QR-nıñ Bas prokuraturası Qoğamdıq müddelerdi qorğau qızmetiniñ bastığı Saparbek Nwrpeyisov 21 qırküyekte ötui mümkin mitingke jäne onıñ wyımdastıruşısı Äbilyazovqa qatıstı pikir bildirdi.

«Mitingterge qatıstı Bas prokuratura birneşe ret tüsindirip ötti. Biraq men rwqsat berilmegen jağdayda qanday jauapkerşilik jükteletinin tağı bir eske salğım keledi. Bizdiñ azamattardıñ barlığı biledi, mitingke şığudıñ öz procedurası bar. Mejelengen datadan 10 kün bwrın rwqsat alu kerek. Eger osı tärtippen rwqsat alınğan bolsa, onı wyımdastıruşılar eşqanday jauapqa tartılmaydı. Al rwqsatsız şıqsa, 15 künge qamau jazasına deyin qarastırılğan. Mitingti wyımdastıruşılar azamattardıñ qwqığına, wyımdar men memlekettiñ müddesine ziyan keltirse, qılmıstıq jauapkerşilikke tartıladı. QR QK 400-babı boyınşa 50 täulikke deyin qamau da bar. Sondıqtan azamattarğa qaratıp aytqım keledi – köşege şıqpas bwrın rwqsat alu kerek», – degen Bas prokuratura ökili qırküyektiñ 21-ine josparlanğan mitingke qatısudıñ zañsız ekenin tüsindiruge tırıstı.

Saparbek Nwrpeyisov Qazaqstanda soñğı kezderi jii şeruler wyımdastırıp jürgen negizgi bastamaşı eks-bankir M.Äbilyazovtıñ jetekşiligindegi wyım turalı «Qazir özderin «DVK» dep ataytın wyım jaqtastarı 21 qırküyekte köşege şığuğa ündep jür. Oğan Qazaqstan aumağında ekstremistik wyım retinde tıyım salınğan. Esteriñizge salğım keledi, 2005 jıldan beri prokurorlardıñ ötinişi boyınşa sot 8 wyımdı ekstremistik dep tanığan. Olar: «Hizbut tahrir äl islami», «Tabliği jamağat», «Senim. Bilim. Ömir», «Alğa»Halıq partiyası», «Halıq maydanı-Narodnıy vront», «At-Takfir Ua-al' Hidja» jäne «Yakın Inkar» jäne «DVK». Bwl atalğan wyımdar ekstremistik dep tanılğandıqtan, olardıñ qızmetine qatısu zañmen qudalanadı. Bizdiñ azamattarğa tağı da tüsindirgim keledi – ekstremistik wyımnıñ qızmetine kez kelgen formada qatısu zañsız», – dedi.

«Bwl jerde tikeley qatısu mindetti emes. Bireu jasırın qatısıp, kölikpen qamtamasız etui mümkin. Bireu «DVK» jaqtauşıları men qatısuşılardı jüyeli türde jasırıp kelui mümkin. Bireu qarjılandırıp, türli ünparaqtar taratuı mümkin. Äleumettik jelide post pen kommentariy taratıp, bölisu de – ekstremistik wyımnıñ jwmısına fizikalıq, aqparattıq, qarjılay kömektesu dep qaraladı. Al bwğan zañmen tıyım salınğan. Biz ılği eskertip kelemiz. Tağı da azamattarımızğa qılmıstıq qudalau şeñberinde qalmas üşin zañ talaptarın saqtau kerektigin eskertemiz», – dedi ol.

Prokuroratura ökiliniñ aytuınşa, biıl azamattardı zañsız wstaudıñ 600 faktisi anıqtalıp, 149 adamğa qatıstı negizsiz qılmıstıq qudalau toqtatılğan. Sonday-aq qılmıstıq is jürgizu zañnamasın öreskel bwzğanı üşin 4 177 tärtip saqşığa jaza qoldanılğan desedi.

Nwrpeyisov sözine sensek, büginde şet memlekettermen Italiya, Ispaniya, Soltüstik Makedoniya, Oñtüstik Koreya, Bolgariya t.b. qılmıskerlerdi birlesip wstau boyınşa 69 kelisim jasalğan. Qazaqstan olarğa 77 şeteldikti wstap berse, soñğı 5 jılda şet elderden Qazaqstan aumağında qılmıs jasağanı üşin izdeu jariyalanğan 356 azamat elge qaytarılğan eken.

–  Meniñ Äbilyazovqa senetin adamdarğa aytarım, Äbilyazovke senbeu kerek. Onıñ zañsız narazılıq akciyalarına ermeu kerek. Aqşa tölese – ol bizdiñ azamattarımızdan wrlanğan aqşa. Äbilyazov pen onıñ jaqtastarı – sotpen tıyım salınğan "DVK" ekstremistik wyımınıñ belsendileri qarapayım adamdardı aldap, olardı ädeyi qılmısqa baruğa arandatuda. Özi bolsa Franciyada tığılıp otır, äri Qazaqstanda jäne basqa elderde wrlanğan aqşağa ömir sürip jür. Qwrmetti otandastar, men osı platformanı paydalana otırıp, sizderdi arandatuşılıqqa boy aldırmauğa, tıyım salınğan wyımdardıñ zañsız äreketteri men qızmetine qatıspauğa şaqıramın. Biz ärqaşan da memleketimizdiñ wltaralıq kelisimi men bauırlastığı siyaqtı jetistikterin bağalay biluimiz kerek. Elimizdegi beybitşilik pen twraqtılıq sizdiñ sanañızğa baylanıstı, – dep qorıtındıladı Saparbek Nwrpeyisov.

Aydıñ alğaşqı aptasında «Qıtay ekspansiyasına» qarsı ötken narazılıqtarda közge tüsken 20 şaqtı belsendi eki aptadan soñ, 16-18 qırküyek aralığında jappay wstalıp, köbi 15 täulikke deyin sottaldı.  Sarapşılar azamattıq qoğam belsendilerin jappay twtqındau äreketi sırttay 20 jılğa sottalıp, artınan jazası ömir boyına bas bostandığın ayıruğa auıstırılğan ekonomist, eks-bankir Mwhtar Äbilyazov jetekşilik etetin Qazaqstanda resmi türde ekstremistik wyım retinde tanılğan  QDT qozğalısı şaqırğan 21 qırküyek küni ötui mümkin narzılıqtarğa baylanıstı ekenin aytadı. «Alañğa şıqqandardıñ bärin Äbilyazovtıñ jaqtastarı dep sanau biliktiñ ülken qateligi» deydi qoğam belsendileri.

Biliktiñ QDT jaqtastarı men azamattıq qoğam ökilderiniñ arajigin ajıratpay jatıp  jappay jauapqa tartuı qanşalıqtı "önimdi profilaktika" ekeni belgisiz.

"The Qazaq Times"