قازاقستاندا اتىس وقيعالارى جيىلەگەن

بيىل رەسپۋبليكانىڭ ءار ايماعىندا اتىس قارۋىن نەگىزسىز قولدانۋ وقيعالارى جيىلەگەن.

كوپ جاعدايدا قاساقانا جاسالاتىن اسا اۋىر قىلمىستار ىشكى ىستەر ورگاندارىندا تىركەلمەگەن زاڭسىز قارۋلاردى قولدانۋمەن بولىپ جاتادى. دەمەك ەلدە  سۋىق قارۋدىڭ كولەڭكەلى ساۋداسىنا ءالى دە ەركىندىك بەرىلىپ وتىر. 2018 جىلعى ليگيتيمدى بازاداعى دەرەك بويىنشا، تۇركىستان وبلىسىندا  15 061 قارۋ يەسىنىڭ قولىندا تىركەلگەن 18 546 قارۋدىڭ ەسەبى انىقتالعان. 4 897 شىمكەنتتىكتىڭ يەلىگىندە 6 253 قارۋ بار.

بەيبىت كۇنى قارۋ قولدانۋدىڭ قاتاڭ رەگلامەنتىن بۇزاتىندارعا تىيىم بولماي تۇر. قۇدايدىڭ قۇتتى كۇنى ەلدى تىكسىنتكەن اتىس، وق جاۋدىرۋ، بەتپە-بەت كەلىپ بىتىرامەن جايراتىپ كەتۋ كوبەيگەن. مۇنىڭ سەبەبىن ازاماتتىق قوعام ءىىم قاۋىپسىزدىك ءۋازيپاسىنىڭ ۇدەسىنەن شىعا الماۋىمەن بايلانىستىرادى.

ءبىر عانا اقپاراتتىق پورتالدىڭ قورجىنىنداعى بيىل بولعان قارۋمەن وق اتۋ فاكتىلەرى:

