«Atlantic Council» keñesi wyımdastırğan jiında Toqaev bastağan Qazaqstan delegaciyası amerikalıq sayasatker-sarapşılarmen kezdesude. 23 qırküyek 2019 jıl. N'yu-York, AQŞ. Foto: Aqorda

Keşe, 23 qırküyek memleket basşısı Qasım-Jomart Toqaevtıñ N'yu-Yorkke saparınıñ alğaşqı küni belgili amerikalıq sayasatkerlermen jäne sarapşılar qauımdastığımen, sonımen qatar BWW Örkenietter Al'yansınıñ Joğarı ökili Migel' Anhel' jäne «Bloomberg» aqparat agenttiginiñ iesi Maykl Blumbergpen kezdesumen bastaldı.

Amerikalıq sayasatker-sarapşılarmen kezdesu barısında memleket basşısı Qazaqstan-Amerika qarım-qatınastarınıñ qazirgi jay-küyi men damu perspektivaları, sırtqı sayasattıñ negizgi basımdıqtarı, Qazaqstannıñ sauda-ekonomikalıq jäne investiciyalıq äleueti turalı egjey-tegjeyli söz qozğağan.

Toqaev AQŞ-pen ıntımaqtastıqtı arttıru Qazaqstan üşin asa mañızdı ekenin atap, osığan deyingi jasasqan «kelisimderdiñ jüzege asırıluına erekşe män beremiz. Bwl sapar eki el arasındağı keñ auqımdı strategiyalıq äriptestiktiñ negizin qaladı» dedi. Prezidenttiñ aytuınşa, AQŞ Qazaqstanğa jalpı kölemi 45 mlrd dollardan artıq investiciya qwyğan.

Jiındağı Toqaev bastağan Qazaqstan delegaciyası. 23 qırküyek 2019 jıl. N'yu-York, AQŞ. Foto: Aqorda

Toqaev amerikalıq äriptesterin energetikalıq saladağı birqatar birlesken jobalardıñ tabıstı jüzege asqanı turalı habardar ete otırıp, aldağı uaqıtta auıl şaruaşılığı jäne joğarı tehnologiya salaları boyınşa özara is-qimıldı arttıru üşin jaña mümkindikter turalı wsınıs bildirgen.

60 jılday tarihı bar AQŞ-tıñ jetekşi saraptamalıq jäne ğılımi ortalıqtarınıñ biri sanalatın «Atlantikalıq keñes» otırısınan keyin Toqaev BWW Ştab-päterinde BWW Örkenietter Al'yansınıñ Joğarı ökili Migel' Anhel' Moratinospen kezdesti. Mwnda da taraptar özara is-qimıl perspektivaların: dinaralıq kelisim men örkenietterdiñ jahandıq dialogın nığaytu jayın talqılap, bir-birine müddeli ekenin mälimdegen.

Memleket basşısı BWW Örkenietter Al'yansınıñ Joğarı ökili Migel' Anhel' Moratinospen kezdesude. 23 qırküyek 2019 jıl. BWW ştab-päteri. N'yu-York, AQŞ. Foto: Aqorda

Migel' Anhel' Toqaevtı jaña lauazımına saylanuımen qwttıqtap, elimizdiñ mädeniet pen örkenietaralıq dialogtı damıtu isindegi eñbegine joğarı bağa bergen. Al el prezidenti  BWW Bas hatşısı Antoniu Guterriş wsınğan dini ğibadat orındarın qorğau boyınşa Al'yans äzirlegen is-qimıl josparınıñ iske asırıla bastağanın qoldaytının jetkizgen.

Toqaev pen BWW Örkenietter Al'yansınıñ Joğarı ökili Migel' Anhel' ıntımaqtastıq jayında söylesude. 23 qırküyek 2019 jıl. BWW ştab-päteri. N'yu-York, AQŞ. Foto: Aqorda

Kezdesu artınan ile-şala BWW Bas Assambleyasınıñ 74-şi sessiyası ayasında Toqaev «Bloomberg» aqparat agenttiginiñ negizin qalauşı äri iesi Maykl Blumbergpen jüzdesti.

«Bloomberg» aqparat agenttiginiñ negizin qalauşı äri iesi Maykl Blumberg pen Qazaqstan basşısı Toqaev ekonomikalıq mäseleler jaylı pikirlesude. 23 qırküyek 2019 jıl. BWW ştab-päteri. N'yu-York, AQŞ. Foto: Aqorda

Jiında Qazaqstan men «Bloomberg» aqparat agenttigi arasındağı ıntımaqtastıqtıñ keleşegin talqılap, älemdik ekonomikanıñ kün tärtibindegi özekti mäseleleri jöninde pikir almastı. Qazaqstan basşısı qırküyektiñ 25-i N'yu-Yorkte ötetin «Bloomberg» Jahandıq biznes-forumınıñ mañızdılığına män berip,  elden  «Astana» halıqaralıq qarjı ortalığınıñ basqaruşısı Qayrat Kelimbetov qatısatının aytqan. Maykl Blumbergti «Astana» HQO-men ıntımaqtasudı qolqalağan Toqaev onı elge saparlap keluge şaqırğan.

Prezident Toqaev «Bloomberg» basşısı Maykl Blumbergti elge qonaqqa şaqıruda.23 qırküyek 2019 jıl. BWW ştab-päteri. N'yu-York, AQŞ. Foto: Aqorda

Esteriñizge sala ketsek, elde «Qıtay ekspansiyasına» qarsılıq küşeygen twsta memleket basşısı osı uaqıtqa deyin qırküyektiñ 11-12-si künderi  Qıtayğa ekikündik saparmen barıp qaytqan bolatın. Prezident «bwl saparımnıñ qorıtındılarına qanağattanuğa barlıq negiz bar» dep bağalağan auqımdı häm sän-saltanattı kezdesude QHR törağası Şi Jinpiñmen «strategiyalıq jäne wzaq merzimdi mänge ie» äriptestik turalı Birlesken mälimdemege, sonday-aq 10 şaqtı mañızdı qwjatqa qol qoyğan edi.

"The Qazaq Times"