Körneki suret. Foto: aşıq derekköz

Biıl respublikanıñ är aymağında atıs qaruın negizsiz qoldanu oqiğaları jiilegen.

Köp jağdayda qasaqana jasalatın asa auır qılmıstar işki ister organdarında tirkelmegen zañsız qarulardı qoldanumen bolıp jatadı. Demek elde  suıq qarudıñ köleñkeli saudasına äli de erkindik berilip otır. 2018 jılğı ligitimdi bazadağı derek boyınşa, Türkistan oblısında  15 061 qaru iesiniñ qolında tirkelgen 18 546 qarudıñ esebi anıqtalğan. 4 897 şımkenttiktiñ ieliginde 6 253 qaru bar.

Beybit küni qaru qoldanudıñ qatañ reglamentin bwzatındarğa tıyım bolmay twr. Qwdaydıñ qwttı küni eldi tiksintken atıs, oq jaudıru, betpe-bet kelip bıtıramen jayratıp ketu köbeygen. Mwnıñ sebebin azamattıq qoğam İİM qauipsizdik uäzipasınıñ üdesinen şığa almauımen baylanıstıradı.

Bir ğana aqparattıq portaldıñ qorjınındağı biıl bolğan qarumen oq atu faktileri:

  1. 7 naurız Almatıdağı Bostandıq audanınıñ ortalığında tört adam atısqanı esimizde.
  2. Şımkentte 21-22 naurız Täuke han dañğılı boyındağı tüngi klubtardıñ birinde qonaqtardıñ arasında töbeles şığıp, soñı atısqa wlastı. Qarulı qaqtığıs saldarınan eki adam zardap şekti.
  3. 29 naurız Atırau halıqaralıq äuejayında äyeldiñ (Natal'ya Dajuk) ayağına abaysızda oq atıp alğan policiya serjantı Mämbetiyarov atağınan ayırılıp, jwmıstan quılğan.
  4. 16 säuir sağat 21:45-te Aqtaudağı 32B şağınaudanında üyiniñ balkon terezesinen köşege oq atqan er adam öziniñ äreketin beynejazbağa tartıp, instagram jelisine «Köñil-küyiñ naşar bolğanda, işiñdegini osılay şığaru kerek» degen jazbamen jüktegen bolatın.
  5. Däl osı küni keşkilik Atırauda Maqat audanınıñ twrğınına eki auıldası (1973 jäne 2002 j.j.) bıtıramen oq atıp, sol iığınan jaraqattanıp jansaqtau böliminde köz jwmğan.
  6. Säuirdiñ soñına qaray Qostanay twrğını Sportivnaya köşesiniñ mañındağı üy aulasında twrıp avtomattan oq atqan oqiğa eldiñ üreyin wşırğan bolatın.
  7. Tamızdıñ 7-si Almatıdağı 28 gvardiyalıq-panfilovşılar atındağı sayabaqta belgisiz er adam tapanşamen aspanğa oq atqan.
  8. 25 tamız elorda köşeleriniñ birinde janjaldasqan toptıñ biri mıltıqpen qarsılastarına oq jaudırıp, saldarınan üş adam jaraqat alıp, bireui köz jwmğan.
  9. 26 tamız küni, tañğı 4.00-ter şamasında Petropavl qalasında biznesmenge eki küdikti (1990 jäne 1997 j.j.) şabuıl jasap, oq atqan bolatın.
  10. 26 tamızda Talğarğa audan äkiminiñ qabıldauına kelgen qoğam belsendisi Galina Arzamasovağa äkimdik ğimaratınıñ aldında Panfilov auıldıq okruginiñ äkimi Nwrğali Appazov pen onıñ jürgizuşisi Ğani Smanov oq atıp, jerlesin jambas süyeginen jaraqattağan.
  11. 6 qırküyek Pavlodar twrğını mazamdı aldı degen sebeppen päteriniñ terezesinen marşruttıq taksige pnevmatikalıq qarumen oq atqan.
  12. 9 qırküyek tüs äletinde mektepte boluı tiis bir top şımkenttik oquşı trassa boyında töbelesip, bir-birimen atısqan.
  13. 15 qırküyek Qarağandı ortalığındağı tüngi klubtardıñ birinde belgisiz bir top adam oq atqan.
  14. 9 qazan Qarağandıda belgisiz adam jolauşılar tolı üş avtobusqa: 70-ke juıq jolauşısı bar № 33, 120 jolauşı bolğan № 45 jäne 45-ke tarta jolauşı №40 avtobustarğa pnevmatikalıq qarudan oq jaudırğan.
  15. 29 qazan Şımkent qalasınıñ Arğınbekov köşesindegi dämhanada er adam oq jaudırıp, saldarınan bir azamat köz jwmıp, bes kisi jaralanğan.

Zayırlı äri demokratiyalıq qwndılıqtarğa arqa süyeytin qwqıqtıq qoğamnıñ bastı baylığı - adam desek, onıñ ömiriniñ qauipsizdigine negizsiz nwqsan keltiretin mwnday orınsız jağdaylarğa jol bergen joğarı vedomstvo men küştik qwrılımdardıñ beybit halıqtıñ tınıştığın saqtau-qorğau qızmetin jetildiru mindeti kezek küttirmeytinin tüsinse kerek-ti. Qazaqstanda tirkelgen-tirkelmegen atıs qaruların qoldanu faktisi, onda jaralanğandar men zardap şekkenderdiñ, qaytıs bolğandardıñ statistikası jasalmaydı.

"The Qazaq Times"