رەسەي استاناسىندا وتكەن «ماسكەۋ پرەمەراسى» حالىقارالىق كينوفەستيۆالىندە وتانداسىمىز بەلگىلى رەجيسسەر ءامىر بايعازيننىڭ «رەكا» ءفيلمى باس جۇلدەنى قانجىلاعان.

قازاقستاننىڭ رەسەيدەگى ەلشىلىگى  ارتحاۋس باعىتىندا ەڭبەكتەنىپ كەلە جاتقان، تاۋەلسىز اۆتورلىق فيلمدەرىمەن وتاندىق كينوماتوگرافيادا باعىن سىناپ جۇرگەن جاس رەجيسسەر ءامىر بايعازيننىڭ «رەكا» ءفيلمى بايقاۋدىڭ باس جۇلدەسىن (گران-پري) جەڭىپ العانىن سۇيىنشىلەي جاريالادى. «ماسكەۋ پرەمەراسى» فەستيۆالى 29 قازاننان 3 قاراشاعا دەيىن «گوريزونت» كينوتەاترىندا وتكىزىلگەن. وعان قازاقستان، ارمەنيا، قىرعىزستان، مولدوۆا، ۋكراينا، گرۋزيا، لاتۆيا، ەستونيا، رەسەي ەلدەرىنىڭ كينوماتوگرافتارى قاتىستى. فەستيۆال اياسىندا تولىق مەتراجدى جانە قىسقا مەتراجدى فيلمدەردىڭ بايقاۋى بولىپ، ءارى «حالىقتار دوستىعى» تسيكلىندە بۇرىنعى ۇزدىك فيلمدەر، بىرلەسە شىعارىلعان كينولار كورسەتىلىپتى. فەستيۆالدە نەگىزگى قازىلار القاسىنان بولەك، رەسەي كينوكلۋبتارىنىڭ قازىلار القاسى دا كارتينالارعا باعاسىن بەرىپ وتىردى. بۇعان دەيىن 75-ءشى ۆەنەتسيا كينوفەستيۆالىندە «كوكجيەكتەر» باعدارلاماسىنىڭ «التىن ارىستان» جۇلدەسىن جەڭىپ العان «رەكا» ءفيلمى بۇل جولى دا ۇزدىك دەپ تانىلدى. قازاقستان اتىنان سەرگەي دۆورتسەۆويدىڭ «ايكا» جانە ءادىلحان ەرجانوۆتىڭ «ريەلتور» فيلمدەرى بايقاۋدان تىس كورسەتىلىم اياسىندا كورەرمەندەرگە ۇسىنىلدى. قىسقا مەتراجدى فيلمدەر بايقاۋىنا جاس رەجيسسەرلار ەلدار شيبانوۆتىڭ «زووپارك» جانە شۇعىلا سەرجاننىڭ «سامال» فيلمدەرى قاتىسقان.

بۇعان دەيىن 2017 جىلى قازاقستاندىق رەجيسسەر ءامىر بايعازيننىڭ «جارالى پەرىشتە» كوركەم ءفيلمى سلوۆاكيانىڭ كوشيتسا قالاسىندا وتكەن 24-ءشى حالىقارالىق «Art Film Fest» كينوفەستيۆالىندە «ۇزدىك رەجيسسەر» جۇلدەسىن جەڭىپ العان بولاتىن.

"The Qazaq Times"