلسەيىتوۆانى مەدەۋ اۋداندىق پوليتسيا دەپارتامەنتىنە الىپ كەتكەن.

فوتو: QT.

ال ۇيىمنىڭ facebook پاراعانداعى جاريالانعان مالىمدەمەسىندە: «ءبىز زامانبەك نۇرقادىلوۆ پەن التىنبەك سارسەنباەۆتىڭ ساياسي ءولىتىرىلۋىن قالاي ۇمىتپاساق، جاڭاوزەن قالاسىنداعى جۇمىسشىلاردىڭ قىرعىنىن تۋرا سولاي ۇمىتپادىق. سىزدەردىڭ نە ىستەگەندەرىڭىزدى جاقسى بىلەمىز. ءبىزدىڭ ەلدە ەشكىم جانە ەشقاشان ساياسي كوزقاراستار ءۇشىن قۋدالانباۋى جانە ولتىرىلمەۋى ءۇشىن كۇرەسۋگە دايىنبىز. تاۋەلسىزدىك – بۇل سىرتقى جانە ىشكى جاۋدان ەركىن بولۋ. ۋاقىت كەلگەندە ناعىز تاۋەلسىزدىكتىڭ تاڭى اتادى»، – دەلىنگەن.

فوتو: QT.

سپيكەرلەردىڭ سوزىنە ارالاسىپ، جۇرتتىڭ تاراۋىن سۇراعان اكىمدىك-پروكۋراتۋرا وكىلدەرىنە جينالعاندار بۇعان جاۋاپ رەتىندە «ويان، قازاقستان!» دەپ ۇرانداستى.

"The Qazaq Times"