ءال-ءفارابيدىڭ 1150 جىلدىعى مەن شىمكەنت قالاسىنىڭ 2200 جىلدىعىن اتاپ ءوتۋ جونىندە ۇسىنىس يۋنەسكو ۇيىمى تاراپىنان رەسمي قولداۋ تاپتى.

قر سىرتقى ىستەر مينيسترلىگى تاراتقان ااقپاراتتا: «2019 جىلعى 12-27 قاراشا ارالىعىندا فرانتسيا استاناسىندا وتكەن يۋنەسكو-نىڭ 40-شى باس كونفەرەنتسياسى ورتاعاسىرلىق شىعىستىڭ عۇلاما ويشىلى ءارى عالىمى ءابۋ ناسىر ءال-ءفارابيدىڭ 1150 جىلدىعىن جانە شىمكەنت قالاسىنىڭ نەگىزى قالانۋىنىڭ 2200 جىلدىعىن كەلەسى جىلى اتاپ وتەتىن حالىقارالىق مەرەيتويلار تىزىمىنە ەنگىزۋ جونىندە ارنايى قارار قابىلدادى»، — دەلىنگەن.

ۇيىمعا مۇشە 193 مەملەكەتتىڭ ورتاق شەشىمىنە سايكەس يۋنەسكو حاتشىلىعىنا اتالعان مەرەيتويلار اياسىندا وتكىزىلەتىن ءىس-شارالارعا قاتىسۋ تاپسىرىلعان. باس كونفەرەنتسيانىڭ پلەنارلىق جينالىسىندا قازاقستاننىڭ فرانتسياداعى ەلشىسى ءارى يۋنەسكو جانىنداعى تۇراقتى وكىلى جان عاليەۆ مۇشە مەملەكەتتەرگە ەلىمىزدىڭ ۇسىنىستارىن قولداعاندارى ءۇشىن العىس ءبىلدىرىپ، ولاردى اتالعان مەرەيتويلارعا، جانە قازاقتىڭ ۇلى اقىنى ءارى ويشىلى اباي قۇنانبايۇلىنىڭ 175-جىلدىعىنا وراي ەلىمىزدە جانە شەتەلدە وتكىزىلۋى جوسپارلانىپ وتىرعان ءىس-شارالارعا قاتىسۋعا شاقىردى.

يۋنەسكو مەرەيتويلارى كۇنتىزبەسىنە ەنگىزۋ جونىندە وتىنىشتەر، اتاپ ءوتىلۋى ۇيىمنىڭ جاھاندىق مادەنيەت، عىلىم مەن بىلىمگە قوسقان ۇلەستەرىن ناسيحاتتاۋ ارقىلى حالىقتاردى جاقىنداستىرۋ ماقساتىنا ساي كەلەتىن، ماڭىزدى وقيعالار، ايتۋلى تۇلعالاردىڭ تۋعانىنىڭ نەمەسە قايتىس بولعانىنىڭ ەلۋگە بولىنەتىن داتالارعا قاتىستى بولۋى ءتيىس.

40-شى باس كونفەرەنتسيا بەكىتكەن تىزىمگە 53 مۇشە مەملەكەتتىڭ ۇسىنىسى ەندى، سولاردىڭ اراسىندا – كونە تۇركى جازۋىنىڭ اسا ماڭىزدى ۇلگىلەرىن قامتيتىن بىلگە قاعان مەن توڭىقۇق (توڭىكوك) ەسكەرتكىشتەرى ورناتىلۋىنىڭ 1300-جىلدىعىنا ارنالعان ءىس-شارالارعا يۋنەسكو-نىڭ قاتىسۋى جونىندە تۇركىتىلدەس ەلدەر مەن موڭعوليانىڭ بىرلەسكەن ۇسىنىسى دا بار.

"The Qazaq Times"