Qıtaydıñ memlekettik energetikalıq kompaniyası Irandağı tabiği gaz jobasınan bas tarttı. Iran mwnay ministri Bijan Zanganeh birneşe kün bwrın departamenttiñ veb-saytında: «Qıtaydıñ Wlttıq Mwnay-Gaz Korporaciyası (CNPC) Irandağı Oñtüstik Pars gaz ken ornın igeru jönindegi ıntımaqtastıq jobasınan bas tarttı», – dep mälimdedi. Bwl atalğan kompaniyanıñ Tehranğa qarsı AQŞ sankciyalarınan qısım körgennen keyingi şeşimi.

Iran mwnay ministriniñ mälimdeuinşe, Qıtay wlttıq kompaniyası bas tartqan jobanı Irannıñ Petropars wlttıq kompaniyası öz betimen igermek. Kompaniya bastapqıda jobanı äzirleu üşin qıtaydıñ PetroChina jäne francuzdıñ Total kompaniyalarımen istestik jasasqan edi.

2017 jılı atalğan jobada franciyalıq Total 50,1 payız ülesin, qıtaylıq PetroChina 30 payızın, al Petropars 19,9 payız ülesimen bölisken edi. Bıltır AQŞ Iranğa qarsı sankciyaların qalpına keltirgennen keyin, 2018 jıldıñ tamız ayında Total kompaniyası jobadan bas tartqan.

Qıtay Sırtqı ister ministrligi qıtaylıq korporaciyanıñ Irandağı mañızdı jobadan bas tartqanı turalı rastağan. Biraq, tolıq mälimet beruden bas tartqan. Al, CNPC-dıñ resmi saytında bwl turalı mälimet tek Irannıñ resmi mälimdemesinen keyin ğana şıqtı.

Düysenbide, amerikalıq tanımal basılım The Wall Street Journal «Qıtaydıñ mwnay-gaz alıptarı AQŞ qısımına baylanıstı Irandağı jobağa qarjı audara alatın bank tabu asa qiın bolğanın moyındadı» dep habarlağan edi. Esteriñizde bolsa, AQŞ sankciyasına baylanıstı bıltırdıñ özinde CNPC-tıñ negizgi qarjı jelisi sanalatın Kunlun bank Iranğa qarjı audarudı toqtatqanın mälimdegen edi.

South China Morning Post osığan qatıstı habarında, Qıtay wlttıq kompaniyasınıñ Irandağı jobadan bas tartuı tikeley AQŞ sankciyasımen qatıstı ekenin kesete jazğan. Habarda sonday-aq, CNPC saytındağı mälimetterge silteme jasay otırıp, kompaniyanıñ Qwrama Ştatta da enşiles jobalarınıñ bar ekenin, AQŞ sankciyası sol üşinde kompaniyağa qaterli bolatının jazğan.

Esteriñizde bolsa, bwdan birer apta bwrın saytımızda The New York Times basılımınıñ Qıtay men Iran arasındağı investiciya turalı boljamı jariyalanğan edi. Onda Qıtaydıñ Iranğa milliardtağan investiciya salu täuekeliniñ AQŞ sankciyasına baylanıstı sätsizdikke wşıraytının jazğan.

 

“The Qazaq Times”