كەشە، 23 قىركۇيەك مەملەكەت باسشىسى قاسىم-جومارت توقاەۆتىڭ نيۋ-يورككە ساپارىنىڭ العاشقى كۇنى بەلگىلى امەريكالىق ساياساتكەرلەرمەن جانە ساراپشىلار قاۋىمداستىعىمەن، سونىمەن قاتار بۇۇ وركەنيەتتەر اليانسىنىڭ جوعارى وكىلى ميگەل انحەل جانە «Bloomberg» اقپارات اگەنتتىگىنىڭ يەسى مايكل بلۋمبەرگپەن كەزدەسۋمەن باستالدى.
امەريكالىق ساياساتكەر-ساراپشىلارمەن كەزدەسۋ بارىسىندا مەملەكەت باسشىسى قازاقستان-امەريكا قارىم-قاتىناستارىنىڭ قازىرگى جاي-كۇيى مەن دامۋ پەرسپەكتيۆالارى، سىرتقى ساياساتتىڭ نەگىزگى باسىمدىقتارى، قازاقستاننىڭ ساۋدا-ەكونوميكالىق جانە ينۆەستيتسيالىق الەۋەتى تۋرالى ەگجەي-تەگجەيلى ءسوز قوزعاعان.
توقاەۆ اقش-پەن ىنتىماقتاستىقتى ارتتىرۋ قازاقستان ءۇشىن اسا ماڭىزدى ەكەنىن اتاپ، وسىعان دەيىنگى جاساسقان «كەلىسىمدەردىڭ جۇزەگە اسىرىلۋىنا ەرەكشە ءمان بەرەمىز. بۇل ساپار ەكى ەل اراسىنداعى كەڭ اۋقىمدى ستراتەگيالىق ارىپتەستىكتىڭ نەگىزىن قالادى» دەدى. پرەزيدەنتتىڭ ايتۋىنشا، اقش قازاقستانعا جالپى كولەمى 45 ملرد دوللاردان ارتىق ينۆەستيتسيا قۇيعان.
جيىنداعى توقاەۆ باستاعان قازاقستان دەلەگاتسياسى. 23 قىركۇيەك 2019 جىل. نيۋ-يورك، اقش. فوتو: اقوردا
توقاەۆ امەريكالىق ارىپتەستەرىن ەنەرگەتيكالىق سالاداعى بىرقاتار بىرلەسكەن جوبالاردىڭ تابىستى جۇزەگە اسقانى تۋرالى حاباردار ەتە وتىرىپ، الداعى ۋاقىتتا اۋىل شارۋاشىلىعى جانە جوعارى تەحنولوگيا سالالارى بويىنشا ءوزارا ءىس-قيمىلدى ارتتىرۋ ءۇشىن جاڭا مۇمكىندىكتەر تۋرالى ۇسىنىس بىلدىرگەن.
60 جىلداي تاريحى بار اقش-تىڭ جەتەكشى ساراپتامالىق جانە عىلىمي ورتالىقتارىنىڭ ءبىرى سانالاتىن «اتلانتيكالىق كەڭەس» وتىرىسىنان كەيىن توقاەۆ بۇۇ شتاب-پاتەرىندە بۇۇ وركەنيەتتەر اليانسىنىڭ جوعارى وكىلى ميگەل انحەل موراتينوسپەن كەزدەستى. مۇندا دا تاراپتار ءوزارا ءىس-قيمىل پەرسپەكتيۆالارىن: دىنارالىق كەلىسىم مەن وركەنيەتتەردىڭ جاھاندىق ديالوگىن نىعايتۋ جايىن تالقىلاپ، ءبىر-بىرىنە مۇددەلى ەكەنىن مالىمدەگەن.
مەملەكەت باسشىسى بۇۇ وركەنيەتتەر اليانسىنىڭ جوعارى وكىلى ميگەل انحەل موراتينوسپەن كەزدەسۋدە. 23 قىركۇيەك 2019 جىل. بۇۇ شتاب-پاتەرى. نيۋ-يورك، اقش. فوتو: اقوردا
ميگەل انحەل توقاەۆتى جاڭا لاۋازىمىنا سايلانۋىمەن قۇتتىقتاپ، ەلىمىزدىڭ مادەنيەت پەن وركەنيەتارالىق ديالوگتى دامىتۋ ىسىندەگى ەڭبەگىنە جوعارى باعا بەرگەن. ال ەل پرەزيدەنتى بۇۇ باس حاتشىسى انتونيۋ گۋتەرريش ۇسىنعان ءدىني عيبادات ورىندارىن قورعاۋ بويىنشا اليانس ازىرلەگەن ءىس-قيمىل جوسپارىنىڭ ىسكە اسىرىلا باستاعانىن قولدايتىنىن جەتكىزگەن.
