كورنەكى كوللاج. فوتو: اشىق دەرەككوز

يراكتان قازاقستاندىق 14 بالا ەلگە ەۆاكۋاتسيالاندى.

كەشە، قاراشانىڭ 24-ءسى پرەزيدەنت قاسىم-جومارت توقاەۆتىڭ تاپسىرماسىمەن ءسىم يراك تۇرمەسىندە ءوز انالارىمەن جاتقان قازاقستاندىق 14 بالا ەلگە ەۆاكۋاتسيالاندى.

ۆەدومستۆو تاراتقان اقپاراتقا قاراعاندا, «بالالاردىڭ انالارى، تەرروريستىك ارەكەتكە قاتىستىلىعى ءۇشىن سوتتالىپ، يراك  تۇرمەسىندە جازاسىن وتەپ جاتىر».

اتالعان گۋمانيتارلىق اكتسيا بالالاردىڭ انالارى مەن تۋعان-تۋىستارىنىڭ سۇراۋى بويىنشا «سىرتقى ىستەر مينيسترلىگى بىرقاتار مەملەكەتتىك ورگاندارمەن، وتاندىق ۇكىمەتتىك ەمەس قۇرىلىمدارمەن جانە حالىقارالىق ۇيىمدارمەن تىعىز  بايلانىسا وتىرىپ جۇزەگە اسىرعان».

ءسىم ءباسپاسوز قىزمەتىنىڭ حابارلاۋىنشا، قۇجاتتاندىرۋ ۇدەرىسى مەن وڭالتۋ كەزەڭى اياقتالعاننان كەيىن بالالار ءوز تۋىستارىمەن قاۋىشاتىن بولادى. وتكەن اپتا (19 قاراشا) ۇقك يراك تۇرمەسىندە قازاقستاندىق 6 ايەل جازاسىن وتەپ جاتقانىن مالىمدەگەن. اتالعان التى ازاماتتىڭ بالالارى بولۋى مۇمكىن.

«2019 جىل قازاقستان رەسپۋبليكاسى مەن يۋنيسەف ءۇشىن ماڭىزدى. وسىدان تۋرا 30 جىل بۇرىن بۇۇ-نىڭ بالا قۇقىقتارى تۋرالى كونۆەنتسياسىنا قول قويىلدى، ال اقپان ايىندا ءبىزدىڭ وسى كونۆەنتسيانى راتيفيكاتسيالاعانىمىزعا 25 جىل تولدى» دەلىنگەن ۆەدومستۆو حابارلاماسىندا.

بۇعان دەيىن ۇقك يراك-ءسۇريا ايماعىنان  277 ەرەسەك ادام (57 ەر ادام، 220 ايەل ادام) جانە 547 كامەلەت جاسقا تولماعان بالا كەرى قايتارىلعانىن ايتقان بولاتىن. سونداي-اق ءدىني راديكاليزمنىڭ ءىرى وشاعىنا اينالعان ايماقتاتاردان ورالعان 198 ايەل مەن 545 بالا قازاقستاننىڭ بەيىمدەۋ-وڭالتۋ ورتالىقتارىندا بولعان.

بيىل قازاقستان تاراپى بىرنەشە كەزەڭنەن تۇراتىن «جۋسان» ەۆاكۋاتسيالاۋ وپەراتسياسىمەن بارلىعى 357 قازاقستاندىق بالا ەلگە جەتكىزىلگەن. تاراتىپ ايتقاندا، 9 قاڭتاردا «جۋسان-1» قازاقستاننىڭ 47 ازاماتى، 7 جانە 9 مامىر كۇندەرى «جۋسان-2» 231 ازامات, ولاردىڭ 159-ى – بالا, ال سوڭعى «جۋسان-3» وپەراتسياسىمەن 28-31 مامىردا 67 ايەل، 171 بالا ءسۇريادان ورالعان ەدى.

يراكتان اتامەكەنىنە ورالعان 14 بالا. فوتو: اشىق دەرەككوز

يراكتان اتامەكەنىنە ورالعان 14 بالا. فوتو: اشىق دەرەككوز

"The Qazaq Times"