باس پروكۋراتۋرا ەرتەڭ ءوتۋى مۇمكىن ميتينگ پەن ءابىليازوۆ تۋرالى مالىمدەمە جاسادى

قر-نىڭ باس پروكۋراتۋراسى قوعامدىق مۇددەلەردى قورعاۋ قىزمەتىنىڭ باستىعى ساپاربەك نۇرپەيىسوۆ 21 قىركۇيەكتە ءوتۋى مۇمكىن ميتينگكە جانە ونىڭ ۇيىمداستىرۋشىسى ابىليازوۆقا قاتىستى پىكىر ءبىلدىردى.

«ميتينگتەرگە قاتىستى باس پروكۋراتۋرا بىرنەشە رەت ءتۇسىندىرىپ ءوتتى. بىراق مەن رۇقسات بەرىلمەگەن جاعدايدا قانداي جاۋاپكەرشىلىك جۇكتەلەتىنىن تاعى ءبىر ەسكە سالعىم كەلەدى. ءبىزدىڭ ازاماتتاردىڭ بارلىعى بىلەدى، ميتينگكە شىعۋدىڭ ءوز پروتسەدۋراسى بار. مەجەلەنگەن داتادان 10 كۇن بۇرىن رۇقسات الۋ كەرەك. ەگەر وسى تارتىپپەن رۇقسات الىنعان بولسا، ونى ۇيىمداستىرۋشىلار ەشقانداي جاۋاپقا تارتىلمايدى. ال رۇقساتسىز شىقسا، 15 كۇنگە قاماۋ جازاسىنا دەيىن قاراستىرىلعان. ميتينگتى ۇيىمداستىرۋشىلار ازاماتتاردىڭ قۇقىعىنا، ۇيىمدار مەن مەملەكەتتىڭ مۇددەسىنە زيان كەلتىرسە، قىلمىستىق جاۋاپكەرشىلىككە تارتىلادى. قر قك 400-بابى بويىنشا 50 تاۋلىككە دەيىن قاماۋ دا بار. سوندىقتان ازاماتتارعا قاراتىپ ايتقىم كەلەدى – كوشەگە شىقپاس بۇرىن رۇقسات الۋ كەرەك»، – دەگەن باس پروكۋراتۋرا وكىلى قىركۇيەكتىڭ 21-ىنە جوسپارلانعان ميتينگكە قاتىسۋدىڭ زاڭسىز ەكەنىن تۇسىندىرۋگە تىرىستى.

ساپاربەك نۇرپەيىسوۆ قازاقستاندا سوڭعى كەزدەرى ءجيى شەرۋلەر ۇيىمداستىرىپ جۇرگەن نەگىزگى باستاماشى ەكس-بانكير م.ءابىليازوۆتىڭ جەتەكشىلىگىندەگى ۇيىم تۋرالى «قازىر وزدەرىن «دۆك» دەپ اتايتىن ۇيىم جاقتاستارى 21 قىركۇيەكتە كوشەگە شىعۋعا ۇندەپ ءجۇر. وعان قازاقستان اۋماعىندا ەكسترەميستىك ۇيىم رەتىندە تىيىم سالىنعان. ەستەرىڭىزگە سالعىم كەلەدى، 2005 جىلدان بەرى پروكۋرورلاردىڭ ءوتىنىشى بويىنشا سوت 8 ۇيىمدى ەكسترەميستىك دەپ تانىعان. ولار: «حيزبۋت تاحرير ءال يسلامي»، «تابليعي جاماعات»، «سەنىم. ءبىلىم. ءومىر»، «العا»حالىق پارتياسى»، «حالىق مايدانى-نارودنىي ۆرونت»، «ات-تاكفير ۋا-ال حيدجا» جانە «ياكىن ينكار» جانە «دۆك». بۇل اتالعان ۇيىمدار ەكسترەميستىك دەپ تانىلعاندىقتان، ولاردىڭ قىزمەتىنە قاتىسۋ زاڭمەن قۋدالانادى. ءبىزدىڭ ازاماتتارعا تاعى دا تۇسىندىرگىم كەلەدى – ەكسترەميستىك ۇيىمنىڭ قىزمەتىنە كەز كەلگەن فورمادا قاتىسۋ زاڭسىز»، – دەدى.

«بۇل جەردە تىكەلەي قاتىسۋ مىندەتتى ەمەس. بىرەۋ جاسىرىن قاتىسىپ، كولىكپەن قامتاماسىز ەتۋى مۇمكىن. بىرەۋ «دۆك» جاقتاۋشىلارى مەن قاتىسۋشىلاردى جۇيەلى تۇردە جاسىرىپ كەلۋى مۇمكىن. بىرەۋ قارجىلاندىرىپ، ءتۇرلى ۇنپاراقتار تاراتۋى مۇمكىن. الەۋمەتتىك جەلىدە پوست پەن كوممەنتاري تاراتىپ، ءبولىسۋ دە – ەكسترەميستىك ۇيىمنىڭ جۇمىسىنا فيزيكالىق، اقپاراتتىق، قارجىلاي كومەكتەسۋ دەپ قارالادى. ال بۇعان زاڭمەن تىيىم سالىنعان. ءبىز ىلعي ەسكەرتىپ كەلەمىز. تاعى دا ازاماتتارىمىزعا قىلمىستىق قۋدالاۋ شەڭبەرىندە قالماس ءۇشىن زاڭ تالاپتارىن ساقتاۋ كەرەكتىگىن ەسكەرتەمىز»، – دەدى ول.

