QM mälimeti boyınşa Arıstağı äskeri arsenaldıñ 70%-ı örtengen. Qaru-jaraq qoymasında kem degende 40-50 märte jarılıs bolğan. 24 mausım 2019 jıl. Foto: Azattıq/Reuters

Küni keşe, qazannıñ 11-i Türkistan oblısında Arısqa jaqın mañda (qaladan 60 şaqırımday jerde) ornalasqan poligonda äskeri qızmetker qaza taptı.

QR Qorğanıs ministrliginiñ «Aqparattıq habarlamasında» körsetilgendey, «oq-därilerdiñ jinalğan fragmentterin joyu boyınşa josparlı jwmıs barısında oq-däri fragmenti» jarılıp, top jetekşisi, äskeri bölimniñ injenerlik qızmetiniñ bastığı, mayor A.S.Aqışev «auır jaraqat alıp», köz jwmğan.

Vedomstvo oqiğanıñ jay-japsarı anıqtalıp jatqanın, poligonda tergeu tobı jwmıs istep jatqanın habarladı. Olardıñ sözinşe, «poligonğa jaqın ornalasqan qala twrğındarına qauip töndirmeydi», alañdauğa negiz joq.

Habarlamada Qorğanıs ministrligi qaza bolğan äskeri qızmetşiniñ tuıstarı men dostarına köñil aytıp, äri olarğa ükimet jağınan barlıq qajetti kömek körsetetini aytılğan.

Esteriñizde bolsa, mausımnıñ 24-i Arıs qalasında äskeri qoyma jarılıp, saldarınan tört adam qaza tapqan. Resmi derek boyınşa, ondağı oq-däriniñ 70 payızdan astamı jarılıp ketken. Qaladağı twrğın üylerdiñ basım böligi bülingen.

Arıs qalasında äskeri qoyma aumağında 5 şildede qaladağı «qalıp qalğan 1-2 snaryad jarılıp, artınşa ört şıqqan, al 13 qırküyek oq-däri bölşekteri jarılıp, tört äskeri jaralansa, 21 qırküyek on saper jaralanıp, üş äskeri qızmetkerdiñ auır halde auruhanağa jetkizilgen bolatın. 2009 jıldan beri Arısta tört ret jarılıs orın alıp, saldarınan ötken jwmadağı mayor Aqışevti qosa eseptegende 12 adam köz jwmğan: 2009 jıldıñ naurızı – tört kisi, 2014 jıldıñ mausımı – 2 adam, 2015 jıldıñ qaraşası – bir kisi, 2019 jıldıñ mausımı – 4 adam.

Biıl 24 mausımdağı 45 mıñ twrğını bar Arıs jwrtınıñ jüregin şaylıqtırğan alapat jarılıstan keyin  qorğanıs ministrligi äskeri oq-däriniñ qalğan 30 payızı tüpkilikti türde  tügel köşiriletinin mälimdegen edi. Köşiru jwmıstarı aldağı jıldıñ mamır ayında ayaqtaluı tiis.

"The Qazaq Times"