+11° اۋا رايىندا منيسترلىك عيماراتىنىڭ الدىندا تۇنەگەن نارازى انالار. ەلوردا. 20 قىركۇيەك 2019 جىل. فوتو: ازاتتىق/و.جويامەرگەن

قىركۇيەكتىڭ 20-سىنا قاراعان ءتۇنى باسپانا مەن جاردەماقى ماسەلەسىن كوتەرگەن 20-دان استام ايەل استاناداعى مينيسترلىكتەر ءۇيىنىڭ الدىنا تۇنەگەن. نارازىلىق ءالى جالعاسىپ جاتىر.

ازاتتىق تىلشىلەرىنىڭ حابارلاۋىنشا، ولار كەشەلى بەرى اقوردا ماڭىنا جينالىپ، الەۋمەتتىك ماسەلەلەرىنىڭ شەشىلۋىن سۇراعان.نارازىلىق ءبىلدىرۋشى ايەلدەردىڭ باستى تالابى – العاشقى جارناسىز تومەن پايىزبەن باسپانا الۋ، كامەلەتكە تولماعان ءاربىر بالاعا جاردەماقى تولەۋ. كەشە "بايبەك", "ەلباسى" دەپ ۇرانداسقان نارازى ايەلدەر مينيسترلىكتەر ءۇيىن بويلاپ ءجۇرىپ وتكەن.

11°-13° تەمپەراتۋراسىندا تۇنەگەن كوپبالالى ايەلدەردىڭ ايتۋىنا قاراعاندا، ولاردى ءتۇنى بويى ارنايى قۇقىق قورعاۋ ورگاندارىنىڭ جاساعى كۇزەتكەن. نارازىلاردىڭ ءبىرى، جەتى بالانىڭ اناسى جانار بايمۇحامەتوۆا كەشەدەن بەرى بيلىككە تالاپ ايتىپ، كوشەدە جۇرگەنىن، "بىردە-ءبىر دەپۋتاتتىڭ مۇڭ-مۇقتاجىن تىڭداۋعا شىقپاعانىن" ايتادى.

جەتى بالاسى بار جانار بايمۇحامەتوۆا. ەلوردا. 20 قىركۇيەك 2019 جىل. فوتو: ازاتتىق/و.جويامەرگەن

"مىنا ۇكىمەت ءبىزدى "بومج" قۇرلى كورمەدى. ءبىر رەت تە كەلىپ "نە ءۇشىن وتىرسىڭدار؟", "قانداي مۇڭ-مۇقتاجدارىڭ بار؟" دەپ ءبىر ادام سۇراعان جوق. سەنەسىزدەر مە؟ كوپ بالالى انالاردىڭ ءبارى مينيسترلىك الدىندا قوندىق", – دەيدى كوپبالالى بايمۇحامەتوۆا.

"2002 جىلدان بەرى باسپانا كەزەگىندە تۇرعانمىن، بىراق ءۇش رەت كەزەكتەن شىعارىپ تاستادى. 2000-جىلداردىڭ باسىندا "ورالمان مارتەبەسىنە بايلانىستى" مەنى كەزەكتەن الىپ تاستاسا، ودان كەيىنگى جىلدارى "بالالارىنىڭ كامەلەتكە تولىپ كەتكەن دەپ ايتتى. بيىل قايتا كەزەككە تۇرعىزىپ، 3034-ءشى قىلىپ ءتىزىمنىڭ ەڭ سوڭىنا تىركەدى", – دەدى اشىنعان انا.

ۇلتتىق ەكونوميكا مينيسترلىگىنىڭ الدىندا تۇنەپ شىققان ايەلدەردىڭ ءبىرى كەنجەگۇل دوسمايىلقىزى:

نارازى انالاردىڭ ءبىرى كەنجەگۇل دوسمايىلقىزى. ەلوردا. 20 قىركۇيەك 2019 جىل. فوتو: ازاتتىق/و.جويامەرگەن

"كەشە تۇندە Youtube-تان ءبىزدىڭ وتىرعانىمىزدى كورىپ، قاراپايىم ازاماتتار ىستىق تاماق اكەپ بەرىپ ەدى، سونى "سەندەرگە دۆك اكەپ جاتىر، "تاماقتى الماڭدار" دەپ مۇنداعى پوليتسيا قىزمەتكەرلەرى وزىمىزگە قىسپاق كورسەتتى. سوبر-ى بار، پوليتسەيلەرى بار ءبىزدى قىلمىسكەرلەر سياقتى كۇزەتىپ تۇردى. قايدا بارماساڭ دا كۇزەت. اقورداعا ءبىزدى ءبىر قادام جاقىنداتپايدى", – دەپ شاعىنعان ازاتتىققا.

بۇگىن تاڭەرتەڭ وقيعا ورنىنا قالا اكىمدىگىنىڭ وكىلى باقتيار ماكەنۇلى كەلىپ، تۇرعىن ءۇيدىڭ بەرىلۋ ەرەجەسىن تۇسىندىرۋگە تىرىستى:

"بۇل كىسىلەردىڭ كوبىن قابىلداعانبىز. كوبىنە مەملەكەت تارابىنان ۇلكەن كومەك بەرىلدى. ارينە، باسپانا ماسەلەسى بار. بۇل جەردە ءتارتىپ بار. 11 مىڭ ادام باسپانا (قالا بويىنشا 47 مىڭ ادام – ازاتتىق) كەزەگىندە تۇر. كەيبىرىنىڭ كەزەگى دە كەلىپ قالدى. 407, 306 سياقتى. ەگەر كەزەكسىز بەرسەك، زاڭدى بۇزامىز. سوندىقتان بۇلارعا زاڭ بويىنشا الاسىزدار دەپ ءتۇسىندىرىپ ايتتىق", - دەدى ول.

استانا اكىمىنىڭ ورىنباسارى باقتيار ماكەنۇلى انالارعا قالا اكىمىمەن كەزدەسۋ ءۇشىن ارنايى قابىلداۋعا جازىلۋ قاجەتتىگىن، سوندا ولاردى قابىلدايتىنىن ايتتى.

نارازى ايەلدەر مەن اكىمدىك وكىلدەرى. ەلوردا. 20 قىركۇيەك 2019 جىل. فوتو: ازاتتىق/و.جويامەرگەن

 

"The Qazaq Times"