Qoğamdıq avtobus pen teplovoz soqtığısqan. 13 qırküyek 2019 jıl. Elorda. Foto: aşıq derekköz

Almatı oblısındağı Şamalğan tragediyasınan eki kün bwrın elordada da qoğamdıq kölik türleriniñ jol apatı orın alğan.

Elordada 13 qırküyek küni sağat 07:45 şamasında temirjoldı qiıp ötip bara jatqan №53 bağdardağı avtobus pen teplovoz soqtığısqan. «Astana LRT» JŞS qoğammen baylanıs departamentiniñ basşısı Nauat Azanbaeva mälimdeuinşe, kölik apatı kezinde avtobusta jolauşılar bolmağan. Jol apatınan keyin avtobus jürgizuşisine äkimşilik hattama toltırılıp, jwmısınan şettetilgen. JKO boyınşa tekseru jürgizilip jatır.

Bir qızığı, osıdan üş kün bwrın orın alğan jağday BAQ betterinde keşegi Şamalğan beketindegi qayğılı oqiğadan soñ bügin köptep jariyalanuda.

№53 qoğamdıq köligi men teplovoz soqtığısqan. 13 qırküyek 2019 jıl. Elorda. Foto: aşıq derekköz

Qwzırlı mekemelerdiñ aytuınşa JKO-ğa avtobus jürgizuşi kinäli körinedi. 13 qırküyek 2019 jıl. Elorda. Foto: aşıq derekköz

Soñğı kezderi elimizde qoğamdıq kölik türlerine qatıstı jol apatı faktileri jiiley tüsken. Aldıñğı jılğı Şu stanciyasındağı temir jol apatı, jıl sayınğı jeñil kölikter men avtobustardıñ qatısuımen bolatın san aluan qaqtığıstar köbine adam şığınına alıp keledi. Wlttıq ekonomika ministrligi Statistika komitetiniñ derekterine süyensek, Qazaqstanda jıl sayın jol-kölik apatınan şamamen eki mıñnan astam adam qaza tabadı. Mäselen, 2017 jılı 17019 jol-kölik apatı tirkelip, 22 256 adam jaraqat alıp, 2086 adam qaytıs bolğan. Al, bıltır (2018 jılı) Qazaqstanda 15 821 jol-kölik apatı tirkelip, onda 20 445 adam jaraqat alsa, 2096 adam qaza tapqan.

The World Bank-tıñ mälimetinşe, Qazaqstanda 100 000 adamğa şaqqanda jol-kölik apatınan qaza tabatındar sanı 23,8 koefficientti qwraydı. Bwl körsetkiş Europa elderimen salıstırğanda äldeqayda köp.

Esteriñizge sala ketsek, keşe keşkilik Almatı oblısı Aqseñgir-Şamalğan stanciyasında poyız ben avtobus soqtığısıp, bir adam qaza taptı. Resmi derekterge qarağanda, auruhanağa tüsken üş jolauşınıñ hali öte auır jağdayda. Tötenşe jağday ornında jüzge tarta twrğın temir joldı jauıp, wzaq jıldar boyı aytılıp kele jatqan köpir salu mäselesin şeşudi talap etti. Aşınğan bwqara "enjar" bilikti ayıptauda.

"The Qazaq Times"