1. 7 ناۋرىز الماتىداعى بوستاندىق اۋدانىنىڭ ورتالىعىندا ءتورت ادام اتىسقانى ەسىمىزدە.
2. شىمكەنتتە 21-22 ناۋرىز تاۋكە حان داڭعىلى بويىنداعى تۇنگى كلۋبتاردىڭ بىرىندە قوناقتاردىڭ اراسىندا توبەلەس شىعىپ، سوڭى اتىسقا ۇلاستى. قارۋلى قاقتىعىس سالدارىنان ەكى ادام زارداپ شەكتى.
3. 29 ناۋرىز اتىراۋ حالىقارالىق اۋەجايىندا ايەلدىڭ (ناتاليا داجۋك) اياعىنا ابايسىزدا وق اتىپ العان پوليتسيا سەرجانتى مامبەتياروۆ اتاعىنان ايىرىلىپ، جۇمىستان قۋىلعان.
4. 16 ءساۋىر ساعات 21:45-تە اقتاۋداعى 32ب شاعىناۋدانىندا ءۇيىنىڭ بالكون تەرەزەسىنەن كوشەگە وق اتقان ەر ادام ءوزىنىڭ ارەكەتىن بەينەجازباعا تارتىپ، ينستاگرام جەلىسىنە «كوڭىل-كۇيىڭ ناشار بولعاندا، ىشىڭدەگىنى وسىلاي شىعارۋ كەرەك» دەگەن جازبامەن جۇكتەگەن بولاتىن.
5. ءدال وسى كۇنى كەشكىلىك اتىراۋدا ماقات اۋدانىنىڭ تۇرعىنىنا ەكى اۋىلداسى (1973 جانە 2002 ج.ج.) بىتىرامەن وق اتىپ، سول يىعىنان جاراقاتتانىپ جانساقتاۋ بولىمىندە كوز جۇمعان.
6. ءساۋىردىڭ سوڭىنا قاراي قوستاناي تۇرعىنى سپورتيۆنايا كوشەسىنىڭ ماڭىنداعى ءۇي اۋلاسىندا تۇرىپ اۆتوماتتان وق اتقان وقيعا ەلدىڭ ۇرەيىن ۇشىرعان بولاتىن.
7. تامىزدىڭ 7-ءسى الماتىداعى 28 گۆارديالىق-پانفيلوۆشىلار اتىنداعى ساياباقتا بەلگىسىز ەر ادام تاپانشامەن اسپانعا وق اتقان.
8. 25 تامىز ەلوردا كوشەلەرىنىڭ بىرىندە جانجالداسقان توپتىڭ ءبىرى مىلتىقپەن قارسىلاستارىنا وق جاۋدىرىپ، سالدارىنان ءۇش ادام جاراقات الىپ، بىرەۋى كوز جۇمعان.
9. 26 تامىز كۇنى، تاڭعى 4.00-تەر شاماسىندا پەتروپاۆل قالاسىندا بيزنەسمەنگە ەكى كۇدىكتى (1990 جانە 1997 ج.ج.) شابۋىل جاساپ، وق اتقان بولاتىن.
10. 26 تامىزدا تالعارعا اۋدان اكىمىنىڭ قابىلداۋىنا كەلگەن قوعام بەلسەندىسى گالينا ارزاماسوۆاعا اكىمدىك عيماراتىنىڭ الدىندا پانفيلوۆ اۋىلدىق وكرۋگىنىڭ اكىمى نۇرعالي اپپازوۆ پەن ونىڭ جۇرگىزۋشىسى عاني سمانوۆ وق اتىپ، جەرلەسىن جامباس سۇيەگىنەن جاراقاتتاعان.
11. 6 قىركۇيەك پاۆلودار تۇرعىنى مازامدى الدى دەگەن سەبەپپەن پاتەرىنىڭ تەرەزەسىنەن مارشرۋتتىق تاكسيگە پنەۆماتيكالىق قارۋمەن وق اتقان.
12. 9 قىركۇيەك ءتۇس الەتىندە مەكتەپتە بولۋى ءتيىس ءبىر توپ شىمكەنتتىك وقۋشى تراسسا بويىندا توبەلەسىپ، ءبىر-بىرىمەن اتىسقان.
13. 15 قىركۇيەك قاراعاندى ورتالىعىنداعى تۇنگى كلۋبتاردىڭ بىرىندە بەلگىسىز ءبىر توپ ادام وق اتقان.
14. 9 قازان قاراعاندىدا بەلگىسىز ادام جولاۋشىلار تولى ءۇش اۆتوبۋسقا: 70-كە جۋىق جولاۋشىسى بار № 33, 120 جولاۋشى بولعان № 45 جانە 45-كە تارتا جولاۋشى №40 اۆتوبۋستارعا پنەۆماتيكالىق قارۋدان وق جاۋدىرعان.
15. 29 قازان شىمكەنت قالاسىنىڭ ارعىنبەكوۆ كوشەسىندەگى ءدامحانادا ەر ادام وق جاۋدىرىپ، سالدارىنان ءبىر ازامات كوز جۇمىپ، بەس كىسى جارالانعان.

زايىرلى ءارى دەموكراتيالىق قۇندىلىقتارعا ارقا سۇيەيتىن قۇقىقتىق قوعامنىڭ باستى بايلىعى - ادام دەسەك، ونىڭ ءومىرىنىڭ قاۋىپسىزدىگىنە نەگىزسىز نۇقسان كەلتىرەتىن مۇنداي ورىنسىز جاعدايلارعا جول بەرگەن جوعارى ۆەدومستۆو مەن كۇشتىك قۇرىلىمداردىڭ بەيبىت حالىقتىڭ تىنىشتىعىن ساقتاۋ-قورعاۋ قىزمەتىن جەتىلدىرۋ مىندەتى كەزەك كۇتتىرمەيتىنىن تۇسىنسە كەرەك-ءتى. قازاقستاندا تىركەلگەن-تىركەلمەگەن اتىس قارۋلارىن قولدانۋ فاكتىسى، وندا جارالانعاندار مەن زارداپ شەككەندەردىڭ، قايتىس بولعانداردىڭ ستاتيستيكاسى جاسالمايدى.

"The Qazaq Times"