Taliban ökili Suhail Şahin mälimdeme jasadı. Foto: Reyter7

Keşe Taliban ökili Suhail Şahin mälimdeme jasap, Auğanstannıñ işki beybitşilik kelissözderiniñ jaña raundı kelesi aptada Qıtayda ötetinin bildirdi. Auğanstandağı zorlıq-zombılıq äreketterdiñ sanı artqanımen, beybitşilik kelissözderi de qatar jürip jatır. Al, soñğı uaqıttarda Qıtay tarabı da Auğanstandağı işki mäselelerge belsendi aralasa bastadı. Bwğan Tramptıñ AQŞ äskerlerin Auğanstannan şığaru turalı şeşimi de özindik äserin tigizdi.

Mälimdemede aytıluınşa, kelissözderdiñ jaña raundı 28-29 aqpan künderi ötedi. Auğanstan resmi ökilderinen 25 adam, al tälipter tarabınan 15 adam eki kündik kelissözge qatısatını belgili boldı. Bwl şilde ayında Doha qalasında ötken Talibannıñ jan-jaqtı kelissözinen keyingi alğaşqı ülken kezdesui. Taliban wyımınıñ Dohada sayasi byurosınıñ ornalasqanı da belgili. Kezekti kelissözdiñ Qıtayda ötetini de köptegen elderdiñ nazarın audarmay qoymaydı.

Auğanstan men Qıtaydıñ Şıñjañı şekaralasıp jatır. Qıtay ükimeti Auğanstandağı qarulı toptar men Şınjañdağı «ekstremistik toptar» dep atalğan toptardıñ baylanıs ornatuınan alañdap kelgen. Qırküyek ayında AQŞ täliptermen beybit kelissözdi toqtatqannan keyin Qıtay Auğanstandağı ıqpalı barğan sayın küşeyip kele jatqan täliptermen dialog mümkindigine ie boldı.

Tälipter qazir Auğanstan ükimetin «AQŞ-tıñ quırşağı» dep qaraytındıqtan, Kabuldağı  resmi ükimetpen kelissözdi toqtatqan. Sondıqtan ükimet ökilderi kelissözge jeke öz atınan qatısuda. Soğan qaramastan, Auğanstan Sırtqı ister ministrligi kelissözdi qoldaytının jetkizdi.

Al, düysenbi küni AQŞ Memlekettik departamenti mälimdeme jasap, AQŞ-tıñ Auğanstandağı arnayı ökili Zalmay Halizad Auğanstanda beybitşilik ornatu maqsatında BWW, NATO jäne Euroodaqtı qamtığan Auğanstan beybitşilik kelissöziniñ jaña kezeñin bastaytının aytqan. Bwğan qosa Halizad Auğanstan beybitşilik kelissözderin tolıqtıru maqsatında Resey men Qıtay ökilderine de kezdesetini mälim boldı. Ayta ketu kerek, bir jıl işinde Zalmay Halizad täliptermen 9 märte kelissöz jürgizip, soñğı sätti Tramp kelisimdi jaramsız dep şeşim şığarğan bolatın.

Tramp ükimeti Auğanstandağı AQŞ-tıñ 14 mıñnan astam sarbazın elge qaytaru şeşimin jalğastıruğa tırısıp jatır. Tramptıñ pikirinşe Auğanstannıñ qauipsizdigi men beybitşiligin endi Auğanstan ükimet küşteri öz moynına aluı kerek.

Auğanstandağı AQŞ äskerleriniñ sanı 8 mıñ 600 adamğa deyin qısqaruı mümkin. Onı ötken demalıs künderi Auğanstanğa twñğış ret saparlay barğan Pentagonnıñ qazirgi basşısı Mark Esper mälimdedi. Bir sözben aytqanda Auğanstan äli de derjavalar arasındağı tartıstı oyınnıñ maydanı bola tüsude. Özgerisi tek Qıtaydıñ Auğanstandağı ıqpalınıñ barğan sayın artıp kele jatuında. Auğanstan mäselesi Ortalıq Aziyağa tikeley äsker etetindikten, elimizdiñ strateg-sayasatkerleriniñ bwğan basa män berui tiis.

“The Qazaq Times”