وتكەن سەنبىدە The New York Times باسىلىمى قىتاي كوممۋنيستىك پارتياسىنىڭ بىرقاتار قۇپيا قۇجاتتارىن جاريا ەتتى. اتالعان باسىلىمعا قكپ قۇپيا قۇجاتتارىن اتى-ءجونىن جاسىرعان قىتايلىق جوعارى لاۋازىمدى بەرگەن دەگەن مالىمەتتەر دە بار. بۇل قۇجاتتار شىنجاڭ ماسەلەسىنىڭ، ونداعى از ساندى ۇلتتارعا كورسەتىلگەن قىسىمنىڭ قىتاي باسشىسى شي ءجينپيڭنىڭ (سي تسزينپين/Xi Jinping) نۇسقاۋىمەن بولعانىن دالەلدەيدى.

قكپ-نىڭ 400 بەتتەن اساتىن قۇپيا قۇجاتتارى شىنجاڭداعى قازاق، ۇيعىر جانە باسقا دا از ساندى ۇلتتارعا كورسەتىلىپ جاتقان قىسىمنىڭ نەگىزى دەۋگە دە بولادى. وندا از ساندى ۇلت وكىلدەرىن ۇلتتىق، دىندىك سەنىمدەرىنەن اجىراتۋ ءۇشىن «ءبىلىم بەرۋ ورتالىقتارى» دەپ اتالاتىن لاگەرلەرگە قاماۋ جانە باسقا دا ارەكەتتەر تولىعىمەن، ەگجەي-تەگجەيلى كورسەتىلەدى. ءتىپتى، لاگەرلەرگە قامالعان اتا-انالاردىڭ ىشكى قىتايداعى نەمەسە شەتەلدە وقىپ جاتقان بالالارىنا قالاي ءتۇسىندىرۋ كەرەكتىگىنە دەيىن كورسەتىلگەن.

انىعىندا، The New York Times باسىلىمى قكپ-نىڭ 403 بەت ىشكى قۇجاتىن قولعا تۇسىرگەن. بۇل قىتاي قىزىل پارتياسىنىڭ سوڭعى ون جىلدىقتارداعى ەڭ ۇلكەن جوعالتۋى دەۋگە بولادى. بۇل قۇجاتتار قىتاي بيلىك پارتياسىنىڭ شىن بەينەسىن الەم الدىندا اشىپ تاستادى دەسە دە بولادى. اتالعان باسىلىم حابارىندا: «بۇل قۇجاتتار قىتايدان سىرتقى الەم ءۇشىن ءۇش جىل بۇرىن باستالعان جانە قازىر دە شىنجاڭدا بولىپ جاتقان جاعدايلاردىڭ شىن ءمانىن تۇسىنۋگە مۇمكىندىك بەردى»، – دەگەن.

قۇجاتتىڭ قالاي جيناقتالىپ، قالاي شىعارىلعانى تۋرالى انىق مالىمەت جوق. تەك، اتى-ءجونىن بىلدىرگىسى كەلمەگەن قىتاي بيلىك پارتياسىنىڭ وكىلى بەرگەنى تۋرالى ايتىلادى. دەگەنمەن، اتالعان قۇجاتتار قىتاي كوممۋنيستىك پارتياسىنىڭ شىنجاڭعا باعىتتاعان قىسىمىنىڭ جۇرت ويلاعاننان دا اۋىر ەكەنىن تۇسىندىرەدى. ءارى، بەيجىڭ بيلىگىنىڭ ماۋ زىدوڭ (ماو تسزەدۋن) داۋىرىنەن بەرى شىنجاڭدى قانداي قىسىم استىندا ۇستاپ كەلگەنىن كورسەتەدى.

“The Qazaq Times”