Körneki kollaj. Foto: aşıq derekköz

Iraktan qazaqstandıq 14 bala elge evakuaciyalandı.

Keşe, qaraşanıñ 24-si prezident Qasım-Jomart Toqaevtıñ tapsırmasımen SİM Irak türmesinde öz analarımen jatqan qazaqstandıq 14 bala elge evakuaciyalandı.

Vedomstvo taratqan aqparatqa qarağanda, «balalardıñ anaları, terroristik äreketke qatıstılığı üşin sottalıp, Irak  türmesinde jazasın ötep jatır».

Atalğan gumanitarlıq akciya balalardıñ anaları men tuğan-tuıstarınıñ swrauı boyınşa «Sırtqı ister ministrligi birqatar memlekettik organdarmen, otandıq ükimettik emes qwrılımdarmen jäne halıqaralıq wyımdarmen tığız  baylanısa otırıp jüzege asırğan».

SİM baspasöz qızmetiniñ habarlauınşa, qwjattandıru üderisi men oñaltu kezeñi ayaqtalğannan keyin balalar öz tuıstarımen qauışatın boladı. Ötken apta (19 qaraşa) WQK Irak türmesinde qazaqstandıq 6 äyel jazasın ötep jatqanın mälimdegen. Atalğan altı azamattıñ balaları boluı mümkin.

«2019 jıl Qazaqstan Respublikası men YUNISEF üşin mañızdı. Osıdan tura 30 jıl bwrın BWW-nıñ Bala qwqıqtarı turalı Konvenciyasına qol qoyıldı, al aqpan ayında bizdiñ osı Konvenciyanı ratifikaciyalağanımızğa 25 jıl toldı» delingen vedomstvo habarlamasında.

Bwğan deyin WQK Irak-Süriya aymağınan  277 eresek adam (57 er adam, 220 äyel adam) jäne 547 kämelet jasqa tolmağan bala keri qaytarılğanın aytqan bolatın. Sonday-aq dini radikalizmniñ iri oşağına aynalğan aymaqtatardan oralğan 198 äyel men 545 bala Qazaqstannıñ beyimdeu-oñaltu ortalıqtarında bolğan.

Biıl Qazaqstan tarapı birneşe kezeñnen twratın «Jusan» evakuaciyalau operaciyasımen barlığı 357 qazaqstandıq bala elge jetkizilgen. Taratıp aytqanda, 9 qañtarda «Jusan-1» Qazaqstannıñ 47 azamatı, 7 jäne 9 mamır künderi «Jusan-2» 231 azamat, olardıñ 159-ı – bala, al soñğı «Jusan-3» operaciyasımen 28-31 mamırda 67 äyel, 171 bala Süriyadan oralğan edi.

Iraktan atamekenine oralğan 14 bala. Foto: aşıq derekköz

Iraktan atamekenine oralğan 14 bala. Foto: aşıq derekköz

"The Qazaq Times"