Resey astanasında ötken «Mäskeu prem'erası» halıqaralıq kinofestivalinde otandasımız belgili rejisser Ämir Bayğazinniñ «Reka» fil'mi bas jüldeni qanjılağan.

Qazaqstannıñ Reseydegi elşiligi  arthaus bağıtında eñbektenip kele jatqan, täuelsiz avtorlıq fil'mderimen otandıq kinomatografiyada bağın sınap jürgen jas rejisser Ämir Bayğazinniñ «Reka» fil'mi bayqaudıñ bas jüldesin (gran-pri) jeñip alğanın süyinşiley jariyaladı. «Mäskeu prem'erası» festivali 29 qazannan 3 qaraşağa deyin «Gorizont» kinoteatrında ötkizilgen. Oğan Qazaqstan, Armeniya, Qırğızstan, Moldova, Ukraina, Gruziya, Latviya, Estoniya, Resey elderiniñ kinomatograftarı qatıstı. Festival' ayasında tolıq metrajdı jäne qısqa metrajdı fil'mderdiñ bayqauı bolıp, äri «Halıqtar dostığı» ciklinde bwrınğı üzdik fil'mder, birlese şığarılğan kinolar körsetilipti. Festival'de negizgi qazılar alqasınan bölek, Resey kinoklubtarınıñ qazılar alqası da kartinalarğa bağasın berip otırdı. Bwğan deyin 75-şi Veneciya kinofestivalinde «Kökjiekter» bağdarlamasınıñ «Altın arıstan» jüldesin jeñip alğan «Reka» fil'mi bwl jolı da üzdik dep tanıldı. Qazaqstan atınan Sergey Dvorcevoydıñ «Ayka» jäne Ädilhan Erjanovtıñ «Rieltor» fil'mderi bayqaudan tıs körsetilim ayasında körermenderge wsınıldı. Qısqa metrajdı fil'mder bayqauına jas rejisserlar Eldar Şibanovtıñ «Zoopark» jäne Şwğıla Serjannıñ «Samal» fil'mderi qatısqan.

Bwğan deyin 2017 jılı qazaqstandıq rejisser Ämir Bayğazinniñ «Jaralı perişte» körkem fil'mi Slovakiyanıñ Koşica qalasında ötken 24-şi Halıqaralıq «Art Film Fest» kinofestivalinde «Üzdik rejisser» jüldesin jeñip alğan bolatın.

"The Qazaq Times"