BWW-nıñ Äyelder jağdayı jönindegi komissiyasınıñ 61-sessiyası. Foto: mfa.kz

Qazaqstan Respublikasınıñ resmi delegaciyası 2017 jılğı 13-17 naurızda BWW-nıñ N'yu-Yorktegi ştab-päterinde ötip jatqan jäne eñbek salasındağı özgerister twrğısında äyelderdiñ ekonomikalıq qwqıqtarı men mümkindikterin keñeytu taqırıbına arnalğan BWW-nıñ Äyelder jağdayı jönindegi komissiyasınıñ 61-sessiyasına qatısuda. Bwl turalı ministrliktiñ resmi saytı habarladı. 

Wlttıq ekonomika vice-ministri, QR Prezidenti janındağı Äyelder isteri jäne otbasılıq-demografiyalıq sayasat jönindegi wlttıq komissiyanıñ müşesi Mädina Äbilqasımova bastağan delegaciyanıñ kwramına AQ «Qazaqstan qor birjası» Basqarma törağası Alina Aldambergen jäne «QazAgro» AQ Basqarma törağasınıñ orınbasarı Aygül Mwhamadieva kiredi.

Qazaqstan 2014-2018 jıldar aralığında Komissiyanıñ qwramına kiredi jäne äyelder mäselesin Wyımnıñ kün tärtibindegi bastı taqırıptardıñ spektri boyınşa, atap aytqanda, beybitşilik pen qauipsizdikti nığaytu, twraqtı damuğa qol jetkizu, kedeylikti joyu, klimattıñ özgeruine qarsı küres, adam qwqıqtarın qorğau taqırıptarı boyınşa ayrıqşa köñil böledi. Qazaqstan Äyelderge qatıstı kemsituşiliktiñ barlıq nısandarın joyu turalı BWW Konvenciyası, Beyjiñ deklaraciyası jäne is-qimıl twğırnaması siyaqtı genderlik teñdik boyınşa irgeli qwjattarğa qosıldı jäne Twraqtı damu maqsattarın is jüzinde iske asıruda.

BWW-nıñ Äyelder qwqıqtarı jönindegi komissiyasınıñ 61-sessiyasında äyelderdi ekonomikalıq qızmetke belsendi türde qatıstıru, äyelderdiñ bilim beru jäne jwmısqa qol jetkizu, teñ eñbek üşin teñ aqığa teñ qwqıqtar men mümkindikterdi qamtamasız etu, tehnologiyalıq jañğırtudıñ äyelderdi jwmıspen qamtu mümkindikterine äseri, beyresmi jwmıspen qamtu mäseleleri qaraladı.

Qazaqstanda äyelder halıq sanınıñ 52% qwraydı, olardıñ 61% ekonomikalıq belsendi sanattağılar. JİÖ-degi äyelderdiñ ülesi 39% qwraydı. Äyelderdiñ belsendi röli, aldıñğı kezekte, şağın jäne orta bizneste körinis tabadı, olardıñ ülesi 50% qwraydı. Äyelder barlıq şağın jäne orta biznes käsiporındarınıñ 44% basqaradı jäne şağın jäne orta biznes sektorındağı barlıq jwmıs orındarınıñ 31% qamtamasız etedi.

Äyelderdiñ ekonomikalıq mümkindikterin arttıru boyınşa negizgi şaralar 2016 jıldıñ jeltoqsanında Qazaqstan Respublikası Prezidentiniñ Jarlığımen bekitilgen 2030 jılğa deyingi Qazaqstan Respublikasınıñ Otbası jäne genderlik sayasat twjırımdamasında körsetilgen.

Sessiyağa şamamen älemniñ 170 eliniñ ükimet basşıları, ministrleri jäne joğarı deñgeyli ökilderi qatısuda. Qazaqstan delegaciyası jwmıs otırıstarına belsendi türde qatısıp, ministrlik döñgelek üstelderinde bayandamamen söz söyledi, BWW basşılığımen ekijaqtı kezdesuler ötkizude.

Atap aytqanda, QR Bas delegaciyasınıñ BWW Bas Hatşısınıñ kömekşisi, «BWW-Äyelder» atqaruşı direktorınıñ orınbasarı Lakşmi Purimen jwmıs kezdesui ötti. Kezdesude Almatı qalasındağı BWW-Äyelder qwrılımınıñ köpeldik ofisiniñ qızmeti mäseleleri jäne osı saladağı ıntımaqtastıqtı odan äri nığaytudıñ perspektivaları talqılandı.

Sonımen qatar, M. Äbilqasımova jäne A. Aldambergen BWW-nıñ radiosına swhbat berip, onda elimizdiñ Ükimeti äyelderdiñ teñ qwqıqtarı men mümkindikterin qamtamasız etu, olardıñ resurstar men tehnologiyalarğa qol jetkizu üşin qabıldağan şaralar turalı bayandap, qazaqstandıq äyelderdiñ sayasat, ekonomika, biznes jäne auıl şaruaşılığı salalarındağı tabıstarı men jetistikterimen bölisti.

“The Qazaq Times”