Foto: https://asiaplustj.info

Qazaq-özbek şekarasındağı «Qonısbaev» ötkizu beketi qayta qwru jwmıstarına baylanıstı 2020 jılğa deyin jabıladı. Bwl turalı Özbekstannıñ memlekettik keden komitetiniñ resmi saytında aytılğan.

Salalıq vedomstvonıñ mälimetinşe, jayau jürginşiler, jeñil jäne jük kötergiştigi 3,5 tonnağa deyingi jük kölikteriniñ qozğalısı 1 qaraşadan bastap toqtatıladı. Osığan baylanıstı Özbekstannıñ memlekettik keden komiteti jayau jürginşiler, tauarlar men kölik qwralın ötkizetin sırtqı ekonomikalıq qızmetke qatısuşılar balama baqılau-ötkizu punktteri arqılı şekaradan öte alatının habarlaydı.

Ayta keteyik, Qazaqstannıñ «Qonısbaev» şekaralıq baqılau-ötkizu beketi Türkistan oblısında ornalasqan. Şekara ötkelinde Özbekstan jaqtan Taşkent oblısınıñ Çinaz audanında aşılğan «YAllama» ötkizu punkti bar.

"The Qazaq Times"