Äl-Farabidiñ 1150 jıldığı men Şımkent qalasınıñ 2200 jıldığın atap ötu jöninde wsınıs YUNESKO wyımı tarapınan resmi qoldau taptı.

QR Sırtqı ister ministrligi taratqan aaqparatta: «2019 jılğı 12-27 qaraşa aralığında Franciya astanasında ötken YUNESKO-nıñ 40-şı Bas konferenciyası ortağasırlıq Şığıstıñ ğwlama oyşılı äri ğalımı Äbu Nasır Äl-Farabidiñ 1150 jıldığın jäne Şımkent qalasınıñ negizi qalanuınıñ 2200 jıldığın kelesi jılı atap ötetin halıqaralıq mereytoylar tizimine engizu jöninde arnayı qarar qabıldadı», — delingen.

Wyımğa müşe 193 memlekettiñ ortaq şeşimine säykes YUNESKO Hatşılığına atalğan mereytoylar ayasında ötkiziletin is-şaralarğa qatısu tapsırılğan. Bas konferenciyanıñ plenarlıq jinalısında Qazaqstannıñ Franciyadağı Elşisi äri YUNESKO janındağı Twraqtı ökili Jan Ğaliev müşe memleketterge elimizdiñ wsınıstarın qoldağandarı üşin alğıs bildirip, olardı atalğan mereytoylarğa, jäne qazaqtıñ wlı aqını äri oyşılı Abay Qwnanbaywlınıñ 175-jıldığına oray elimizde jäne şetelde ötkizilui josparlanıp otırğan is-şaralarğa qatısuğa şaqırdı.

YUNESKO mereytoyları küntizbesine engizu jöninde ötinişter, atap ötilui Wyımnıñ jahandıq mädeniet, ğılım men bilimge qosqan ülesterin nasihattau arqılı halıqtardı jaqındastıru maqsatına say keletin, mañızdı oqiğalar, aytulı twlğalardıñ tuğanınıñ nemese qaytıs bolğanınıñ eluge bölinetin datalarğa qatıstı boluı tiis.

40-şı Bas konferenciya bekitken tizimge 53 müşe memlekettiñ wsınısı endi, solardıñ arasında – köne türki jazuınıñ asa mañızdı ülgilerin qamtitın Bilge qağan men Toñıqwq (Toñıkök) eskertkişteri ornatıluınıñ 1300-jıldığına arnalğan is-şaralarğa YUNESKO-nıñ qatısuı jöninde türkitildes elder men Moñğoliyanıñ birlesken wsınısı da bar.

"The Qazaq Times"