فوتو: اشىق دەرەككوز

كوكجايلاۋ جوباسىن جۇزەگە اسىرۋعا تىيىم سالۋ جونىندە شەشىم بۇۇ تاراپىنان دا قولداۋ تاپتى. بۇل تۋرالى قر پرەزيدەنتىنىڭ ءباسپاسوز حاتشىسى بەرىك ءۋالي ايتتى.

بەرىك ءۋالي ءوزىنىڭ پاراقشاسىندا: «جاقىندا عانا پرەزيدەنت قاسىم-جومارت كەمەلۇلى كوكجايلاۋ جوباسىن جۇزەگە اسىرۋعا تىيىم سالۋ جونىندە شەشىم شىعارعانى ءمالىم. بۇگىندە وسى ماڭىزدى ۇيعارىم ءوز ەلىمىزبەن قاتار الەم قاۋىمداستىعىنىڭ ايرىقشا نازارىن اۋدارتىپ وتىر. بۇل شەشىم بۇۇ تاراپىنان دا قولداۋ تاپتى. مەملەكەت باسشىسىنىڭ اتىنا بۇۇ باس حاتشىسىنىڭ ورىنباسارى، بۇۇ-نىڭ ەۋروپالىق ەكونوميكالىق كوميسسياسىنىڭ اتقارۋشى حاتشىسى ولگا الگاەروۆانىڭ حاتى كەلىپ ءتۇستى»، – دەپ جازدى.

الماتىعا جاقىن «مەدەۋ» مۇز ايدىنىنان ءتورت كيلومەتر قاشىقتىقتا ورنالاسقان شاتقالعا كۋرورت سالۋ جوباسى 2002 جىلى كوتەرىلگەن. الماتى بيلىگى ونىڭ تاۋ ەكوجۇيەسىنە زيان كەلتىرمەيتىنىن ايتادى. قالالىق اكىمدىكتىڭ پىكىرىنشە، جوبا ءتۋريزمدى دامىتۋ ءۇشىن وتە ماڭىزدى.

كوكجايلاۋعا كۋرورت سالۋعا قارسى قوعامدىق ەكولوگتاردىڭ شاعىمى بويىنشا سوتتا بەس ءىس قارالدى. پروكۋراتۋراعا جيىرمادان استام ارىز ءتۇستى.

بيىل قازاننىڭ سوڭىندا الماتىعا جۇمىس ساپارىمەن كەلگەن پرەزيدەنت قاسىم-جومارت توقاەۆ كوكجايلاۋعا سالىناتىن تاۋ شاڭعىسى كۋرورتىنىڭ جوباسىن توقتاتۋ قاجەتتىگىن ايتقان. ونىڭ «بۇل ماسەلەگە قايتا-قايتا ورالا بەرمەس ءۇشىن بۇگىن ءبىرجولا تىيىم سالدىم. كوكجايلاۋ تاۋ-شاڭعىسى كۋرورتىنا قاجەتتىلىك جوق» دەگەن ءسوزى باسپاسوزدە جاريالاندى.

سونىمەن قاتار، قازاقستان پرەزيدەنتى قاسىم-جومارت توقاەۆ 29 قازاندا الماتى قالاسىنىڭ الەۋمەتتىك-ەكونوميكالىق دامۋىنا ارنالعان وتىرىستا بۇرىن زاڭسىز بەرىلگەن جەرلەردى ىلە الاتاۋى ۇلتتىق پاركىنە قايتارۋ قاجەتتىگىن دە مالىمدەگەن ەدى.

"The Qazaq Times"