Ötken senbide The New York Times basılımı Qıtay Kommunistik partiyasınıñ birqatar qwpiya qwjattarın jariya etti. Atalğan basılımğa QKP qwpiya qwjattarın atı-jönin jasırğan qıtaylıq joğarı lauazımdı bergen degen mälimetter de bar. Bwl qwjattar Şınjañ mäselesiniñ, ondağı az sandı wlttarğa körsetilgen qısımnıñ Qıtay basşısı Şi Jinpiñniñ (Si Czin'pin/Xi Jinping) nwsqauımen bolğanın däleldeydi.

QKP-nıñ 400 betten asatın qwpiya qwjattarı Şınjañdağı qazaq, wyğır jäne basqa da az sandı wlttarğa körsetilip jatqan qısımnıñ negizi deuge de boladı. Onda az sandı wlt ökilderin wlttıq, dindik senimderinen ajıratu üşin «Bilim beru ortalıqtarı» dep atalatın lagerlerge qamau jäne basqa da äreketter tolığımen, egjey-tegjeyli körsetiledi. Tipti, lagerlerge qamalğan ata-analardıñ İşki Qıtaydağı nemese şetelde oqıp jatqan balalarına qalay tüsindiru kerektigine deyin körsetilgen.

Anığında, The New York Times basılımı QKP-nıñ 403 bet işki qwjatın qolğa tüsirgen. Bwl Qıtay qızıl partiyasınıñ soñğı on jıldıqtardağı eñ ülken joğaltuı deuge boladı. Bwl qwjattar Qıtay bilik partiyasınıñ şın beynesin älem aldında aşıp tastadı dese de boladı. Atalğan basılım habarında: «Bwl qwjattar Qıtaydan sırtqı älem üşin üş jıl bwrın bastalğan jäne qazir de Şınjañda bolıp jatqan jağdaylardıñ şın mänin tüsinuge mümkindik berdi», – degen.

Qwjattıñ qalay jinaqtalıp, qalay şığarılğanı turalı anıq mälimet joq. Tek, atı-jönin bildirgisi kelmegen Qıtay bilik partiyasınıñ ökili bergeni turalı aytıladı. Degenmen, atalğan qwjattar Qıtay Kommunistik partiyasınıñ Şınjañğa bağıttağan qısımınıñ jwrt oylağannan da auır ekenin tüsindiredi. Äri, Beyjiñ biliginiñ Mau Zıdoñ (Mao Czedun) däuirinen beri Şınjañdı qanday qısım astında wstap kelgenin körsetedi.

“The Qazaq Times”