ون ەكىنشى ءولىم: ارىس ماڭىنداعى پوليگوندا ءبىر مايور قازا تاپتى

كۇنى كەشە، قازاننىڭ 11-ءى تۇركىستان وبلىسىندا ارىسقا جاقىن ماڭدا (قالادان 60 شاقىرىمداي جەردە) ورنالاسقان پوليگوندا اسكەري قىزمەتكەر قازا تاپتى.

قر قورعانىس مينيسترلىگىنىڭ «اقپاراتتىق حابارلاماسىندا» كورسەتىلگەندەي, «وق-دارىلەردىڭ جينالعان فراگمەنتتەرىن جويۋ بويىنشا جوسپارلى جۇمىس بارىسىندا وق-ءدارى فراگمەنتى» جارىلىپ، توپ جەتەكشىسى، اسكەري ءبولىمنىڭ ينجەنەرلىك قىزمەتىنىڭ باستىعى، مايور ا.س.اقىشەۆ «اۋىر جاراقات الىپ»، كوز جۇمعان.

ۆەدومستۆو وقيعانىڭ جاي-جاپسارى انىقتالىپ جاتقانىن، پوليگوندا تەرگەۋ توبى جۇمىس ىستەپ جاتقانىن حابارلادى. ولاردىڭ سوزىنشە، «پوليگونعا جاقىن ورنالاسقان قالا تۇرعىندارىنا قاۋىپ توندىرمەيدى»، الاڭداۋعا نەگىز جوق.

حابارلامادا قورعانىس مينيسترلىگى قازا بولعان اسكەري قىزمەتشىنىڭ تۋىستارى مەن دوستارىنا كوڭىل ايتىپ، ءارى ولارعا ۇكىمەت جاعىنان بارلىق قاجەتتى كومەك كورسەتەتىنى ايتىلعان.

ەستەرىڭىزدە بولسا، ماۋسىمنىڭ 24-ءى ارىس قالاسىندا اسكەري قويما جارىلىپ، سالدارىنان ءتورت ادام قازا تاپقان. رەسمي دەرەك بويىنشا، ونداعى وق-ءدارىنىڭ 70 پايىزدان استامى جارىلىپ كەتكەن. قالاداعى تۇرعىن ۇيلەردىڭ باسىم بولىگى بۇلىنگەن.

ارىس قالاسىندا اسكەري قويما اۋماعىندا 5 شىلدەدە قالاداعى «قالىپ قالعان 1-2 سنارياد جارىلىپ، ارتىنشا ءورت شىققان، ال 13 قىركۇيەك وق-ءدارى بولشەكتەرى جارىلىپ، ءتورت اسكەري جارالانسا، 21 قىركۇيەك ون ساپەر جارالانىپ، ءۇش اسكەري قىزمەتكەردىڭ اۋىر حالدە اۋرۋحاناعا جەتكىزىلگەن بولاتىن. 2009 جىلدان بەرى ارىستا ءتورت رەت جارىلىس ورىن الىپ، سالدارىنان وتكەن جۇماداعى مايور اقىشەۆتى قوسا ەسەپتەگەندە 12 ادام كوز جۇمعان: 2009 جىلدىڭ ناۋرىزى – ءتورت كىسى، 2014 جىلدىڭ ماۋسىمى – 2 ادام، 2015 جىلدىڭ قاراشاسى – ءبىر كىسى، 2019 جىلدىڭ ماۋسىمى – 4 ادام.

بيىل 24 ماۋسىمداعى 45 مىڭ تۇرعىنى بار ارىس جۇرتىنىڭ جۇرەگىن شايلىقتىرعان الاپات جارىلىستان كەيىن  قورعانىس مينيسترلىگى اسكەري وق-ءدارىنىڭ قالعان 30 پايىزى تۇپكىلىكتى تۇردە  تۇگەل كوشىرىلەتىنىن مالىمدەگەن ەدى. كوشىرۋ جۇمىستارى الداعى جىلدىڭ مامىر ايىندا اياقتالۋى ءتيىس.

"The Qazaq Times"