توقاەۆ پەن بۇۇ وركەنيەتتەر اليانسىنىڭ جوعارى وكىلى ميگەل انحەل ىنتىماقتاستىق جايىندا سويلەسۋدە. 23 قىركۇيەك 2019 جىل. بۇۇ شتاب-پاتەرى. نيۋ-يورك، اقش. فوتو: اقوردا
كەزدەسۋ ارتىنان ىلە-شالا بۇۇ باس اسسامبلەياسىنىڭ 74-ءشى سەسسياسى اياسىندا توقاەۆ «Bloomberg» اقپارات اگەنتتىگىنىڭ نەگىزىن قالاۋشى ءارى يەسى مايكل بلۋمبەرگپەن جۇزدەستى.
«Bloomberg» اقپارات اگەنتتىگىنىڭ نەگىزىن قالاۋشى ءارى يەسى مايكل بلۋمبەرگ پەن قازاقستان باسشىسى توقاەۆ ەكونوميكالىق ماسەلەلەر جايلى پىكىرلەسۋدە. 23 قىركۇيەك 2019 جىل. بۇۇ شتاب-پاتەرى. نيۋ-يورك، اقش. فوتو: اقوردا
جيىندا قازاقستان مەن «Bloomberg» اقپارات اگەنتتىگى اراسىنداعى ىنتىماقتاستىقتىڭ كەلەشەگىن تالقىلاپ، الەمدىك ەكونوميكانىڭ كۇن تارتىبىندەگى وزەكتى ماسەلەلەرى جونىندە پىكىر الماستى. قازاقستان باسشىسى قىركۇيەكتىڭ 25-ءى نيۋ-يوركتە وتەتىن «Bloomberg» جاھاندىق بيزنەس-فورۋمىنىڭ ماڭىزدىلىعىنا ءمان بەرىپ، ەلدەن «استانا» حالىقارالىق قارجى ورتالىعىنىڭ باسقارۋشىسى قايرات كەلىمبەتوۆ قاتىساتىنىن ايتقان. مايكل بلۋمبەرگتى «استانا» حقو-مەن ىنتىماقتاسۋدى قولقالاعان توقاەۆ ونى ەلگە ساپارلاپ كەلۋگە شاقىرعان.
پرەزيدەنت توقاەۆ «Bloomberg» باسشىسى مايكل بلۋمبەرگتى ەلگە قوناققا شاقىرۋدا.23 قىركۇيەك 2019 جىل. بۇۇ شتاب-پاتەرى. نيۋ-يورك، اقش. فوتو: اقوردا
ەستەرىڭىزگە سالا كەتسەك، ەلدە «قىتاي ەكسپانسياسىنا» قارسىلىق كۇشەيگەن تۇستا مەملەكەت باسشىسى وسى ۋاقىتقا دەيىن قىركۇيەكتىڭ 11-12-ءسى كۇندەرى قىتايعا ەكىكۇندىك ساپارمەن بارىپ قايتقان بولاتىن. پرەزيدەنت «بۇل ساپارىمنىڭ قورىتىندىلارىنا قاناعاتتانۋعا بارلىق نەگىز بار» دەپ باعالاعان اۋقىمدى ءھام ءسان-سالتاناتتى كەزدەسۋدە قحر توراعاسى شي جينپيڭمەن «ستراتەگيالىق جانە ۇزاق مەرزىمدى مانگە يە» ارىپتەستىك تۋرالى بىرلەسكەن مالىمدەمەگە، سونداي-اق 10 شاقتى ماڭىزدى قۇجاتقا قول قويعان ەدى.
ءبىز رەسەيدىڭ گۋبەرنياسى ەمەسپىز! سوۆەت تۋىن جۇلىپ العانى ءۇشىن قامالعان ازامات شىقتى
شوقپار اۋىلىنداعى ۋران قاتەرى. اكىم جوققا شىعارادى. تۇرعىندار رادياتسيا دەپ ۇرەيلەنەدى
قاندى قاڭتار سوتى. بەس جىلعا سوتتالعان ارتىقباەۆ ەشقانداي دالەل جوق دەپ ۇكىممەن كەلىسپەيدى
الماتى وبل پركۋراتۋراسى. بەلسەندىلەر: «جالعان جالامەن قاماۋداعى ايگەرىم مەن دۋمانعا بوستاندىق!»
ارمان الىمبەكوۆ: مەن ول جەردىڭ رەزيدەنتسيا ەكەنىن بىلمەدىم. ەشنارسە بۇلدىرمەدىم.
قوساي ماحامباەۆ: وق تيگەن ادامدى قۇتقارام دەگەندە ءوزىمدى اتىپ تاستادى