+11° aua rayında Mnistrlik ğimaratınıñ aldında tünegen narazı analar. Elorda. 20 qırküyek 2019 jıl. Foto: Azattıq/Ö.Joyamergen

Qırküyektiñ 20-sına qarağan tüni baspana men järdemaqı mäselesin kötergen 20-dan astam äyel astanadağı Ministrlikter üyiniñ aldına tünegen. Narazılıq äli jalğasıp jatır.

Azattıq tilşileriniñ habarlauınşa, olar keşeli beri Aqorda mañına jinalıp, äleumettik mäseleleriniñ şeşiluin swrağan.Narazılıq bildiruşi äyelderdiñ bastı talabı – alğaşqı jarnasız tömen payızben baspana alu, kämeletke tolmağan ärbir balağa järdemaqı töleu. Keşe "Baybek", "Elbası" dep wrandasqan narazı äyelder Ministrlikter üyin boylap jürip ötken.

11°-13° temperaturasında tünegen köpbalalı äyelderdiñ aytuına qarağanda, olardı tüni boyı arnayı qwqıq qorğau organdarınıñ jasağı küzetken. Narazılardıñ biri, jeti balanıñ anası Janar Baymwhametova keşeden beri bilikke talap aytıp, köşede jürgenin, "birde-bir deputattıñ mwñ-mwqtajın tıñdauğa şıqpağanın" aytadı.

Jeti balası bar Janar Baymwhametova. Elorda. 20 qırküyek 2019 jıl. Foto: Azattıq/Ö.Joyamergen

"Mına ükimet bizdi "bomj" qwrlı körmedi. Bir ret te kelip "ne üşin otırsıñdar?", "qanday mwñ-mwqtajdarıñ bar?" dep bir adam swrağan joq. Senesizder me? Köp balalı analardıñ bäri ministrlik aldında qondıq", – deydi köpbalalı Baymwhametova.

"2002 jıldan beri baspana kezeginde twrğanmın, biraq üş ret kezekten şığarıp tastadı. 2000-jıldardıñ basında "oralman märtebesine baylanıstı" meni kezekten alıp tastasa, odan keyingi jıldarı "balalarınıñ kämeletke tolıp ketken dep ayttı. Biıl qayta kezekke twrğızıp, 3034-şi qılıp tizimniñ eñ soñına tirkedi", – dedi aşınğan ana.

Wlttıq ekonomika ministrliginiñ aldında tünep şıqqan äyelderdiñ biri Kenjegül Dosmayılqızı:

Narazı analardıñ biri Kenjegül Dosmayılqızı. Elorda. 20 qırküyek 2019 jıl. Foto: Azattıq/Ö.Joyamergen

"Keşe tünde Youtube-tan bizdiñ otırğanımızdı körip, qarapayım azamattar ıstıq tamaq äkep berip edi, sonı "senderge DVK äkep jatır, "tamaqtı almañdar" dep mwndağı policiya qızmetkerleri özimizge qıspaq körsetti. SOBR-ı bar, policeyleri bar bizdi qılmıskerler siyaqtı küzetip twrdı. Qayda barmasañ da küzet. Aqordağa bizdi bir qadam jaqındatpaydı", – dep şağınğan Azattıqqa.

Bügin tañerteñ oqiğa ornına qala äkimdiginiñ ökili Baqtiyar Mäkenwlı kelip, twrğın üydiñ berilu erejesin tüsindiruge tırıstı:

"Bwl kisilerdiñ köbin qabıldağanbız. Köbine memleket tarabınan ülken kömek berildi. Ärine, baspana mäselesi bar. Bwl jerde tärtip bar. 11 mıñ adam baspana (qala boyınşa 47 mıñ adam – Azattıq) kezeginde twr. Keybiriniñ kezegi de kelip qaldı. 407, 306 siyaqtı. Eger kezeksiz bersek, zañdı bwzamız. Sondıqtan bwlarğa zañ boyınşa alasızdar dep tüsindirip ayttıq", - dedi ol.

Astana äkiminiñ orınbasarı Baqtiyar Mäkenwlı analarğa qala äkimimen kezdesu üşin arnayı qabıldauğa jazılu qajettigin, sonda olardı qabıldaytının ayttı.

Narazı äyelder men äkimdik ökilderi. Elorda. 20 qırküyek 2019 jıl. Foto: Azattıq/Ö.Joyamergen

 

"The Qazaq Times"