پروكۋروراتۋرا وكىلىنىڭ ايتۋىنشا، بيىل ازاماتتاردى زاڭسىز ۇستاۋدىڭ 600 فاكتىسى انىقتالىپ، 149 ادامعا قاتىستى نەگىزسىز قىلمىستىق قۋدالاۋ توقتاتىلعان. سونداي-اق قىلمىستىق ءىس جۇرگىزۋ زاڭناماسىن ورەسكەل بۇزعانى ءۇشىن 4 177 ءتارتىپ ساقشىعا جازا قولدانىلعان دەسەدى.

نۇرپەيىسوۆ سوزىنە سەنسەك، بۇگىندە شەت مەملەكەتتەرمەن يتاليا، يسپانيا، سولتۇستىك ماكەدونيا، وڭتۇستىك كورەيا، بولگاريا ت.ب. قىلمىسكەرلەردى بىرلەسىپ ۇستاۋ بويىنشا 69 كەلىسىم جاسالعان. قازاقستان ولارعا 77 شەتەلدىكتى ۇستاپ بەرسە، سوڭعى 5 جىلدا شەت ەلدەردەن قازاقستان اۋماعىندا قىلمىس جاساعانى ءۇشىن ىزدەۋ جاريالانعان 356 ازامات ەلگە قايتارىلعان ەكەن.

–  مەنىڭ ابىليازوۆقا سەنەتىن ادامدارعا ايتارىم، ابىليازوۆكە سەنبەۋ كەرەك. ونىڭ زاڭسىز نارازىلىق اكتسيالارىنا ەرمەۋ كەرەك. اقشا تولەسە – ول ءبىزدىڭ ازاماتتارىمىزدان ۇرلانعان اقشا. ءابىليازوۆ پەن ونىڭ جاقتاستارى – سوتپەن تىيىم سالىنعان "دۆك" ەكسترەميستىك ۇيىمىنىڭ بەلسەندىلەرى قاراپايىم ادامداردى الداپ، ولاردى ادەيى قىلمىسقا بارۋعا ارانداتۋدا. ءوزى بولسا فرانتسيادا تىعىلىپ وتىر، ءارى قازاقستاندا جانە باسقا ەلدەردە ۇرلانعان اقشاعا ءومىر ءسۇرىپ ءجۇر. قۇرمەتتى وتانداستار، مەن وسى پلاتفورمانى پايدالانا وتىرىپ، سىزدەردى ارانداتۋشىلىققا بوي الدىرماۋعا، تىيىم سالىنعان ۇيىمداردىڭ زاڭسىز ارەكەتتەرى مەن قىزمەتىنە قاتىسپاۋعا شاقىرامىن. ءبىز ارقاشان دا مەملەكەتىمىزدىڭ ۇلتارالىق كەلىسىمى مەن باۋىرلاستىعى سياقتى جەتىستىكتەرىن باعالاي ءبىلۋىمىز كەرەك. ەلىمىزدەگى بەيبىتشىلىك پەن تۇراقتىلىق ءسىزدىڭ ساناڭىزعا بايلانىستى, – دەپ قورىتىندىلادى ساپاربەك نۇرپەيىسوۆ.

ايدىڭ العاشقى اپتاسىندا «قىتاي ەكسپانسياسىنا» قارسى وتكەن نارازىلىقتاردا كوزگە تۇسكەن 20 شاقتى بەلسەندى ەكى اپتادان سوڭ، 16-18 قىركۇيەك ارالىعىندا جاپپاي ۇستالىپ، كوبى 15 تاۋلىككە دەيىن سوتتالدى.  ساراپشىلار ازاماتتىق قوعام بەلسەندىلەرىن جاپپاي تۇتقىنداۋ ارەكەتى سىرتتاي 20 جىلعا سوتتالىپ، ارتىنان جازاسى ءومىر بويىنا باس بوستاندىعىن ايىرۋعا اۋىستىرىلعان ەكونوميست، ەكس-بانكير مۇحتار ءابىليازوۆ جەتەكشىلىك ەتەتىن قازاقستاندا رەسمي تۇردە ەكسترەميستىك ۇيىم رەتىندە تانىلعان  قدت قوزعالىسى شاقىرعان 21 قىركۇيەك كۇنى ءوتۋى مۇمكىن نارزىلىقتارعا بايلانىستى ەكەنىن ايتادى. «الاڭعا شىققانداردىڭ ءبارىن ءابىليازوۆتىڭ جاقتاستارى دەپ ساناۋ بيلىكتىڭ ۇلكەن قاتەلىگى» دەيدى قوعام بەلسەندىلەرى.

بيلىكتىڭ قدت جاقتاستارى مەن ازاماتتىق قوعام وكىلدەرىنىڭ اراجىگىن اجىراتپاي جاتىپ  جاپپاي جاۋاپقا تارتۋى قانشالىقتى ء"ونىمدى پروفيلاكتيكا" ەكەنى بەلگىسىز.

"The Qazaq Times"