Resey prezidenti Vladimir Putinniñ Türkiya prezidenti Rejep Tayıp Erdoğanmen kezdesui 22 qazanda Soçide ötedi. Bwl turalı Resey prezidentiniñ baspasöz hatşısı Dmitriy Peskov habarladı.

Taraptar  Türkiyanıñ Süriyadağı äskeri operaciyasın talqılap, S-400 zımırandarı jöninde kelissöz jürgizu josparlağan. Osığan deyin Erdoğan: «S-400 zımıran jüyesi Türkiyağa beybitşilik jäne twraqtılıq ornatuğa kömektesedi. Bizdiñ tarapımızdan qabıldanıp jatqan şaralardıñ barlığı Türkiya qorğanısın küşeytuge bağıttalğan. Ankaranıñ soğıs aşu josparı joq», – dep mälimdegen bolatın.

2017 jılı jeltoqsanda Türkiya Reseymen S-400 zımıran jüyesin satıp aluğa baylanıstı qwnı 2,5 milliard dollardı qwraytın kelisimge kelgen. 12 şildede Ankara S-400 jüyesiniñ alğaşqı legin qabıldap alğan.

Putinniñ türik köşbasşısın kezdesuge şaqıruınıñ tağı bir sebebi – Süriya dağdarısı. 9 qazanda Türkiya Süriyanıñ soltüstiginde «Beybitşilik qaynarı» atalatın arnayı operaciya bastağan. Türik aviaciyası men artilleriyası körşi el aumağındağı kürd jasaqtarın soqqığa aldı. Äskeri operaciyanıñ maqsatı – lañkesterge oñtüstik şekarada däliz qwruğa jol bermeu.

"The Qazaq Times"