Svetlana Jaqıpova

Eñbek jäne halıqtı äleumettik qorğau vice-ministri qızmetine Erlan Äukenov  tağayındaldı. Svetlana Jaqıpova qızmetinen öz erkimen ketti

Prem'er-ministr saytında: «QR ükimetiniñ qaulısımen Erlan Mwratwlı Äukenov Qazaqstan respublikasınıñ eñbek jäne halıqtı äleumettik qorğau vice-ministri qızmetine tağayındaldı. Bwğan deyin atalğan qızmetti atqarğan Svetlana Jaqıpova öz qalauı boyınşa jwmısınan bosatıldı», – delingen.

Qızmeti barısında S.Jaqıpovanıñ birneşe märte bası dauğa qalğan. Mäselen, jıl basınan beri köp balalı analar ükimetten beriletin järdemaqınıñ tım az ekendigin aytıp şağımdanğanda, vice-ministr jaña bosanğan analardıñ tirlikke aralasuın basqaşa elestetetin körsetkendey boldı. Oğan şeneuniktiñ mına sözi dälel: «Men jwmısqa şıqqan kezde balam üş ayğa tolmağan edi. Onımen birge jwmıs istep, issaparğa da şığatınmın. Biraq men jwmısqa aqşa tabu maqsatında şıqqan joqpın».

Vice-ministr lauazımına jañadan saylanğan Erlan Äukenov äl-Farabi atındağı Qazaq wlttıq universitetin, «Bolaşaq» bağdarlaması boyınşa Bredford universitetin, Halıqaralıq biznes akademiyasın, London ekonomika jäne sayasi ğılımdar mektebin tämamdağan. QR Bilim jäne ğılım ministrliginde, «XXI ğasır köşbasşısı» jastar ortalığı» RQB, «Qazaqstan jastarınıñ kongresi» ZTB, «Samğau» wlttıq ğılımi-tehnologiyalıq holdingi» AQ eñbek etken.

2010-2011 jıldarı — Şığıs Qazaqstan oblısı äkiminiñ apparatı basşısınıñ orınbasarı.

2011-2014 jıldarı — QR Prezidenti Äkimşiliginiñ memlekettik inspektorı.

2014-2015 jıldarı — Soltüstik Qazaqstan oblısı äkiminiñ orınbasarı.

2015-2019 jıldarı Almatı qalası äkiminiñ orınbasarı lauazımın atqardı, äleumettik äl-auqat mäselesi boyınşa jetekşilik etken.

"The Qazaq Times"