قازاقستان رەسپۋبليكاسىنىڭ رەسمي دەلەگاتسياسى 2017 جىلعى 13-17 ناۋرىزدا بۇۇ-نىڭ نيۋ-يوركتەگى شتاب-پاتەرىندە ءوتىپ جاتقان جانە ەڭبەك سالاسىنداعى وزگەرىستەر تۇرعىسىندا ايەلدەردىڭ ەكونوميكالىق قۇقىقتارى مەن مۇمكىندىكتەرىن كەڭەيتۋ تاقىرىبىنا ارنالعان بۇۇ-نىڭ ايەلدەر جاعدايى جونىندەگى كوميسسياسىنىڭ 61-سەسسياسىنا قاتىسۋدا. بۇل تۋرالى مينيسترلىكتىڭ رەسمي سايتى حابارلادى. 

ۇلتتىق ەكونوميكا ۆيتسە-ءمينيسترى، قر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ مۇشەسى ءمادينا ابىلقاسىموۆا باستاعان دەلەگاتسيانىڭ كۇرامىنا اق «قازاقستان قور بيرجاسى» باسقارما توراعاسى الينا الدامبەرگەن جانە «قازاگرو» اق باسقارما توراعاسىنىڭ ورىنباسارى ايگۇل مۇحاماديەۆا كىرەدى.

قازاقستان 2014-2018 جىلدار ارالىعىندا كوميسسيانىڭ قۇرامىنا كىرەدى جانە ايەلدەر ماسەلەسىن ۇيىمنىڭ كۇن تارتىبىندەگى باستى تاقىرىپتاردىڭ سپەكترى بويىنشا، اتاپ ايتقاندا، بەيبىتشىلىك پەن قاۋىپسىزدىكتى نىعايتۋ، تۇراقتى دامۋعا قول جەتكىزۋ، كەدەيلىكتى جويۋ، كليماتتىڭ وزگەرۋىنە قارسى كۇرەس، ادام قۇقىقتارىن قورعاۋ تاقىرىپتارى بويىنشا ايرىقشا كوڭىل بولەدى. قازاقستان ايەلدەرگە قاتىستى كەمسىتۋشىلىكتىڭ بارلىق نىساندارىن جويۋ تۋرالى بۇۇ كونۆەنتسياسى، بەيجىڭ دەكلاراتسياسى جانە ءىس-قيمىل تۇعىرناماسى سياقتى گەندەرلىك تەڭدىك بويىنشا ىرگەلى قۇجاتتارعا قوسىلدى جانە تۇراقتى دامۋ ماقساتتارىن ءىس جۇزىندە ىسكە اسىرۋدا.

بۇۇ-نىڭ ايەلدەر قۇقىقتارى جونىندەگى كوميسسياسىنىڭ 61-سەسسياسىندا ايەلدەردى ەكونوميكالىق قىزمەتكە بەلسەندى تۇردە قاتىستىرۋ، ايەلدەردىڭ ءبىلىم بەرۋ جانە جۇمىسقا قول جەتكىزۋ، تەڭ ەڭبەك ءۇشىن تەڭ اقىعا تەڭ قۇقىقتار مەن مۇمكىندىكتەردى قامتاماسىز ەتۋ، تەحنولوگيالىق جاڭعىرتۋدىڭ ايەلدەردى جۇمىسپەن قامتۋ مۇمكىندىكتەرىنە اسەرى، بەيرەسمي جۇمىسپەن قامتۋ ماسەلەلەرى قارالادى.

قازاقستاندا ايەلدەر حالىق سانىنىڭ 52% قۇرايدى، ولاردىڭ 61% ەكونوميكالىق بەلسەندى ساناتتاعىلار. ءجىو-دەگى ايەلدەردىڭ ۇلەسى 39% قۇرايدى. ايەلدەردىڭ بەلسەندى ءرولى، الدىڭعى كەزەكتە، شاعىن جانە ورتا بيزنەستە كورىنىس تابادى، ولاردىڭ ۇلەسى 50% قۇرايدى. ايەلدەر بارلىق شاعىن جانە ورتا بيزنەس كاسىپورىندارىنىڭ 44% باسقارادى جانە شاعىن جانە ورتا بيزنەس سەكتورىنداعى بارلىق جۇمىس ورىندارىنىڭ 31% قامتاماسىز ەتەدى.

ايەلدەردىڭ ەكونوميكالىق مۇمكىندىكتەرىن ارتتىرۋ بويىنشا نەگىزگى شارالار 2016 جىلدىڭ جەلتوقسانىندا قازاقستان رەسپۋبليكاسى پرەزيدەنتىنىڭ جارلىعىمەن بەكىتىلگەن 2030 جىلعا دەيىنگى قازاقستان رەسپۋبليكاسىنىڭ وتباسى جانە گەندەرلىك ساياسات تۇجىرىمداماسىندا كورسەتىلگەن.

سەسسياعا شامامەن الەمنىڭ 170 ەلىنىڭ ۇكىمەت باسشىلارى، مينيسترلەرى جانە جوعارى دەڭگەيلى وكىلدەرى قاتىسۋدا. قازاقستان دەلەگاتسياسى جۇمىس وتىرىستارىنا بەلسەندى تۇردە قاتىسىپ، مينيسترلىك دوڭگەلەك ۇستەلدەرىندە باياندامامەن ءسوز سويلەدى، بۇۇ باسشىلىعىمەن ەكىجاقتى كەزدەسۋلەر وتكىزۋدە.

اتاپ ايتقاندا، قر باس دەلەگاتسياسىنىڭ بۇۇ باس حاتشىسىنىڭ كومەكشىسى، «بۇۇ-ايەلدەر» اتقارۋشى ديرەكتورىنىڭ ورىنباسارى لاكشمي پۋريمەن جۇمىس كەزدەسۋى ءوتتى. كەزدەسۋدە الماتى قالاسىنداعى بۇۇ-ايەلدەر قۇرىلىمىنىڭ كوپەلدىك ءوفيسىنىڭ قىزمەتى ماسەلەلەرى جانە وسى سالاداعى ىنتىماقتاستىقتى ودان ءارى نىعايتۋدىڭ پەرسپەكتيۆالارى تالقىلاندى.

سونىمەن قاتار، م. ابىلقاسىموۆا جانە ا. الدامبەرگەن بۇۇ-نىڭ راديوسىنا سۇحبات بەرىپ، وندا ەلىمىزدىڭ ۇكىمەتى ايەلدەردىڭ تەڭ قۇقىقتارى مەن مۇمكىندىكتەرىن قامتاماسىز ەتۋ، ولاردىڭ رەسۋرستار مەن تەحنولوگيالارعا قول جەتكىزۋ ءۇشىن قابىلداعان شارالار تۋرالى بايانداپ، قازاقستاندىق ايەلدەردىڭ ساياسات، ەكونوميكا، بيزنەس جانە اۋىل شارۋاشىلىعى سالالارىنداعى تابىستارى مەن جەتىستىكتەرىمەن ءبولىستى.

“The Qazaq Times”