قوعامدىق اۆتوبۋس پەن تەپلوۆوز سوقتىعىسقان. 13 قىركۇيەك 2019 جىل. ەلوردا. فوتو: اشىق دەرەككوز

الماتى وبلىسىنداعى شامالعان تراگەدياسىنان ەكى كۇن بۇرىن ەلوردادا دا قوعامدىق كولىك تۇرلەرىنىڭ جول اپاتى ورىن العان.

ەلوردادا 13 قىركۇيەك كۇنى ساعات 07:45 شاماسىندا تەمىرجولدى قيىپ ءوتىپ بارا جاتقان №53 باعدارداعى اۆتوبۋس پەن تەپلوۆوز سوقتىعىسقان. «Astana LRT» جشس قوعاممەن بايلانىس دەپارتامەنتىنىڭ باسشىسى ناۋات ازانباەۆا مالىمدەۋىنشە، كولىك اپاتى كەزىندە اۆتوبۋستا جولاۋشىلار بولماعان. جول اپاتىنان كەيىن اۆتوبۋس جۇرگىزۋشىسىنە اكىمشىلىك حاتتاما تولتىرىلىپ، جۇمىسىنان شەتتەتىلگەن. جكو بويىنشا تەكسەرۋ جۇرگىزىلىپ جاتىر.

ءبىر قىزىعى، وسىدان ءۇش كۇن بۇرىن ورىن العان جاعداي باق بەتتەرىندە كەشەگى شامالعان بەكەتىندەگى قايعىلى وقيعادان سوڭ بۇگىن كوپتەپ جاريالانۋدا.

№53 قوعامدىق كولىگى مەن تەپلوۆوز سوقتىعىسقان. 13 قىركۇيەك 2019 جىل. ەلوردا. فوتو: اشىق دەرەككوز

قۇزىرلى مەكەمەلەردىڭ ايتۋىنشا جكو-عا اۆتوبۋس جۇرگىزۋشى كىنالى كورىنەدى. 13 قىركۇيەك 2019 جىل. ەلوردا. فوتو: اشىق دەرەككوز

سوڭعى كەزدەرى ەلىمىزدە قوعامدىق كولىك تۇرلەرىنە قاتىستى جول اپاتى فاكتىلەرى جيىلەي تۇسكەن. الدىڭعى جىلعى شۋ ستانتسياسىنداعى تەمىر جول اپاتى، جىل سايىنعى جەڭىل كولىكتەر مەن اۆتوبۋستاردىڭ قاتىسۋىمەن بولاتىن سان الۋان قاقتىعىستار كوبىنە ادام شىعىنىنا الىپ كەلەدى. ۇلتتىق ەكونوميكا مينيسترلىگى ستاتيستيكا كوميتەتىنىڭ دەرەكتەرىنە سۇيەنسەك، قازاقستاندا جىل سايىن جول-كولىك اپاتىنان شامامەن ەكى مىڭنان استام ادام قازا تابادى. ماسەلەن، 2017 جىلى 17019 جول-كولىك اپاتى تىركەلىپ، 22 256 ادام جاراقات الىپ، 2086 ادام قايتىس بولعان. ال، بىلتىر (2018 جىلى) قازاقستاندا 15 821 جول-كولىك اپاتى تىركەلىپ، وندا 20 445 ادام جاراقات السا، 2096 ادام قازا تاپقان.

The World Bank-تىڭ مالىمەتىنشە، قازاقستاندا 100 000 ادامعا شاققاندا جول-كولىك اپاتىنان قازا تاباتىندار سانى 23,8 كوەففيتسيەنتتى قۇرايدى. بۇل كورسەتكىش ەۋروپا ەلدەرىمەن سالىستىرعاندا الدەقايدا كوپ.

ەستەرىڭىزگە سالا كەتسەك، كەشە كەشكىلىك الماتى وبلىسى اقسەڭگىر-شامالعان ستانتسياسىندا پويىز بەن اۆتوبۋس سوقتىعىسىپ, ءبىر ادام قازا تاپتى. رەسمي دەرەكتەرگە قاراعاندا، اۋرۋحاناعا تۇسكەن ءۇش جولاۋشىنىڭ ءحالى وتە اۋىر جاعدايدا. توتەنشە جاعداي ورنىندا جۇزگە تارتا تۇرعىن تەمىر جولدى جاۋىپ، ۇزاق جىلدار بويى ايتىلىپ كەلە جاتقان كوپىر سالۋ ماسەلەسىن شەشۋدى تالاپ ەتتى. اشىنعان بۇقارا "ەنجار" بيلىكتى ايىپتاۋدا.

"The Qazaq Times"